25
“Piwanpis rimanakurqa autoridäman ishkan aywayätsun. Autoridäkunami jutsaynaq kaqta kacharir jutsayuq kaqta castiganqa. 2 Asutashqa kananpä kaptinqa pampaman lätaykatsirmi jutsata ruranqanman tupu juez asutatsinqa. 3 Ima kaptinpis chusku chunka (40) kutipita mastaqa ama asutayankitsu.† Alläpa asutayaptikiqa tsay runa mayiki penqakuypämi kanqa.4 “Ëracho trïguta trillar töruta ama shenqawayankitsu.†
5 “Tsay wawqilla juk wayicho taykaptin wawqin tsuriynaq wanuptinqa wawqinmi llumtsuyninwan tanqa. Tsaynöpami wawqinpa viüdanwan tänanpä kaykaq leyta cumplinqa. Tsay viüda manami juk runawanqa majatsakanmantsu. 6 Tsay viüdacho punta kaq tsurinmi wanuq wawqinpa jutinta aparanqa. Tsaynöpami wanushqa wawqinpa jutin Israelcho qonqakanqatsu.†
7 “Tsay runa majatsakayta mana munaptinqa viüda llumtsuyninmi marka punkuman aywar mayor runakunaman quejakunqa. Tsaychönami ninqa: ‘Cuñädü manami munantsu wawqinpa jutin Israel nacioncho aywaränanta. Manami munantsu ley ninqannö noqawan majatsakayta’. 8 Tsaymi mayor runakuna qayaykatsir cuñädunta niyanqa: ‘Llumtsuyniki viüdawan majatsakay’. Tsaynö niyaptinpis majatsakayta mana munaptinqa 9 llumtsuynin viüdami mayor runakunapa ñöpancho cuñädunpa llanqinta jipiskatsir qaqllanman toqapaykur ninqa: ‘Wawqinpa jutin aywaränanta mana munaqtaqa pï runatapis kaynömi rurantsik’. 10 Tsaynö ruranqanpitami tsay runata y paypita aywaraqkunatapis ‘qara chakikuna’ niyanqa.
11 “Ishkaq runakuna pelyaykaptin jukninpa warmin chaykur runanta washarnin contranpa runtunta aptakurkuptinqa 12 tsay warmipa makinta mana kuyapaypa roquyanki.
13 “Imata rantirpis o imata rantikurpis balanzaykikunawan ama engañayankitsu. 14 Tsaynölla tupuykipis complëtu kanqa. 15 Balanzayki exactu kaptin y tupuykipis complëtu kaptinqa Tayta Dios rikatsishunaykipä kaykaq nacionchöpis atska watami alli kawayanki. 16 Balanzawan y tupukunawan suwakuptikiqa Tayta Diosmi pasaypa ajanan.†
Amalecita runakunata ushakätsiyänanpä ninqan
17 “Qamkuna ama qonqäyaytsu Egiptupita shamuykäyaptiki amalecita runakuna contraykikuna kayanqanta. 18 Yarpäyay pishipashqa kaykäyaptiki taripaykuyäshurniki qepacho kaykaq runakunata atacayanqanta. Amalecita runakunaqa Tayta Diospita mana mantsapakuypami tsaynö atacayäshurqayki. 19 Rikatsiyäshunaykipä kaykaq nacioncho contraykikunata ushakätsiyänaykipä Tayta Dios yanapayäshuptiki amalecita runakunatapis mana qonqaypa ushakätsiyanki.†