Qeshyakunqanpita imanö purificakunanpäpis ninqan
12
Mastami Moisésta Tayta Dios nirqan: 2 “Israel runakunata niy: ‘Mayqan warmipis ollqu wamrata qeshyakurqa qanchis junaqyaqmi impüru kanqa. Tsaynö impüru kanqa killa qeshyanwan impüru kanqannömi. 3 Wamratanami yurinqanpita puwaq junaqyuqta señalatsiyanki.† 4 Wamrapa mamannami yawarnin aywanqanpita kimsa chunka kimsa (33) junaqyaq purificakunqa. Tsayyaqqa manami imatapis sagrädu kaqta yatanqatsu ni Sagrädu Toldupa patiunmanpis yaykunqatsu. 5 Warmi wamrata qeshyakurqa killa qeshyan aywaptin impüru kanqannömi ishkay semäna impüru kanqa. Yawarnin aywanqanpitami soqta chunka soqta (66) junaqyaq purificakunqa.6 “ ‘Ollquta o warmita qeshyakurpis purificakunanpä kaq junaqkunata cumpliskirmi Tinkuna Toldupa patiunman rupatsina sacrificiupä juk watayuq carnishta apamunqa. Tsaynöllami purificatsina sacrificiupä juk pushapa palumata o juk kullkushta karpis apamunqa. Tsaykunatami sacerdötita entreganqa. 7 Yawarnin aywanqanpita püruna warmi kananpämi Tayta Diospa ñöpancho† tsay uywakunata rupatsinqa. Ollquta o warmita qeshyakurpis tsaynömi ruranqa.
8 “ ‘Carnishta rantinanpä mana aypäpakurqa ishkay kullkushkunata o ishkay pushapa palumakunatami apamunqa.† Jukaqmi kanqa rupatsina sacrificiupä y jukaqnami purificatsina sacrificiupä kanqa. Tsaynö apamuptinmi warmi purificashqa kananpä Tayta Diosta sacerdöti mañakunqa. Tsaynöpami tsay warmiqa püruna kanqa’ ”.