2 “Tayta Dios ruranqan pactuta manakaqman churar rikatsiyäshunaykipä kaq markakunacho ollqupis o warmipis 3 juk dioskunata adorar qonqurikuptin o rupayta, killata o qoyllurkunata adoraptinqa 4 shumaq musyapakuyanki rasunpaypa adorayanqanta o mana adorayanqantapis musyayänaykipä. Israel nacioncho rasunpaypa tsaynö adorayanqanta musyarqa 5 tsay runata o warmita karpis markaykikuna yarqunancho saqmar wanutsiyanki.^†

6 “Tsaynö wanutsiyänaykipäqa ishkay o kimsa testïgukunarämi kanman. Manami juk testïgu ninqallanwanqa wanutsiyankimantsu.^† 7 Tsay testïgukunarämi warmita o runata karpis saqmar puntata qallaykuyanqa. Tsaypitanami llapan runakuna saqmayanqa. Tsaynöpami mana alli ruraykuna qamkunacho kanqatsu.^†

8 “Markaykicho alläpa aja arreglaypä problëmakunami kanqa runa mayinta wanutsinqanpita, runa mayinwan rimanakuyanqanpita o runa mayinwan pelyanqanpita. Tsaykunata arreglayta mana kamäpakurqa Tayta Dios akranqan sitiuman aywaykur 9 levita sacerdötikunata o juezta karpis tapukuyanki. Paykunami tantiyatsiyäshunki imanö arreglayänaykipäpis. 10 Kutiykur paykuna tantiyatsiyäshunqaykinölla arreglayanki. 11 Paykuna yätsiyäshunqaykinölla imatapis mana qonqaypa llapanta arreglayanki.

12 “Tayta Diosta sirviykaq sacerdöti o juez imanö arreglananpä ninqanta mana cäsukuq runataqa wanutsiyanki. Tsaynöpami llutan ruraq runakuna Israel nacioncho kayanqatsu. 13 Tsaynö wanutsiyanqanta musyaskirmi runakuna mantsapakur sacerdötikuna y juezkuna niyanqankunata cäsukuyanqa.

14 “Tayta Dios rikatsishunaykipä kaq nacioncho tar wakin nación runakunapa mandaqnin reykuna kayanqannö qamkunapis rey kananta capaz munayanki.^† 15 Tsaynö munarqa Tayta Dios akranqan Israel mayikita mandashuqniki rey kananpä churayanki. Jäpa runataqa ama churayankitsu.

16 “Tsay reyqa ama rantinqatsu atska cawallukunata ni Egiptumanpis ama kachakunqatsu cawallukuna rantimuq.^† Egiptuman mana kutinapämi Tayta Dios nirqan: ‘Egiptuman imaypis ama kutiyankitsu’. 17 Tsay reyqa manami atska warmiyuq kanmantsu.^† Atska warmiyuq karqa Tayta Diostapis qonqaykunmanmi. Ni qoritapis ni qellaytapis alläpa manami qorinmantsu.^†

18 “Rey kananpä yaykuskir kay ninqä leykunata liyinanpä levita sacerdötikuna tsararäyanqan röllupita juk rölluman copiatsinqa. 19 Tsay leykunatami reyqa qoyay qoyay liyinqa. Tsaynöpami Tayta Diospita mantsapakuyta yachakur llapan leyninkunata y estatütunkunata cäsukunqa. 20 Tsaynöpis marka mayinkunata manakaqman manami churanqatsu y ley ninqankunatapis manami qonqanqatsu. Tsaynö karqa kikinpis, tsurinkunapis y tsurinkunapita aywaraqkunapis Israel nacioncho imaypis reymi kayanqa.