Guërrata imanö rurayänanpä ninqan
20
“Guërraman aywar contraykikunapa soldädunkuna, cawallunkuna y carrëtankuna atska kaptinpis ama mantsariyankitsu. Egiptupita jipimaqnintsik Tayta Diosmi paykunata vinciyänaykipä yanapayäshunki. 2 Guërracho pelyar qallaykuyänaykipäqa sacerdötimi llapan runakunata parlapar 3 ninqa: ‘Israel runakuna, wiyayämay. Contrayki soldädukunawan kanan junaq pelyar mana mantsariypa y mana qelanaypa pelyayay. 4 Qamkunawanmi Tayta Diosnintsik kaykan. Contraykikunawan kikin pelyarmi salvayäshunki’.5 “Sacerdöti tsaynö niptinmi mandaq runakunapis niyanqa: ‘Mayqaykipis wayi rurayta tsayrä ushashqa karqa wayikikunaman kutikuyay. Guërracho wanuyaptikiqa wayikicho juknami tanqa. 6 Mayqaykipis plantanqayki üvapa wayuyninta manarä pallarqa wayikikunaman kutikuyay. Guërracho wanuyaptikiqa üvaykipa wayuyninta juknami pallanqa. 7 Mayqaykipis majatsakänaykipä jipashwan parlashqa karqa wayikikunaman kutikuyay. Guërracho wanuyaptikiqa juknami tsay jipashwan majatsakanqa’.
8 “Tsaynö niskirmi mandaq runakuna yapay niyanqa: ‘Mayqaykipis mantsariywan llakikurqa wakin kaqkunapis mana mantsariyänanpä wayikikunaman kutikuyay’. 9 Mandaqkuna tsaynö parlayta ushaskirmi runakunapa puntanta guërraman aywayanqa.
10 “May markamanpis atacaq aywar paykunawanrä puntata parlayanki mana pelyayänaykipä. 11 Ninqaykita awnir markanman yaykuyänaykipä kachapäyäshuptikiqa paykunawan amana pelyayankitsu. Tsaypa trokinqa paykunata churayanki faenacho imaypis arupäyäshunaykipä. 12 Qamkunata mana cäsukuyäshurniki atacayäshunaykipä yarqayämuptinqa tsay markata jiruruypa tsapaskir juklla atacayanki. 13 Qamkunapa makikikunaman tsay markata Tayta Dios churamuptinqa tsaycho taq llapan ollqu kaqkunata espädawan wanutsiyanki. 14 Warmikunata, wamrakunata, uywakunata y imaykankunatapis kikikikunapäna apakuyanki. Tsay runakunapa mikuynintapis Tayta Dios kamaripaykäshuptikiqa apakuyanki.
15 “Manami yaykuyänaykipä nacioncho kaykaq markakunata tsaynö rurayänaykipätsu nikä, sinöqa mas karucho kaykaq markakunata tsaynö rurayänaykipämi. 16 Tayta Dios rikatsiyäshunaykipä kaykaq nacionman yaykurqa pitapis kawaykaqta ama jaqiyankitsu. 17 Tsaypa trokinqa Tayta Dios niyäshunqaykinölla heteo, amorreo, cananeo, ferezeo, heveo y jebuseo runakunata llapanta ushakätsiyanki. 18 Mana ushakätsiyaptikiqa diosninkunata adorar llutanta rurayänaykipämi inkitayäshunki. Tsaynö rurarqa Tayta Diosnintsiktami pasaypa ajanätsiyanki.†
19 “May markatapis pelyayänaykipä atska killa atacarqa wayuq jachakunata ama mutuyankitsu. Tsay jachakunata mutuyaptikiqa wayuyninta mikuyänaykipä manami kanqatsu. Jachakunaqa manami runatsu kaykan atacayäshunaykipä. 20 Mana wayuq jachakunatami itsanqa escalërakunata ruraskir markaman pelyaq yaykuyänaykipä mutuyanki.