Nadabwan Abiú wanuyanqan
10
Aarónpa tsurinkuna Nadabwan Abiúmi inciensiu qoshnitsikuyänankunaman shanshata y inciensiuta wiñarkur Tayta Diospa ñöpancho† qoshnitsiyarqan. Itsanqa manami pay munanqannötsu qoshnitsiyarqan. 2 Tsaymi Tayta Diospa ñöpanpita nina shamur paykunata rupar wanutsirqan. 3 Nirkurnami Aarónta Moisés nirqan: “Tantiyakuy Tayta Dios ninqanta. Paymi nirqan:“ ‘Ñöpäman yaykamuqkuna santu kanqäta tantiyar respitayämätsun.
Israel runakunapa ñöpanchömi musyatsishä munayyuq kanqäta’ ”.
Tsaynö niptinmi Aarónqa imatapis parlakurqantsu.
4 Tsaypitanami Aarónpa tiyun Uzielpa tsurin Misaelta y Elzafánta qayaykatsir Moisés nirqan: “Tinkuna Toldu kaqcho wanushqa jitaraykaq castaykikunata campamentupita jukläman apayay”.
5 Moisés tsaynö niptinmi sotänanpita wanturkur campamentupita jukläman apayarqan.
6 Nirkurnami Moisésqa Aarónta y Aarónpa tsurinkuna Eleazartawan Itamarta nirqan: “Qamkunapis mana wanuyänaykipä wanupakunqaykipita naqtsakunni ama puriyaytsu ni latsapaykikunatapis ama rachiyaytsu. Lütuyaptikiqa Tayta Dios rabyanarmi llapan runakunata castiganqa. Paykunata Tayta Dios tsaynö wanutsinqanpitami Israel castaykikunalla lütuyanqa. 7 Qamkunataqa Tayta Diosta sirviyänaykipämi sagrädu aceitita wiñapashqä. Payta sirviyänaykipä kaykarqa Tinkuna Toldupa patiunpita ama witiyaytsu. Tsaypita witirqa wanuyankimi”.
Tsaymi Moisés ninqannölla paykuna rurayarqan.
8 Tsaypitanami Aarónta Tayta Dios nirqan: 9 “Qampis ni tsurikikunapis Tinkuna Tolduman yaykuyänaykipä kaykarqa vïnuta ni ima machätsikuqtapis ama upyayankitsu. Machashqa yaykurqa wanuyankimi. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa. 10 Sacerdöti kaykarqa tantiyakunki imapis sagrädu kanqanta y mana sagrädu kanqanta. Tsaynölla tantiyakunki imapis püru kanqanta y impüru kanqanta. 11 Israel runakunata shumaq yachatsinki Moisésta willanqä leykunata”.
Mikuyänanpä kaqta Eleazar y Itamar mana mikuyanqan
12 Tsaypitanami Aarónta y tsurinkuna Eleazartawan Itamarta Moisés nirqan: “Tayta Diospä tsaki mikuy ofrendata rupatsiyänaykipä apayämunqan sobraq kaqtaqa sagrädu kaptinmi levadüraynaqllata altarpa ñöpancho mikuyanki. 13 Tayta Diospä apayämunqan ofrendakunapita qampä y tsurikikunapä destinashqa kaptinmi tsay sagrädu lugarllacho mikuyanki.† Tsaynö kananpämi Tayta Dios nimashqa.
14 “Alli päsakuy sacrificiupä Israel runakuna pishtayanqan uywapa pëchunpis chankanpis mikuyänaykipämi kanqa. Tsaynöllami tsurikikuna warmipis ollqupis mikuyanqa. Tsaykunaqa derëchuykikunami kaykan. Tsay pëchuta Tayta Diospa ñöpancho ishkan makinwan joqarishqa kaptin y tsay chanka paypä rakishqa kaptinmi püru sitiucho mikuyanki. 15 Manarä mikurmi tsay derëcha kaq chankanta Tayta Diospä rakinki y pëchuntana paypa ñöpancho ishkan makikiwan joqarkur wakman kayman kuyutsinki. Tsaynömi pishtanqayki uywapa wirantapis rupatsinki. Tayta Dios ninqannömi qamkunapa y qamkunapita aywaraq sacerdötikunapa derëchunkuna imayyaqpis kanqa”.
16 Tsaypitanami Aarónta Moisés tapur nirqan: “Purificatsina sacrificiupä apamunqan chïvupa sobrashqa kaq aytsanqa ¿maytä?”
Chïvupa aytsanta mikuyänanpa trokin rupatsiyanqanta musyaykurmi Aarónpa tsurinkuna Eleazarta y Itamarta Moisés ollqutupar nirqan: 17 “¿Imanirtä purificatsina sacrificiupä apayämunqan uywapa aytsanta sagrädu lugarcho mikuyashqaykitsu? Tsay aytsaqa sagrädumi. Tsaytaqa qamkunatami Tayta Dios entregayäshushqayki Israel runakunapa jutsanpita altarcho rupatsiptiki perdonashqa kayänanpä.† 18 Tsay uywapa yawarninta Tinkuna Toldu rurinman mana apaykarqa willanqänölla sagrädu lugarcho aytsanta mikuyankiman karqan”.
19 Tsaynö niptinmi Aarón nirqan: “Kanan junaqmi purificatsina sacrificiuta y rupatsina sacrificiuta Tayta Diospa ñöpancho rupaykätsiyanqancho tsurïkuna wanuyashqa. Tsaynö wanupakushqa karmi purificatsina sacrificiupä apamunqan uywapa aytsanta mikushqätsu. Mikuptïqa ¿Tayta Dios munanqannötsurä kanman karqan?”
20 Tsaynö niptinmi Moisésqa imatapis parlakurqannatsu.