Pascua fiestata rurayänanpä ninqan
16
“Abib killacho Tayta Diosta adorar Pascua fiestata rurayanki.† Tsay killachömi Egiptupita Tayta Dios paqaspa jipiyämushurqayki. 2 Pascua fiestata rurar maychöpis adorayänaykipä akranqan sitiullacho Tayta Diospä sacrificiuta rupatsir wäkata, üshata o cabrata karpis pishtayanki. 3 Sacrificiupä pishtayanqayki uywapa aytsanta levadüraynaq tantatawan mikuyanki. Levadüraynaq tantata qanchis junaqyaq mikuyanki Egiptucho ñakayanqaykipita ras yarqamur mikuyanqaykinö. Tsaynöpami imaypis mana qonqaypa yarparäyanki Egiptupita yarqayämunqaykita. 4 Qamkuna täyanqayki entëru nacioncho tsay qanchis junaqkuna wayikikunacho ima levadürapis manami kanmantsu. Fiesta qallaykunan tardi sacrificiupä pishtayanqayki uywapa aytsantapis warayninpäqa ama katuyankitsu.5 “Tayta Dios rikatsishunaykipä kaq nacionman char llutallaqa maychöpis tsay Pascua fiestapä sacrificiu mikuyta ama rurayankitsu. 6 Tsaytaqa Tayta Diosta adorayänaykipä akranqan sitiullacho rurayanki. Rupay jeqaykanqan höra uywata pishtar Pascua sacrificiuta rupatsiyanki. Tsay hörami Egiptupita yarqayämurqayki. 7 Sacrificiupä pishtayanqayki aytsataqa Tayta Dios akranqan sitiullacho kankaskir mikuyanki. Waraynin tuta itsanqa wayikikunaman kutikuyanki.
8 “Tsaypita soqta junaqyaq levadüraynaq tantata mikuyanki. Qanchis kaq junaqchöqa Tayta Diosta adorar llapayki qorikäyanki. Tsay junaqqa ama aruyankitsu.
Semäna fiestata rurayänanpä ninqan
9 “Tsaki mikuy cosëchata qallaykuyanqaykipita qanchis semäna päsaskiptin 10 Semäna fiestata† Tayta Diosta adorar rurayanki. Bendicionninta churamunqanpitami Tayta Dios akranqan sitiuman voluntänikikunapita ofrendata apayanki. 11 Tsaycho tsurikikunawan, wätaynikikunawan, markaykicho taq levitakunawan, jäpa runakunawan, waktsakunawan y viüdakunawan qorikar Tayta Diospa ñöpancho fiestata rurar kushikuyanki. 12 Egiptucho wätay kayanqaykita yarpar kay tantiyatsinqäkunata llapanta cumpliyay.
Ramäda fiestata rurayänanpä ninqan
13 “Trïgu cosëchata y üva cosëchata ushaskir qanchis junaqyaq Ramäda fiestata rurayanki.† 14 Fiestata rurar kushikuyanki tsurikikunawan, wätaynikikunawan, levitakunawan, jäpa runakunawan, waktsakunawan y markaykicho taq viüdakunawanpis. 15 Tsay fiestataqa akranqan sitiullacho qanchis junaqyaq Tayta Diosta adorar rurayanki. Llapanchöpis Tayta Dios bendicionta churaykämuptinqa llapan shonquykikunawan kushikuyanki.
16 “Tsay kimsa fiestakunapämi cada watacho kimsa kuti llapan ollqu kaqkuna Tayta Dios akranqan sitiuman aywaykur paypa ñöpancho qorikäyanqa. Tsay fiestakunami kanqa Levadüraynaq Tanta Mikuna fiestaa, Semäna fiesta y Ramäda fiesta. Tsay fiestakunamanqa jinayllaqa manami pipis aywanqatsu, 17 tsaypa trokinqa Tayta Dios bendicionta churanqanpitami juknin jukninpis ofrendankunata apayanqa.
Juezkuna shumaq arreglayänanpä ninqan
18 “Tayta Dios rikatsiyäshunaykipä kaq markakunacho tar runakuna quejanakuyaptin shumaq tantiyaykur arreglayänanpä cada trïbupa juezninkunata y mandaqninkunata churayanki. 19 Juez karqa mayqanpapis janan mana shärir llapanta shumaq arreglayanki. Imaykayuqtapis muchuqtapis mana chaskipayllapa arreglayanki. Chaskipakuq juezqa manami shumaq arreglantsu, tsaypa trokinqa chaskipanqan runapa janan shärirmi runakuna alli yätsiyanqantapis chaskintsu.† 20 Tsaymi imaypis shumaq tantiyaykur pitapis arreglayanki. Tsaynöpami Tayta Dios rikatsiyäshunaykipä kaykaq nacioncho alli kawayanki.