Levitakunapa derëchun kananpä ninqan
18
“Sacerdötikunapa y llapan Leví trïbu runakunapapis manami chakrankuna kanqatsu. Tsaymi levitakunaqa Israel mayinkuna Tayta Diospä apayanqan sacrificiukunallawan y ofrendakunallawan kawayanqa. 2 Israel nacioncho chakrata chaskiyänanpa trokinqa paykunata awninqannömi kikin Tayta Dios herencian kanqa.†3 “Törukunata, carnishkunata y cabrakunata sacrificiupä apayanqanpitami sacerdötikunapa derëchun kanqa palitillan, quijädanwan cuwäjun. 4 Tsaynöllami paykunapä kanqa primiciata apayanqan trïgu, vïnu, aceiti y üshakunapa punta kaq rutuyanqan millwankuna. 5 Tsaynö chaskiyanqa imaypis sirviyänanpä Tayta Dios Israel trïbukunapita akranqanpitami.
6 “Mayqan levitapis tanqan markapita Tayta Dios akranqan sitiuman aywarqa 7 levita mayinkunanöllami Tayta Diosta tsaycho sirvinqa. 8 Mikuytapis wakinkuna chaskiyanqannöllami chaskinqa. Taytan kamaripanqan jananmanmi tsaykunata chaskinqa.
Mana alli costumbrikunata mana rurayänanpä ninqan
9 “Tayta Dios rikatsishunaykipä kaq nacionman chaykur tsaycho taq runakunapa mana alli costumbrinkunata ama yachakuyankitsu. 10 Mayqaykipis ama ollqu tsurikita ni warmi tsurikita sacrificiupä rupatsiyankitsu. Ama adivïnu ni brüju ni curiösupis kayankitsu.† 11 Majiquëru ni chaqchapakuqpis ama kayankitsu. Wanushqakunapa almanta mañakuq ni tapukuqpis ama kayankitsu. 12 Tsaynö ruraqkunaqa Tayta Diosta pasaypami ajanätsiyan. Yaykuyänaykipä kaq nacioncho taq runakuna tsaynö rurayanqanpitami Tayta Dios paykunata qarqur ushakätsinqa. 13 Qamkunaqa Tayta Dios munanqannö jutsaynaq kawayay.† 14 Yaykuyänaykipä nacioncho taq runakuna brüju y adivïnu kaptinpis tsaynö kayänaykita Tayta Dios manami munantsu.
Moiséspa trokin juk profëtata Tayta Dios churananpä ninqan
15 “Tayta Diosmi qamkunapita juk runata churanqa noqanö profëta kananpä. Payta cäsukuyanki.† 16 Yarpäyay Horeb jirkacho qorikaykur Tayta Diosta mañakur niyanqaykita: ‘Tayta Dios nina rupaykaqpita parlamunqanta wiyar pasaypami mantsariyä. Parlamunqanta wiyarqa wanuyäshächi’.†
17 “Tsaynö niyaptikimi Tayta Dios nimarqan: ‘Paykuna niyanqanqa allimi kaykan. 18 Tsaynö kaptinqa Israel mayinkunapitami juk runata churashä qamnö profëta kananpä. Willakuynïta shiminman churaptïmi llapan ninqäkunata willakunqa. 19 Jutïcho tsay profëta willakunqanta pipis mana cäsukuptinqa kikïmi juzgashä’.
20 “Mayqan runapis profëta tukurnin ‘Tayta Diospa jutinchömi willakuykä’ nir manakaqkunata willakuptin o juk dioskunapa jutincho willakuptinqa wanutsiyanki. 21 Tsaynö kaptinqa qamkuna capaz niyankiman: ‘¿Imanöpatä musyashwan juk runa willakunqan Tayta Diospita kanqanta o mana kanqantapis?’ 22 Juk willakuq runa ima päsananpä kanqanta Tayta Diospa jutincho willakuptinpis ninqannö mana päsaptinmi musyayanki Tayta Diospita mana kanqanta. Kikinpa yarpayllanpita willakunqanta tantiyar ama cäsupäyankitsu.