14
“Tayta Diosnintsikpa wamrankuna kaykarqa pipis wanuptin ama cuerpuykikunata roqukur ushayankitsu ni urkuykikunatapis ama rutukuyankitsu.† 2 Qamkunaqa Tayta Dios kuyanqan santu runakunami kaykäyanki. Paymi llapan nación runakunapitapis akrayäshushqayki payllapana kayänaykipä.†Püru kaq y impüru kaq uywakuna ima kayanqan
3 “Impüru kaq uywakunataqa ama mikuyankitsu. 4 Mikuyänaykipä kaq uywakunami kaykan wäka, üsha, cabra, 5 munti cabra y tukuy casta lluytsukunapis.
6 “Mayqan uywatapis kutipaq kaptin y cada chakincho ishkay shilluyuq kaptinqa mikuyanki. 7 Mana kutipaq y ishkay shilluyuq mana kaptinqa ama mikuyankitsu. Tsaymi camëlluta, liebritaa y tejonta mikuyankitsu. Tsay uywakunaqa kutipaqb karpis mana ishkay shilluyuq karmi qamkunapä impüru kaykan. 8 Kuchiqa ishkay shilluyuq karpis mana kutiparmi qamkunapä impüru kaykan. Tsay uywakunapa aytsantaqa ama mikuyankitsu. Wanuptinpis ama yatayllapis yatayankitsu.
9 “Mayucho y lamarcho kaqkunatapis alëtayuq y escämayuq kaqkunallata mikuyanki. 10 Escämayuq kaptinpis alëtan mana kaptinqa ama mikuyankitsu. Tsaynölla alëtayuq kaptinpis escäman mana kaptinqa ama mikuyankitsu. Tsaykunaqa qamkunapä impürumi kaykan.
11 “Mayqan pajaqkunatapis püru kaqllata mikuyanki. 12 Ama mikuyankitsu ankata, wiskurta, lamarcho pescaq äguilata, 13 milänu niyanqan ankata, tukuy casta halconkunata, 14 tukuy casta cuervukunata, 15 avestruzta, chushiqta, qewllata, tukuy casta ankata, 16 tukuta, ibis niyanqan yaku pätuta, cisnita, 17 pelïcanuta, condorta, cormorán niyanqan yaku pätuta, 18 cigüeñata, abubillata ni tsiktsitapis.
19 “Llapan casta vuelaq insectukunamic qamkunapä impüru kaykan. Tsaykunataqa ama mikuyankitsu. 20 Älayuq kaqkunatapis püru kaqkunallata mikuyanki.
21 “Qamkunaqa Tayta Dios kuyanqan santu runakunami kaykäyanki. Tsaymi ima uywatapis kikillan wanushqataqa mikuyankitsu. Tsaypa trokinqa markaykikunacho taq jäpa runakunata qarayanki o rantikuykuyanki.
“Mallwa cabrapa aytsanta mamanpa lichinwanqa ama kusinayankitsu.†
Diezmupita Moisés tantiyatsinqan
22 “Cada wata cosëchata qorir mana qonqaypa diezmuta rakiyanki.† 23 Trïguta cosechar cada chunka tupupita diezmupä jukta rakiyanki. Vïnuta rurar cada chunka tupupita diezmupä jukta rakiyanki. Olïvupita aceitita rurar cada chunka tupupita juk tuputa diezmupä rakiyanki. Tsaynölla wäkaykipa, üshaykipa y cabraykipa punta yuriq wawankunata primiciapä rakiyanki. Tsay rakiyanqaykikunataqa Tayta Dios akranqan kaq sitiuman apaykur paypa ñöpancho mikuyanki. Tsaynöpami Tayta Diospita imaypis mantsapakuyta yachakuyanki.
24 “Tsay sitiu alläpa karucho kaptinqa y Tayta Dios bendisayäshunqaykipita rakiyanqayki diezmuta apayta mana kamäpakurqa 25 rantikuyanki. Tsay qellayllatana Tayta Diosta adorayänaykipä akranqan sitiuman apayanki. 26 Tsaychöna munayanqaykita rantiyanki wäkata, üshata, cabrata, vïnuta, o aswata karpis. Nirkur Tayta Diospa ñöpancho castaykikunawan kushikur mikuyanki.
27 “Markaykicho taq levitakunataqa mana qonqaypa imallawanpis yanapayanki. Paykunapaqa manami chakrankunapis kanqatsu.
28 “Tsaynölla cada kimsa watacho mikuyta cosechayanqaykipita diezmuta rakir markaykikunacho juk sitiuman churayanki. 29 Tsay churayanqayki diezmupitami pacha junta mikuyanqa levitakuna, qamkunacho taykaq jäpa runakuna, waktsakuna y viüdakuna. Tsaynö mikuyänanpä churayaptikimi Tayta Dios bendicionninta llapan aruyanqaykiman churamunqa.†