Pï wanutsinqanta mana musyar imanö rurayänanpäpis ninqan
21
“Tayta Dios rikatsishunaykipä kaykaq nacioncho taykar maychöpis ayata tarir y pï wanutsinqantapis mana musyarqa 2 mayor runakunata y juezkunata willayanki rikaq aywayänanpä. Paykuna aywarmi aya jitaraykanqanpita mayqan marka mas cerca kanqantapis tantiyayanqa. 3 Nirkurmi cercan markacho taq mayor runakunata willayanqa manarä aruq ternërata akraskir 4 imaypis manarä yapyashqa ni murushqa yakuyuq chakraman apayänanpä. Tsay chakrachöna ternërapa kunkanta pakiyanqa.5 “Tsaymanmi levita sacerdötikunapis aywayanqa. Paykunatami Tayta Dios akrashqa payta sirviyänanpä y jutincho runakunata bendisayänanpä. Tsaynöllami paykuna kaykäyan runakuna rimanakuyaptin o imapis kaptin arreglayänanpä.
6 “Tsaypitanami aya jitaraykaq cercan markacho taq mayor runakuna kunkan pakishqa ternërapa jananman kamaykur makinkunata mayllakuyanqa. 7 Mayllakurmi niyanqa: ‘Noqakunaqa manami tsay runata wanutsiyashqätsu. Manami ni pï wanutsinqantapis rikayashqätsu. 8 Tayta Dios, runata kaycho wanutsinqanpita Israel runakunata perdonaykullay. Egiptupita jipiyämanqayki runakuna kaykäyaptïqa tsay runa wanunqanpita ama tumpayämaytsu’. Tsaynö rugakuyaptinqa tsaycho taq runakunata Tayta Dios manami castiganqatsu. 9 Tayta Dios munanqannö rurarqa runa tsaycho wanunqanpita manami jutsayuqtsu kayanki.
Guërrapita prësu apayämunqan warmipä ninqan
10 “Aybësis cäsu kanmanmi contrayki runakunawan guërrata rurayaptiki Tayta Dios makikikunaman churamunqan prësukunacho 11 kuyayllapä jipashta rikayanqayki. Warmikipä munarqa 12 wayikiman apayanki. Tsaychöna aqtsanta qalla putuypa rututsinki y shilluntapis rututsinki. 13 Tsaynölla jatiranqan latsapanta trukatsiyanki. Tsaypita taytanpä mamanpä llakikur juk killa lütuskiptinrä tsay jipashwan majatsakäyanki. 14 Majatsakäyanqaykipitarä tsay jipash mana gustashuptikiqa libri aywakunanpä kachaykuyanki. Warmikina kashqa kaptinqa manami rantikuyankimantsu ni wätayniki kananpäpis quëdatsikuyankimantsu.
Mayor tsurinpa derëchun kananpä ninqan
15 “Pï runapis ishkay warmiyuq kar yanqalla kuyanqan warmicho mayor tsurin kaptinqa 16 tsay tsurintami mayor kay derëchunta entreganqa. Mana mayor kaqtaqa kuyanqan kaq warmipa wawan kaptinpis manami mayor kay derëchunta entreganqatsu. 17 Tsaynö mana kananpämi mana kuyanqan warmipa wawan kaptinpis mayor kay derëchunta entreganqa. Tsay derëchunta chaskirqa wakin wawqinkuna chaskiyanqanpita ishkay kuti mastami chaskinqa.
Mana cäsukuq tsurinkunata wanutsiyänanpä ninqan
18 “Pipapis tsurin mana cäsukuq, mana wiyakuq, yätsiptinpis mana chaskikuq y castigaptinpis mana wanakuq kaptinqa 19 taytanwan maman marka yaykunacho qorikaq mayor runakunaman apayätsun. 20 Chaykatsirmi mayor runakunata niyanqa: ‘Kay wamräkunaqa manami wiyayämantsu ni cäsukayämantsu. Tsaynöpis llutan ruraykunaman y upyallaman churakashqami kakun’. 21 Tsaynö niyaptinmi markacho taq llapan runakuna qorikaskir saqmaypa tsay chöluta wanutsiyanqa. Israel nacioncho tsay niraq runakunata tsaynö illakätsiyanqaykita musyarmi llutankunata pipis ruranqanatsu.
Wakin leykuna imanö kanqanpis
22 “Jutsata ruranqanpita autoridäkuna pitapis wanuskatsir qeruman warkutsiyanqancho 23 ama warätsiyätsuntsu. Runapa ayan qerucho warkaraptinqa tsay runa maldicionashqami kanqa.† Tsaynö kaptinqa wanunqan junaqlla pampayanki. Warkaraykaqta warätsirqa Tayta Dios rikatsiyäshunaykipä kaykaq naciontami impüruyätsiyanki.