Püru kaq y impüru kaq uywakuna
11
Moiséstawan Aaróntami Tayta Dios nirqan: 2 “Israel runakunata niyay: ‘Uywakunata mikuyanki 3 ishkay shilluyuq kutipaq kaqta. 4 Kutipaq kaptinpis cada chakincho ishkay shilluyuq mana kaptinqa ama mikuyankitsu. Tsaynölla cada chakincho ishkay shilluyuq kaptinpis mana kutipaq kaptinqa ama mikuyankitsu.“ ‘Tsaynö kaptinqa camëllu aytsata ama mikuyankitsu. Camëlluqa kutipaq karpis cada chakincho manami ishkay shilluyuqtsu. Tsaymi qamkunapä impüru kaykan. 5 Tsaynölla tejón aytsata ama mikuyankitsu. Tejonqa kutipaq karpis manami ishkay shilluyuqtsu. Tsaymi qamkunapä impüru kaykan. 6 Tsaynölla liebri aytsata ama mikuyankitsu. Liebriqa kutipaqa karpis manami ishkay shilluyuqtsu. Tsaymi qamkunapä impüru kaykan. 7 Kuchi aytsatapis ama mikuyankitsu. Kuchiqa ishkay shilluyuq karpis mana kutiparmi qamkunapä impüru kaykan. 8 Tsay uywakunapa aytsantaqa ama mikuyankitsu. Wanuptinpis ama yatayllapis yatayankitsu. Tsay uywakunaqa qamkunapä impürumi kaykan.
9 “ ‘Mayucho y lamarcho kaqkunatapis alëtayuq y escämayuq kaqkunallata mikuyanki. 10 Lamarcho o mayucho kaptinpis escämaynaq y alëtaynaq kaqkunataqa ama mikuyankitsu. Tsaykunaqa qamkunapä impürumi kaykan. 11 Tsaykunapa aytsantaqa ama mikuyankitsu. Impüru kaptin wanushqatapis melanäyanki. 12 Llapantapis alëtaynaq y escämaynaq kaqkunataqa impüru kaptin melanäyanki.
13 “ ‘Wakin kaqtaqa pajaqkunatapis ama mikuyankitsu. Tsaypa trokinqa impüru kaptin melanäyanki. Ama mikuyankitsu ankata, wiskurta, lamarcho pescaq äguilata, 14 milänu niyanqan ankata, tukuy casta halconkunata, 15 tukuy casta cuervukunata, 16 avestruzta, chushiqta, qewllata, tukuy casta ankata, 17 tukuta, cormorán niyanqan yaku pätuta, ibis niyanqan yaku pätuta, 18 cisnita, pelïcanuta, condorta, 19 cigüeñata, llapan casta garzata, abubillata y tsiktsitapis.
20 “ ‘Llapan casta vuelaq y chusku chakiyuq insectukunapisb qamkunapä impürumi kaykan. Tsaykunataqa melanäyanki. 21 Chusku chakiyuq y älayuq saltaq insectukunatami itsanqa mikuyanki. 22 Tsaynö kaptinqa llapan casta chukllushkunapis allimi mikuyänaykipä kaykan. 23 Mana saltaqkunataqa pajaq kaptinpis y chusku chakiyuq kaptinpis ama mikuyankitsu.
24 “ ‘Kanan tantiyatsiyäshayki imata yatar impüru kayänaykipä kanqanta. Pipis impüru uywa wanushqata yatarqa patsa tsakanqanyaqmi impüru kanqa. 25 Tsay wanushqa uywakunata pipis joqarirqa latsapanta taqshakutsun. Tsaynö taqshakurpis patsa tsakanqanyaqmi impüru kanqa.
26 “ ‘Ima uywapis ishkay shilluyuq karpis mana kutipaq karqa qamkunapä impürumi kaykan. Tsay uywakuna wanuptin mayqanpis yataq kaqqa impürumi kanqa.
27 “ ‘Chaki paltallanwan puriq uywakunapisc qamkunapä impürumi kaykan. Tsay uywakuna wanuyaptin pipis yataq kaqmi patsa tsakanqanyaq impüru kanqa. 28 Tsay impüru uywakuna wanushqa jitaraykaqta joqariq kaqpis latsapanta taqshakutsun. Taqshakurpis patsa tsakanqanyaqmi impüru kanqa.
29 “ ‘Tsaynöllami qarachaypa y lätaypa puriqkunapis qamkunapä impüru kaykäyan. Tsaykuna kaykäyan mashallu, ukush y llapan casta arashkuna. 30 Arashkuna impürumi kaykan salamanquesa, cocodrilu, lagartu, lagartija y camaleón karpis. 31 Tsaykunaqa qamkunapä impürumi kaykan. Pipis tsaykuna wanuptin yataq kaqmi patsa tsakanqanyaq impüru kanqa.
32 “ ‘Tsay impüru kaqkuna wanur imamanpis töpanqanmi impüru kanqa qerupis, latsapapis, qarapis, costalpis o herramienta karpis. Töpaq kaqtaqa juklla yakuman jatiyanki. Tsaynö rurayaptikipis patsa tsakanqanyaqmi impüru kanqa.
33 “ ‘Tsay impüru kaqkuna wanur mitu mankaman wiñakaptinqa manka rurincho kaqpis llapanmi impüru kanqa. Tsaynö kaptinqa mankatapis pakiriyanki. 34 Ima mikuymanpis tsay mankacho kaykaq yaku pillchiptinqa mikuypis impürumi kanqa. Tsay mankacho yakupis impürumi kanqa. 35 Jornu jananman o tullpa jananman tsay impüru kaqkuna wanur shushuptinqa impürumi kanqa. Tsaykunataqa impüru kaptin chipyaq juchutsiyanki.
36 “ ‘Tsaynö kaptinpis yaku upukunayki pukyucho o pözucho tsay impüru kaqkuna wanuptinqa tsay yaku manami impürutsu kanqa. Wanushqata yataq kaqmi itsanqa impüru kanqa.
37 “ ‘Murunaykipä kaq muruman tsay impüru kaqkuna wanur töpaptinpis muru manami impürutsu kanqa. 38 Muru ushmashqa jananman shushuptinmi itsanqa impüru kanqa.
39 “ ‘Mikunaykipä kaq uywa wanuptin pipis yataq kaqqa patsa tsakanqanyaqmi impüru kanqa. 40 Kikillan wanushqa uywapa aytsanta mikuq kaqqa latsapanta taqshakutsun. Tsay wanushqa uywata jipiq kaqpis latsapanta taqshakutsun. Tsaynö taqshakurpis patsa tsakanqanyaqmi impüru kayanqa.
41 “ ‘Qarachaypa y lätaypa puriqkunataqa imatapis ama mikuyankitsu. Tsaykunaqa impüru karmi melanaypä kaykäyan. 42 Tsaykunata ama mikuyankitsu qarachaypa puriptinpis o chuskun chakinwan puriptinpis o atska chakinwan puriptinpis. Tsaykunaqa impüru karmi melanaypä kaykan. 43 Paqtä tsaykunata yatar impüru kayankiman. 44 Noqami Tayta Diosnikikuna kaykä. Noqami santu kaykä. Tsaymi qamkunapis ninqäkunata cäsukur santu kayänayki. Tsaynö kaykaptinqa qarachaypa y lätaypa puriqkunata ama mikuyankitsu. 45 Tayta Diosnikikuna kanäpämi qamkunata Egiptupita jipimushqä. Noqaqa santumi kaykä. Tsaymi qamkunapis santu kayänayki.†
46 “ ‘Kay leykunami kaykan tukuy casta uywakuna, tukuy casta pajaqkuna, yakucho tukuy casta kaqkuna y tukuy casta qarachaypa y lätaypa puriqkuna 47 mayqan impüru kanqanta y mayqan püru kanqantapis tantiyayänaykipä. Tsaynöllami tantiyayanki mayqanta mikuyänaykipä y mayqanta mana mikuyänaykipä kanqantapis’ ”.