Amparakuyänan markakuna kananpä tantiyatsinqan
19
“Rikatsishunaykipä kaq nacioncho taq runakunata Tayta Dios ushakaskatsiptinmi paykunapa markankunacho y wayinkunacho qamkunana täyanki. 2 Tsay nacioncho tar kimsa markakunata akrayanki.† 3 Tsay markakunami kanqa runa mayinta wanutsiq runa qeshpir amparakunanpä. Kimsa markakunata akrayänaykipäqa Tayta Dios rikatsishunaykipä kaykaq nacionnikita kimsaman rakiyanki. Tsaypita cada particho juk markata akrayanki. Tsay markakunaman aywaq nänikunatapis shumaq allitsatsiyanki.4 “Mana contran kaykar wanutsiq runa amparakuyänan markaman qeshpiptinmi venganzata ashirpis payta wanutsinqatsu. 5 Juk runa yantata tseqtaykaptin jächan jipikaskir runata wanutsiptinqa amparakuyänan markamanmi qeshpir aywakunqa.
6 “Amparakuyänan markaqa manami alläpa karuchötsu kanman. Alläpa karu kaptinqa wanuq runapa castankuna ajanashqa taripaykurmi wanutsiyanqa. Mana yarpaypa wanutsiq runakunaqa manami wanutsishqatsu kanman. 7 Tsaynö mana wanutsiyänanpä kimsa markakunata akrayanki.
8-9 “Llapan tantiyatsinqä mandamientunkunata cumplir Tayta Diosta kuyar munanqannö imaypis kawayaptikimi unay castantsikkunata awninqannö nacionnikikunapa lindërunta jatunyätsinqa. Tsaynö jatunyätsiptinqa kimsa amparakuyänan markakuna kaykanqan jananman kimsa masta akrayanki. 10 Amparakuyänan markakuna soqta kaptinmi runa mayinta mana yarpaypa wanutsiq runa mayqan markamanpis qeshpinanpä cerca kanqa. Tsaynöpami Tayta Dios rikatsiyäshunaykipä kaq nacioncho tsay qeshpiq runata wanutsiyanqatsu. Payta wanutsirqa jutsayuqmi rikakuyanqa.
11 “Pipis runa mayinta chikirnin wanuskatsir amparakuyänan markaman qeshpiptinqa 12 markanpita mayor runakuna aywaykurmi tsay runata apatsiyämunqa. Nirkurmi wanuq runapa castankunaman wanutsiyänanpä entregayanqa. 13 Tsaynö runataqa mana kuyapaypa wanutsiyätsun. Tsaynöpami Israel nacioncho runakuna tantiyakur runa mayinta wanutsiyanqatsu. Wanutsikuq runa mana kaptinmi añaw kawayanki.
14 “Tayta Dios rikatsishunaykipä kaq nacioncho tar vecïnuykipa lindërunkunata respitayanki. Unay castaykikuna herencianta chaskir lindërupä churayanqan mujunninkunataqa ama wititsiyankitsu.†
Testïgukuna ishkay o kimsa kayänanpä ninqan
15 “Ishkay o kimsa testïgukuna shimpiyaptinrämi pipis jutsayuq kanqan musyakanqa. Runata wanutsinqanta o imatapis llutanta ruranqanta juk testïgulla shimpiptinqa manami välinqatsu.†
16 “Pipis chikirnin imatapis manakaqta tumpar shimpiptinqa 17 shimpiqninwan tumpaqninmi Tayta Diospa ñöpancho kaykaq sacerdötikunaman y juezkunaman aywayanqa. 18 Tsaychömi juezkuna shumaq musyapakuyanqa rasunta o manakaqta shimpinqanta musyayänanpä. Testïgu llullakunqanta musyaykurqa 19 tumpaqnin runa castigatsiyta yarpanqannöllami kikintapis castigayanqa. Tsaynöpami mana alli ruraykuna qamkunacho kanqatsu.† 20 Manakaqta tumpaq runata castigayanqanta musyarmi wakin runakunapis mantsapakur manakaqta pitapis tumpayanqanatsu.
21 “Jutsayuq kaqtaqa mana kuyapaypa castigayanki. Pipis runa mayinta wanutsiptinqa kikintapis wanutsiyanki. Ñawinta jipiptinqa kikinpa ñawintapis jipiyanki. Kirunta jipiptinqa kikinpa kiruntapis jipiyanki.† Makinta pakiptinqa kikinpa makintapis pakiyanki. Tsaynölla chakinta pakiptinqa kikinpa chakintapis pakiyanki.a