2 (3) “Tayta Diosta adorayänaykipä qorikäyanqaykimanqa manami wachapakuy runakuna yaykuyanmantsu. Tsurinkuna ni willkankuna ni paykunapita aywaraqkunapis chunka generación kanqanyaq manami yaykuyanmantsu.

3 (4) “Tayta Diosta adorayänaykipä qorikäyanqaykimanqa amonita runakuna ni moabita runakunapis manami yaykuyanmantsu. Tsurinkuna ni willkankunapis ni paykunapita aywaraqkunapis chunka generación kanqanyaq manami yaykuyanmantsu. 4 (5) Amonita runakuna y moabita runakunaqa Egiptupita aywakamur nacionninpa päsamushqa manami yakuta ni mikuytapis qaramarqantsiktsu. Tsaypa trokinqa maldicionamänantsikpämi Mesopotamiacho kaykaq Petor markapita Beorpa tsurin Balaamta qayatsiyämurqan. 5 (6) Tsaynö qayatsimuptinpis Balaam mañakunqanta Tayta Dios manami cäsuparqantsu. Tsaymi Balaam maldicionamashqapis Tayta Dios kuyamarnintsik tsay maldicionta bendicionman tikraratsirqan. 6 (7) Amonita y moabita runakunataqa imaypis ama kuyapäyankitsu ni imachöpis ama yanapayankitsu.

7 (8) “Tsaynö kaptinpis edomita runakunata ama chikiyankitsu. Paykunaqa castaykikunami kaykäyan. Tsaynölla Egipto runakunatapis ama chikiyankitsu. Paykunapa markanchömi atska wata täyashqayki. 8 (9) Qamkunacho taq edomita runakunapa y Egipto runakunapa willkankunami itsanqa Tayta Diosta adorayänanpä qorikäyanqaykiman yaykayämunqa.

9 (10) “Guërraman aywar imatapis impüru kaqtaqa ama rurayankitsu. 10 (11) Mayqan runapapis punuykaptin lichin jutuptinqa impüru karmi campamentupita yarquskir tsay junaq yaykunqatsu. 11 (12) Tsay tardi mayllakuskirmi rupay jeqaykaptinrä campamentuman yapay yaykunqa.

12 (13) “Campamentupita juklächo juk sitiu katsun tsaycho ishpakuyänaykipä. 13 (14) Cada ünü estäcata puritsiyanki tsaywan patsata uchkuskir ishpakuyänaykipä. Ishpakuskirna allpawan tsapayanki. 14 (15) Tsaynöpami campamentuykikuna limpiu kanqa kikin Tayta Dios campamentucho qamkunawan kaptin. Paymi campamentucho kaykan contraykikunawan pelyayaptiki yanapashunaykipä. Tsaymi qanrata mana rikananpä campamentuykita limpiu sagräduta tsararäyanki. Qanrata rikarqa jaqiskiyäshurnikimi aywakunqa.

15 (16) “Juk wätay patronninpita qeshpimur nacionnikiman amparakamuptinqa patronninman ama kutitsiyankitsu. 16 (17) Tsaypa trokinqa may markachöpis munanqancho täkunanpä kachaykuyanki. Paytaqa pipis ama ñakatsitsuntsu.

17 (18) “Wakin nacionkunacho diosninkunata adorar jukwan jukwan kakuyaptinpis Israelchöqa warmipis ni ollqupis tsaykunata ama rurayanqatsu. 18 (19) Tsaynö rurar gänapakuyanqan qellaytaqa Tayta Diospa wayinman ama apayanqatsu. Tsaynöpis tsay qellaytaqa awniyanqan ofrendapäpis ama churayanqatsu. Tsaynö ruraqkunaqa Tayta Diosta pasaypami ajanätsiyan.

19 (20) “Qellayta, mikuyta o imata karpis Israel mayikita mañarqa qellaypa wachayninta ama cobrayankitsu. 20 (21) Mañayanqayki qellaypa wachaynintaqa jäpa runakunallatami cobrayanki. Israel mayikitaqa ama cobrayankitsu. Tsaynöpami täyänaykipä kaykaq nacionman chäyaptiki ima aruyanqaykimanpis Tayta Dios bendicionninta churamunqa.

21 (22) “Tayta Diosta imatapis awnirqa imaykanöpapis mana qonqaypa cumpliyanki. Mana cumpliyaptikiqa Tayta Diosmi juzgayäshunki. 22 (23) Imatapis mana awnirqa manami jutsayuqtsu kayanki. 23 (24) Tsaynö kaptinpis voluntänikipita Tayta Diosta imatapis awnirqa mana qonqaypa cumpliyanki.

24 (25) “Pipa üva chakranpapis päsar üvata munaparqa jimayanqaykiyaq mikuyanki. Itsanqa wayikikunapa apakuyänaykipäqa ama pallayankitsu. 25 (26) Tsaynölla pipa trïgu chakranpa päsarpis uchuyänaykipä tinkulla pallayanki. Ösiwanqa ama achuyankitsu.