Sacrificiukunata rupatsir Aarón qallanqan
9
Tsaypita puwaq junaqtanami Moisés qayarqan Aarónta, tsurinkunata y Israel mayor runakunatapis. 2 Tsaychömi Aarónta nirqan: “Purificatsina sacrificiupä juk sänu torïtuta y rupatsina sacrificiupä sänu carnëruta Tayta Diospa ñöpanman apamunki. 3 Israel runakunatana ninki purificatsina sacrificiupä juk chïvuta apayämunanpä. Tsaynölla rupatsina sacrificiupä juk watayuq sänu torïtuta y juk watayuq sänu carnishta apayämunqa. 4 Tsaynölla alli päsakuy sacrificiupä juk töruta y juk carnëruta apayämunqa. Tsaykunatami Tayta Diospa ñöpancho pishtayanki. Tsaynölla aceitiwan pichushqa jarinata apayämunqa. Tsaynömi apayämunqa Tayta Dios kanan junaq noqantsikman chämunanpä kaptin”.5 Aarónta Moisés ninqannöllami Tinkuna Toldupa patiunman Israel runakuna tsaykunata apayarqan. Tsaychömi llapan runakuna Tayta Diospa ñöpanman qorikäyarqan. 6 Tsaymi Moisés nirqan: “Apayämunqaykita rupatsinantsikpämi Tayta Dios nishqa. Ninqanta rurayaptikiqa chipipiyninpis atsikyarrämi rikakämunqa”.
7 Tsaypitanami Aarónta Moisés nirqan: “Purificatsina sacrificiupä y rupatsina sacrificiupä apamunqayki uywakunata altarman apaykur pishtay. Tsaykunami kanqa qampis y Israel runakunapis perdonashqa kayänaykipä. Nirkur Israel runakuna apayämunqan uywakunata altarman apaykur pishtay paykunapis jutsankunapita perdonashqa kayänanpä. Tsaynö rurayänaykipämi Tayta Dios nishqa”.†
8 Tsaynö niptinmi purificatsina sacrificiupä apamunqan torïtuta altarman apaykur Aarón pishtarqan. 9 Pishtanqan uywapa yawarnintanami Aarónpa tsurinkuna makyayarqan. Tsay yawarman dëdunta jatiykurmi altarpa waqrankunata Aarón llushirqan. Sobrashqa yawartanami altarpa chakinman tallirqan. 10 Nirkurnami purificatsina sacrificiupä pishtanqan uywapa rurunninkunata, ñatincho wiranta y wakin wiranta altarcho rupatsirqan. Moisésta Tayta Dios ninqannöllami llapanta rurarqan. 11 Aytsantawan qarantami itsanqa campamentupita jukläman apaykur rupatsirqan.
12 Tsaypitanami rupatsina sacrificiupä apamunqan uywata Aarón pishtarqan. Tsay uywapa yawarninta tsurinkuna makyayaptinnami altarpa lädunkunata tsaqtsuparqan. 13 Nirkurnami tsay uywapa umanta y cuartizanqan aytsata apapuyaptin altarcho Aarón rupatsirqan. 14 Pachantawan chakinta mayllaskirmi wakinta rupatsinqannölla altarcho rupatsirqan.
15 Tsaynöllami purificatsina sacrificiupä Israel runakuna apayämunqan chïvuta pishtaskir purificatsina sacrificiuta ñöpata ruranqannölla Israel runakunapäpis rurarqan. 16 Nirkurnami imaypis rurananpä Tayta Dios ninqannölla rupatsina sacrificiuta rupatsirqan. 17 Tutapa rupatsina sacrificiuta rupatsinqan jananchömi juk aptay tsaki mikuytapis rupatsirqan.
18 Tsaypitanami Israel runakuna alli päsakuy sacrificiupä† apayämunqan töruta y carnërutapis Aarón pishtarqan. Tsay uywakunapa yawarninta tsurinkuna makyayaptinmi altarpa lädunkunata tsaqtsuparqan. 19 Tsaynöllami tsurinkuna makyayarqan törupa y carnërupa chupanta, pacha wiranta, rurunkunata y ñatincho wirantapis. 20 Tsay wirankunatami pishtanqan uywakunapa pëchunkuna jananman churayarqan. Nirkurnami wirallantana altarcho Aarón rupatsirqan. 21 Uywapa pëchunkunata y derëcha kaq chankantanami Moisésta Tayta Dios ninqannölla joqarkur wakman kayman kuyutsirqan.
22 Purificatsina sacrificiupä, rupatsina sacrificiupä y alli päsakuy sacrificiupä apayämunqankunata altarman churaykurmi Israel runakunapa jananpa makinta joqarkur Aarón bendisarqan.† Altarpita yarpuskirnami 23 Moiséswan Aarón Tinkuna Tolduman yaykuyarqan. Tsaypita yarqaskamur Israel runakunata bendisayaptinmi Tayta Diospa chipipiynin rikakämurqan. 24 Tayta Diospa ñöpanpita nina shamurmi altar jananman churayanqan aytsatawan wirata rupaskirqan. Tsayta rikaykurmi llapan Israel runakuna kushikuypita qayaykachar Tayta Diosta adorar urkunpis patsaman töpanqanyaq lätakaykuyarqan.