Ebal jirkacho wanka rumikunata ichiykatsir altarta pirqayänanpä ninqan
27
Tsaymi llapan runakunata Moisés y Israel mayor runakuna niyarqan: “Kanan willanqä mandamientukunata llapanta cumpliyay. 2 Jordán mayuta tsimpar Tayta Dios rikatsishunaykipä kaq nacionman chaykur jatusaq wanka rumikunata jawiykur iskuwan lashtayanki. 3 Tsay rumikunaman qellqayanki tantiyatsinqä llapan leykunata. Tsaynö qellqayanki unay castantsikkunata Tayta Dios awninqan nacionman yaykur. Tsaychöqa lichipis abëjapa mishkinpis yakunörämi atska kaykan. 4 Tsay wanka rumikunataqa Jordán mayuta tsimpaskir Ebal jirkaman jawiyanki. Kanan junaq ninqänölla tsay rumikunata iskuwan lashtayanki.5 “Tsaynölla Tayta Diospä altarta tsaycho pirqayanki. Tsay altartaqa manami llaqllashqa rumikunawantsu pirqayanki, tsaypa trokinqa llaqllanni rumikunallawanmi.† 6 Llaqllanni rumikunawan altarta pirqaskirmi rupatsina sacrificiuta Tayta Diospä tsaycho rupatsiyanki. 7 Tsaynölla tsay altarcho alli päsakuy sacrificiuta rupatsir llapayki Tayta Diospa ñöpancho kushishqa mikuyanki. 8 Tsay wanka rumikunaman llapan ninqä leykunata shumaq qellqayanki”.†
9 Tsaypitanami levita sacerdötikunawan Moisés Israel mayinkunata niyarqan: “Israel runakuna, shumaq wiyayämay. Kanan junaqpitaqa Tayta Dios akranqan runakunami kaykäyanki. 10 Tsaynö kaykarqa Tayta Diosta cäsukur kanan tantiyatsinqä llapan mandamientunkunata y estatütunkunata cumpliyay”.
Mana cäsukuq runakunapä maldición imanö kananpä kanqan
11 Tsay junaqmi Israel runakunata Moisés nirqan: 12 “Jordán mayuta tsimpaskir Simeón trïbu runakuna, Leví trïbu runakuna, Judá trïbu runakuna, Isacar trïbu runakuna, José trïbu runakuna y Benjamín trïbu runakunapis Gerizim jirkaman witsäyanqa. Tsaypitami niyämunqa Israel runakuna Tayta Diosta cäsukur bendicionta chaskiyänanpä kanqanta.†
13 “Ebal jirkamannami witsäyanqa Rubén trïbu runakuna, Gad trïbu runakuna, Aser trïbu runakuna, Zabulón trïbu runakuna, Dan trïbu runakuna y Neftalí trïbu runakuna. Paykunami tsaypita niyämunqa Israel runakuna Tayta Diosta mana cäsukur maldicionta chaskiyänanpä kanqanta.
14 “Levitakunanami llapan Israel runakuna wiyayänanpä jinchi niyämunqa: 15 ‘Pipis fiërruta tsulluskatsir o qeruta llaqllaypa ïduluta rurar pakayllapapis adoraq kaqqa maldicionashqami kanqa.† Tsaynö ruraqkunaqa Tayta Diostami ajanätsiyan’. Tsaymi llapan runakuna niyanqa: ‘¡Niyanqaykinö katsun!’
16 “ ‘Pipis mamanta o taytanta mana respitaq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
17 “ ‘Runa mayinpa chakranta qechuyta munar mujunninta wititsiq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
18 “ ‘Nänipa qapra alli aywakuykaqta llutanpa pantakätsiq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
19 “ ‘Jäpa runakunata, waktsakunata y viüdakunata chikiq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
20 “ ‘Pipis taytanta penqakuyman churar mädistanwan kakuq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
21 “ ‘Ima uywawanpis kakuq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
22 “ ‘Tsay mamallapita o tsay taytallapita paninwan kakuq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
23 “ ‘Pipis suegranwan kakuq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
24 “ ‘Traicionpa runa mayinta wanutsiq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’
25 “ ‘Wanutsinanpä päguta chaskipakur jutsaynaq runata wanutsiq kaqqa maldicionashqami kanqa’. Tsaymi llapan runakuna niyanqa: ‘¡Niyanqaykinö katsun!’
26 “ ‘Kay willanqä leykunata mana cumpliq kaqqa maldicionashqami kanqa’.† Tsaymi llapan runakuna niyanqa: ‘¡Niyanqaykinö katsun!’