Jaqakunata perdonayänan watapä tantiyatsinqan
15
“Pipis jaqayki kaptin cada qanchis watacho perdonar amana cobrayankitsu.† 2 Tsay wata chämuptin mayqaykipis Israel mayikita prestanqaykita perdonar amana cobrayankinatsu. Tsay wataqa kanqa Tayta Diosta cäsukur jaqakunata perdonayänayki watami. 3 Jäpa runataqa jaqaykita cobrayanki. Israel mayikita itsanqa jaqayki kaptinpis perdonayanki.4 “Tsaynö rurayaptikiqa rikatsiyäshunaykipä kaykaq nacionchömi Tayta Dios bendicionninta churamunqa. Tsaymi qamkunachöqa muchuqkunapis kanqatsu. 5 Tayta Diosmi bendicionninta churamunqa kanan willanqä mandamientunkunata cumpliyaptiki. 6 Awninqannö bendicionninta churamuptinmi wakin nación runakunata mañayänaykipäpis kanqa. Qamkunaqa manami pipitapis mañakuyankitsu. Tsaynöpis atska nacionkunatami munaynikicho tsararäyanki. Qamkunataqa manami pipis munaynincho tsararäyäshunkitsu.
7 “Tayta Dios rikatsishunaykipä kaykaq nacionchöna taykar marka mayiki muchuq kaptinqa yanapayanki. Mana kuyapäkuqqa ama kayankitsu. 8 Tsaypa trokinqa mañakuyäshuptiki ministiyanqanta mañayanki.† 9 Jaqakunata perdonayänan wata chämunanpä kanqantana tantiyar ama yarpäyankitsu manana mañayänaykipä kanqanta, tsaypa trokinqa mañakuyäshuptiki mañayanki. Mana mañayaptikiqa muchuycho kaykaq runa Tayta Diosman quejakuptinmi jutsayuq kayanki. 10 Tsaynö kaykaptinqa llapan voluntänikikunawan muchuqkunata yanapayanki. Tsayrämi Tayta Dios bendicionninta churamunqa llapan aruyanqaykikunaman. 11 Kay patsachöqa muchuqkuna imaypis kayanqami.† Tsaymi noqa nï marka mayikikuna muchuycho kaptin yanapayänaykipä.
Wätayninkunata kachäyänanpä ninqan
12 “Hebreo mayiki ollqu o warmi karpis wätayniki kananpä qampita qellayta jipishqa karqa† soqta watayaqllami arupäyäshunki. Qanchis watachöqa librinami yarqukunqa. 13 Yarqukuptin jinayllataqa ama kachäyankitsu. 14 Tsaypa trokinqa Tayta Dios bendicionta churamunqanpita uywata, trïguta y vïnutapis apananpä qarayanki. 15 Ama qonqäyankitsu qamkunapis Egiptucho wätay kayanqaykipita Tayta Dios jipiyämushunqaykita. Tsaymi qamkunata nï wätaynikikunata libritana kachäyänaykipä.
16 “Wätayniki qamkunawan y castaykikunawan yachakashqa kar aywakuyta mana munaptinqa 17 punkupa marcunman apaykur rinrinta alisnawan uchkuyanki. Tsaynöpami wanunqanyaq wätayniki kanqa. Tsaynölla rurayanki wätayniki warmi kaptinpis.
18 “Wätayniki librina aywakuptin ama ajanäyankitsu. Tantiyakuyay arupakuqta pägayänaykipä kanqanpita wallkallata pägayanqaykita. Wallkallapämi soqta watantin arupäyäshushqayki. Wätaynikikunata tsaynö kachäyaptikiqa Tayta Diosmi llapan arunqaykikunamanpis bendicionninta churamunqa.
Uywankunapa punta yuriq orqu wawankuna Tayta Diospä ninqan
19 “Wäkaykikunapa, üshaykikunapa y cabraykikunapa punta yuriq orqu wawantaqa Tayta Diospä rakiyanki.† Wäkaykikunapa punta kaq orqu wawanta ama arutsiyankitsu. Üshaykikunapa punta kaq orqu wawanpa millwantapis ama rutuyankitsu. 20 Tsay punta yuriqkunataqa Tayta Dios akranqan sitiuman apaykur cada wata llapan castaykikunawan sacrificiuta rupatsir paypa ñöpancho mikuyanki. 21 Weqruta, qaprata o imanpis däñashqa kaqtaqa Tayta Diospä sacrificiuta ama rurayankitsu. 22 Tsaypa trokinqa markaykikunallacho mikuyanki.