5 “Warmiwan tsayrä majatsakashqa runataqa guërraman ama kachayankitsu ni ima autoridä kananpäpis ama churayankitsu. Juk watayaqmi libri kanqa warminwan kushishqa shumaq kawayänanpä.

6 “Pipa tuñayninta ni maraynintapis prenda ama apakuyankitsu. Tsaykunata prenda apakuptikiqa aqakunanpä mana kaptin mikunanpäpis manami kanqatsu.

7 “Pipis Israel mayinta wätayninpä o rantikunanpä suwaptinqa tsay runata wanutsiyanki.^† Tsaynöpami Israel nacioncho tsay niraq runakunata ushakätsiyanki.^†

8 “Pitapis lepra tsariptinqa levita sacerdötikunamanmi rikayänanpä aywanqa. Paykunaqa musyayanmi leprapita llapan ninqäkunata. Tsaynö kaykaptinqa lepra tsarishuptiki imatapis ruranaykipä niyäshunqaykita llapanta cumpliyanki.^† 9 Ama qonqäyankitsu Egiptupita shamuykashqa Maríata Tayta Dios leprawan castiganqanta.^†

10 “Runa mayikita qellayta mañarqa imantapis prenda tsariyänaykipä wayinman ama yaykuyankitsu. 11 Yaykuyänaykipa trokinqa wayi punkullancho shuyaräyanki prendata kikin aptatsiyäshunqaykiyaq. 12 Muchuq kar punchunta o jakunta prenda churamuptinqa waraynin junaqyaq ama tsararäyankitsu. 13 Tsaypa trokinqa tsay tardilla kutitsiyanki qatakurkur punukunanpä. Tayta Dios munanqanta tsaynö rurayaptikimi agradëcikushurniki payta mañakunqa bendisaykushunaykipä.^†

14 “Markaykicho taq Israel mayiki o jäpa runa kaptinpis muchuq kar arupäyäshuptiki ama engañayankitsu ni päguntapis shuyätsiyankitsu. 15 Tsay tardilla pägayanki mikuyninta rantipakunanpä. Mana pägaptikiqa Tayta Diosta quejakuptinmi castigayäshunki.^†

16 “Tsurinpa jutsanpita ama mamanta ni taytanta wanutsiyankitsu. Tsaynöpis mamanpa o taytanpa jutsanpita tsurinta ama wanutsiyankitsu. Tsaypa trokinqa jutsa ruraq kaqta wanutsiyanki.^†

17 “Jäpa o waktsa kaptinpis llapan runakunata shumaq arreglayanki. Viüdakunapa latsapantapis prenda ama tsarikuyankitsu. 18 Ama qonqäyaytsu qamkunapis Egiptucho wätay kar ñakaykäyanqaykipita Tayta Dios jipiyämushunqaykita. Tsaymi qamkunata yätsiykä imanö kaptinpis llapan runakunata shumaq arreglayänaykipä.^†

19 “Trïgu cosëchacho juk manöjuta qonqaskir qoriq ama kutiyankitsu. Tsaytaqa jaqiykuyanki markaykicho taykaq jäpa runakunapä, waktsakunapä y viüdakunapä. Tsaynö rurayaptikimi ima aruyanqaykimanpis Tayta Dios bendicionninta churamunqa. 20 Aceitünasta pallarpis ashi ashiykurqa ama pallayankitsu. Quëdaq kaqqa kanqa jäpa runakunapä, waktsakunapä y viüdakunapämi. 21 Üvata pallarpis ashi ashiykurqa ama qoriyankitsu. Quëdaq kaqtaqa markaykikunacho taq jäpa runakunapä, waktsakunapä y viüdakunapänami jaqiyanki.^† 22 Egiptucho wätay kayanqaykita ama qonqäyaytsu. Tsaymi kanan nï jäpa runakunata, waktsakunata y viüdakunata kuyapäyänaykipä.