4 “Runa mayikipa ashnunta o wäkanta nänicho ishkishqata tarirqa jaqiskir ama aywakuyankitsu, tsaypa trokinqa yanapar shäritsiyanki.^†

5 “Warmikunaqa ollqupa latsapanta ama jatikuyanqatsu. Ollqukunapis warmipa latsapanta ama jatikuyanqatsu. Tsaynö rurarqa Tayta Diostami ajanätsiyan.

6 “Puriykäyanqaykicho pishqupa qeshunta jachacho o patsacho tarirqa runtullarä kaptinpis o pushapa kaptinpis mamantintaqa ama apakuyankitsu. 7 Tsaypa trokinqa mamanta qarquskir pushapallanta apakuyanki. Tsaynö rurarqa atska watami kushishqa kawayanki.

8 “Mushuq wayita shäritsirqa janancho taksha murällata tumaypa shäritsiyanki.^a Tsaynö ruraykaptikipis wayikikuna jananpita pipis wanuqpä jeqamuptinqa manami jutsayuqtsu kayanki.

9 “Üva rurinman ima mikuytapis ama muruyankitsu. Tsaynö mururqa tsay chakrapita llapan qoriyanqaykitami Tayta Diospä apayanki.

10 “Töruta ashnuwan yügurkur ama arutsiyankitsu.

11 “Millwapita y lïnupita awashqa latsapataqa ama jatikuyankitsu.^b

12 “Jatiräyanqayki tünicaykikunapa chuskun kuchunman jïlukunata churayanki.^†

13 “Pï runapis jipashwan majatsakaskir payta ajayarnin: 14 ‘Manami kay jipashta virgintatsu tarishqä’ nir tumpaptinqa 15 tsay jipash majatsakanqan paqas punuyanqan säbanastami mamanwan taytan apayanqa marka yaykunacho qorikaq mayor runakuna rikayänanpä. 16 Rikatsirmi jipashpa taytan ninqa: ‘Kay runatami tsurïta entregashqä warmin kananpä. Kananqa tsurïta ajayarmi kuyannatsu. 17 Tsaymi llullakurnin parlaykan: “Tsurikita manami virgintatsu tarishqä”. Tsaynö niptinpis kay säbanasta rikaykuyay tsurï rasunpaypa virgen kanqanta o mana kanqantapis’.

“Tsaynö nirmi tsay jipash majatsakar pununqan säbanasta yawarllatana mayor runakunata rikatsinqa. 18 Tsaynö rikatsiptinmi jipashpa runanta prësu tsariskir castigayanqa. 19 Tsaynöllami Israel jipashta desonranqanpita honorninta juk pachak (100) qellayta pägatsiyanqa. Tsay qellayta jipashpa taytanta entregaykurmi mana rakikaypa tsay jipashwan wanunqanyaq tanqa.

20 “Runan ninqannö tsay jipash manarä majatsakar juk runawan punushqana kaptinqa 21 taytanpa wayi punkunman jipiskirmi saqmaypa wanutsiyanqa. Tsaynö wanutsiyanqa Israel nacioncho llutanta ruranqanpita y manarä majatsakar juk runawan punur taytanta penqakuyman churanqanpitami. Tsaynöpami mana alli ruraykuna qamkunacho kanqatsu.^†

22 “Pï runatapis runayuq warmiwan punuykaqta tarirqa ishkanta wanutsiyanki. Tsaynöpami mana alli ruraykuna Israel nacioncho kanqatsu.

23 “Mayqan jipashpis virgen kaykar runawan majatsakänanpä parlashqana kaykaptin markacho tinkuskir juk runa tsay jipashta fuerzaptinqa 24 ishkantami marka yaykuna punkuman apaykur saqmaypa wanutsiyanki. ^† Tsay jipashta wanutsiyanki markacho kaykar ausiliuta mana mañakunqanpita. Tsay runatana wanutsiyanki parlakushqana kaykaptin fuerzanqanpita. Tsaynöpami mana alli ruraykuna qamkunacho kanqatsu.^†

25 “Majatsakänanpä jipash parlakushqana kaykaptin jäkuqcho tinkuskir mayqan chölupis fuerzaptinqa tsay chölullatanami wanutsiyanki. 26 Jipashtaqa ama wanutsiyankitsu. Payqa manami jutsayuqtsu wanutsishqa kananpä. Tsay runaqa illaqpita juk runata wanutsiqnömi tsay jipashtapis illaqpita fuerzashqa. 27 Jipashta jäkuqcho fuerzaptin ausiliuta mañakur qayaraptinpis manami pipis wiyanmantsu karqan.

28 “Piwanpis majatsakänanpä manarä parlakushqa virgen jipashta mayqan chölupis fuerzanqan musyakaptinqa 29 jipashpa taytantami tsay runa päganqa pitsqa chunka (50) qellayta. Tsaynöllami desonranqanpita tsay jipashwan majatsakaskir mana rakikaypana wanunqanyaq tanqa.^†

30 (23.1) “Pipis manami mädistanwan kakunmantsu. Mädistanwan kakurqa taytantami manakaqman churaykan.^†