Punta poquq cosëchapita apayänanpä ninqan
26
“Tayta Dios rikatsishunaykipä kaq nacionman yaykur tsaycho tar 2 muruyanqaykipita punta poquqta canastawan apayanki Tayta Diosta adorayänaykipä akranqan sitiuman. Tsayqa primiciami kanqa.† 3 Tsayman chaykurmi tsaycho kaq sacerdötita niyanki: ‘Unay castantsikta awninqanta cumplirmi kay nacionta Tayta Dios rikatsimarqantsik. Tsaymi kay primiciata apamushqä’. 4 Tsaynö niyaptikimi sacerdötiqa canastata chaskiskishurniki Tayta Diospa altarnin ñöpanman churanqa.5 “Churaykuptinnami Tayta Diospa ñöpancho niyanki: ‘Unay castantsikkunaqa kayläpa wakläpa purikuq arameo runakunami kayarqan. Tsaynö puriykäyanqanchömi Egiptuman aywakur atskaman mirayarqan jatun nación rikakuyänanyaq. 6 Tsaychömi Egipto runakuna pasaypa ñakatsimarnintsik maqa maqarkur arutsimarqantsik. 7 Tsaymi unay castantsikkuna yärakuyanqan Tayta Diosta mañakurqantsik kuyapämänantsikpä. Mañakunqantsikta wiyarmi rikamarqantsik alläpa arunqantsikta y ñakanqantsiktapis. 8 Tsaymi Egipto runakunata mantsakaypä castigar munayninwan Tayta Dios jipimarqantsik. 9 Nirkurmi kay nacionman pushamarqantsik atska lichipis abëjapa mishkinpis kanqanman. 10 Tsaymi kananqa Tayta Dios rikatsimanqantsik chakrakunapita primiciata apamushqä’.
“Tsaynö nir canastata aptarkur altar ñöpanman yapay churaykur Tayta Diospa ñöpanman qonqurikuyanki. 11 Tsaypitanami qamta y castaykikunata Tayta Dios yanapayäshunqaykipita kushikur fiestata rurayanki. Fiestata rurar markaykicho taq levitakunata y jäpa runakunatapis qayatsiyanki.
Diezmuta apayänanpä ninqan
12 “Cada kimsa watacho llapan muruyanqaykipita diezmuta qarayanki markaykicho taq levitakunata, jäpa runakunata, waktsakunata y viüdakunata. Tsaynöpami markaykicho pipis mallaqpä kanqatsu.† 13 Paykunata qaraskir Tayta Diosta mañakur niyanki:
“ ‘Nimanqaykinöllami wayïpita apaykur levitakunata, jäpakunata, waktsakunata y viüdakunata qaranäpä kaqta qarashqä. Imatapis mana qonqaypami llapan ninqaykikunata cumplishqä. 14 Wanupakurpis impüru karpis tsay rakinqä diezmutaqa manami mikushqätsu. Wanushqakunapäpis tsaykunataqa manami churashqätsu. Tayta Dios, nimanqaykitaqa llapantami rurashqä. 15 Kananqa ciëlucho templuykipita patsa llapan Israel runakunaman y rikatsimanqayki nacionmanpis bendicionnikita churaykallämuy. Unay castäkunata awninqaykinöllami yakunörä atska lichipis abëjapa mishkinpis kanqan nacionta kamaripäyämashqayki’.
Israel runakuna Tayta Diosta imaypis cäsukuyänanpä yätsinqan
16 “Kanan junaqmi estatütunkunata y leyninkunata cumpliyänaykipä Tayta Dios nikäyäshunki. Tsaynö kaykaptinqa llapan shonquykikunawan y voluntänikikunawan cumpliyay. 17 Kananmi niyashqayki Tayta Diosman yärakur y pay munanqannö kawar estatütunkunata, mandamientunkunata y leyninkunata imaypis cumpliyänaykipä kanqanta. 18 Tayta Dios awniyäshunqaykinöllami kuyanqan runakuna kayanqaykita kanan junaq niyäshushqayki.† Tsaynö kaykaptinqa llapan mandamientunkunata cumpliyay. 19 Llapan mandamientunta cumpliyaptikiqa Tayta Diosmi yanapayäshunki llapan nacionkunapitapis mas respitashqa y reqishqa kayänaykipä. Tsaymi awniyäshunqaykinölla kuyanqan sagrädu nación kayanki”.