7 “Contraykikunata vinciyänaykipäpis Tayta Diosmi yanapayäshunki. Tsaymi atacayäshunaykipä juk nänipa shamurpis qanchis nänipa mashtakaypa mashtakar qeshpiyanqa.

8 “Rikatsiyäshunaykipä kaq nacionman chäyaptiki tröjaykikunamanpis y llapan aruyanqaykimanpis Tayta Diosmi bendicionninta churamunqa.

9 “Mandamientunkunata cumplir pay munanqannö kawayaptikiqa awniyäshunqaykinöllami Tayta Dios kuyanqan santu runakuna imaypis kayanki. 10 Pay kuyanqan runakuna kayanqaykita musyarmi maytsay nacioncho taq runakunapis mantsayäshunki.

11 “Unay castantsikkunata awninqan nacionman chäyaptiki Tayta Diosmi bendicionninta churamunqa imaykaykikuna atska kananpä, tsurikikuna atskaq kananpä, chakraykikuna alli wayunanpä y uywaykikunapis atskaman mirayänanpä. 12 Mikuynikikuna alli wayunanpämi tiempullancho tamyatsimunqa. Llapan aruyanqaykikunamanpis bendicionnintami churamunqa. Tsaynöpami juklä nacionpita imatapis mañakayämunkitsu, tsaypa trokinqa paykunata mañayänaykipäpis kanqami.

13 “Mandamientunkunata kanan junaq tantiyatsinqäta chaskikur cumpliyaptikiqa wakin runakunata yanapanqanpitapis masmi qamkunata Tayta Dios yanapayäshunki. 14 Kanan junaq willanqä mandamientukunata mana qonqaypa cumplir juk dioskunata ama adorayankitsu ni respitayankitsu.

15 “Tayta Diosta mana cäsukur kanan junaq willanqä mandamientunkunata y estatütunkunata mana cumpliyaptikiqa maldicionmi chäyäshunki.

20 “Tayta Dios maldicionayäshuptikimi ima rurayanqaykipis kamakanqatsu ni rurakanqatsu. Payta mana cäsukur llutankunata rurayanqaykipitami manaräpis unayta llapaykikuna ushakäyanki. 21 Nacionnikiman yaykur herenciata chaskiyaptikipis tukuyläya qeshyakunawanmi Tayta Dios ushakätsiyäshunki. 22 Tsaymi fiyu qeshyawan, fiebriwan, qeri qeshyawan, alläpa usyawan, pasaypa rupapaywan y guërrawan ushakäyanqaykiyaq castigayäshunki. Llapan muruyanqaykikunamanpis tukuyläya qeshyakunatami kachamunqa. 23 Mana tamyamuptinmi chakrachöpis ni ima mikuy wayunqanatsu. 24 Llapayki ushakäyanqaykiyaqmi tamyatsimunanpa trokin Tayta Dios polvutawan uchpata ciëlupita shushutsimunqa.

25 “Contraykikuna vinciyäshunaykipäpis Tayta Diosmi yanapanqa. Tsaymi atacayänaykipä juk nänipa aywarpis qanchis nänipa mashtakaypa mashtakar qeshpiyanki. Llapan nación runakunapitapis kuyapaypämi kayanki. 26 Pipis wajakunanpä mana kaptinmi ayaykikunatapis wiskurkuna y munti uywakuna mikuyanqa.

27 “Egipto runakunata castiganqannömi Tayta Dios castigayäshunki tukuyläya qeriwan, chupuwan, qarachuwan y sheqshiwan. Tsay qeshya tsariyäshuptikiqa manami alliyäyankitsu. 28 Tayta Dios castigayäshuptikimi wakinniki löcuyäyanki, wakinniki qaprayäyanki y wakinniki pasaypa mantsakar ima ruraytapis kamäpakuyankitsu. 29 Qaprayashqa karmi junaqpapis tsakaypanö llamkaykachar puriyanki. Ima rurayanqaykipis manakaqllapami kanqa. Qoyay qoyaymi mana jamatsiypa arutsiyäshunki. Pipis janayki mana shäriptinmi suwakuna imaykitapis apakuyanqa.

30 “Majatsakäyänaykipä jipashwan parlashqana kaykaptikipis jukmi warminpä apakunqa. Wayita shäritsirpis manami täyankitsu. Üvata plantarpis wayuyninta manami mikuyankitsu. 31 Töruykita qechuyäshurniki puntaykicho pishtarpis manami aytsanta yawatsiyäshunkitsu. Ashnuykita apakurpis manami kutitsiyäshunkitsu. Üshaykita y cabraykita apakuptinpis manami pipis qechushiyäshunkitsu.

32 “Juk nacionpita shamurmi tsurikikunata ollqutapis warmitapis apakuyanqa. Qoyay qoyay tsurikikunapä pasaypa llakikurpis manami rikayankinatsu. 33 Mana reqiyanqayki jäpa runakuna shamur chakraykikunacho wayunqanta apakuyaptinmi aruyanqaykipis manakaqllapä kanqa. Qoyay qoyay mana kuyapaypa arutsiyäshuptikimi pasaypa ñakayanki. 34 Llapan tsay päsashunqaykikunata rikarmi löcuyäyanki. 35 Tayta Diosmi qonqurnikikunachöpis chankaykikunachöpis qeriwan qeshyatsiyäshunki. Tsaynöllami chaki puntaykipita uma jirkaykiyaq qeri ushayäshunki. Tsay qerita imawan jampirpis manami alliyäyankitsu.

36 “Nacionnikipita Tayta Dios qarqushuptikimi qamkunatapis y mandayäshuqniki reytapis karu nacionman prësu apayäshunki. Tsay naciontaqa manami qamkunapis ni unay castantsikkunapis reqiyarqantsu. Tsaychömi qerupita y rumipita rurashqa ïdulukunallata adorayanki.^† 37 Tsaynö desgracia päsayäshuptikimi tsay karu markakunacho taq runakuna mantsakashqa rikapäyäshunki. Llapanpis asipäyäshurnikimi manakaqman churayäshunki.

38 “Atskata mururpis chukllushkuna ushaptinmi wallkallatana qoriyanki. 39 Üvata plantar shumaq uryapaykäyaptikipis kurukuna ushaptinmi imatapis cosechayankitsu ni vïnuntapis upuyankitsu. 40 Täyanqaykicho olïvus jachakuna tsaytsika kaptinpis aceitünas manarä poqur shushuptinmi aceitinwan llushikuyänaykipäpis kanqatsu. 41 Ollqutapis warmitapis tsurikikunata karu markakunapa apakuyaptin manami mayqanpis ñöpaykikunacho kanqatsu. 42 Plantayanqayki jachakunata y muruyanqayki mikuykunatapis chukllushkunami llapanta ushayanqa.

43 “Markaykicho taq jäpa runakuna imaykayuq rikakuyaptinmi qamkunaqa imaynaq rikakuyanki. 44 Tsay jäpa runakuna mañayäshunaykipä kaptinpis qamkunapaqa manami paykunata mañayänaykipä imaykikunapis kanqatsu. Paykunami respitashqa runakuna kayanqa. Qamkunaqa imapäpis mana cuentashqami kayanki.

45 “Tayta Dios ninqankunata mana wiyakur willanqä mandamientunkunata y estatütunkunata mana cäsukuyaptikimi ushakäyanqaykiyaq llapan tsay desgraciakuna päsayäshunki. 46 Tsayta rikarmi pïmaypis tantiyakunqa qamkunaman y tsurikikunaman maldición imaypis chämunqanta. 47 Tayta Dios yanapaykäyäshuptikipis qamkunaqa manami llapan shonquykikunawantsu kushishqa sirviyashqayki. 48 Tsaymi contraykikunata Tayta Dios kachamuptin paykunapa wätaynin kayanki. Imaykaykikunapis ushakaptinmi pasaypa muchuyman chäyanki. Tsaymi mikuyänaykipäpis ni upuyänaykipäpis ni jatikuyänaykipäpis kanqatsu. Tsaynö ñakayanki ushakäyanqaykiyaqmi.

49 “Karu nacionpita soldädukunata Tayta Dios kachamuptinmi ankanörä illaqpita shamur ushakätsiyäshunki. Tsay runakuna parlayanqankunatapis manami tantiyayankitsu. 50 Paykunaqa mana alli karmi awkinkunatapis respitayanqatsu ni wamrakunatapis kuyapäyanqatsu. 51 Tsaynöllami tsay soldädukunaqa uywaykikunatapis mikuynikikunatapis chipyaq apakuyanqa. Llapanta ushar manami jaqipäyäshunkitsu trïgutapis, vïnutapis, aceititapis, ni ima uywaykipa wawankunatapis. Llapanta ushayaptinmi pasaypa mallaqaywan wanuyanki.

52 “Tayta Dios rikatsiyäshunqayki markaykikunatapis altuyaq murallashqa kaykaqtami tsay soldädukuna chipyaq juchutsiyanqa. Tsay murallashqa markakuna tsapäyäshunaykipä kanqanta yarpäyaptikipis llapantami ushakätsiyanqa. 53 Markaykikunata soldädukuna jiruruypa tsaparäyäshuptikimi mallaqpä kayanki. Tsaymi tsurikikunata ollqutapis warmitapis mallaqaywan mikuyanki. 54 Llapanpita mas kuyakuq runapis wawqinta ni warminta ni kawaykar quëdaq tsurinkunatapis manami kuyapanqatsu. 55 Tsaymi wanuq tsurinkunapa aytsanta kikillan mikunqa. Tsaynö kanqa contraykikuna llapan markaykikunata tumaypa tsaparäyaptin imapis mikuyänaykipä mana kaptinmi. 56 Llapanpita mas kuyakuq warmipis runanta y wawankunata manami kuyapanqatsu. 57 Tsaymi qeshyakunqan wawanta y pärishnintapis pakayllapa mikunqa.^† Tsaynö kanqa contraykikuna markaykikunata tumaypa tsaparäyaptin imapis mikuyänaykipä mana kaptinmi.

58 “Llapanpä munayyuq Tayta Diosta mana mantsapakur kay librucho qellqaraykaq mandamientukunata mana cäsukuyaptikiqa 59 mantsariypä castïgukunawan y mana alliyaq qeshyakunawanmi qamkunatapis tsurikikunatapis ñakatsiyäshunki. 60 Egipto runakunata mantsariypä castiganqannömi qamkunatapis castigayäshunki. 61 Ushakäyänaykipämi kay librucho mana qellqaraq qeshyakunata y castïgukunata yuritsimunqa. 62 Ciëlucho qoyllurkunanörä tsaytsika kaykarpis Tayta Diosta mana cäsukuyanqaykipitami wallkaqllana rikakuyanki.

63 “Qamkuna alli kawayänaykipä y atskaman mirayänaykipä yanapayäshurniki Tayta Dios kushikunqannöllami mana cäsukuyanqaykipita ushakätsiyäshurnikipis Tayta Dios kushikunqa. Mana munaykaqtami täyanqayki nacionpitapis qarquyäshunki 64 maytsay nacionkunaman mashtakäyänaykipä. Tsay nacionkunachömi qerupita y rumipita rurashqa ïdulukunata adorayanki. Tsay ïdulukunataqa manami qamkunapis reqiyankitsu ni unay castantsikkunapis reqiyarqantsu. 65 Tsay nacionkunacho täyaptikipis jamayänaykita Tayta Dios manami munanqatsu. Tsaymi pasaypa llakikur, mantsarir y waqallar täyanki.

66 “Ima desgraciapitapis manami libritsu kayanki. Imapis kutin kutin päsayäshuptikimi paqaspa junaqpapis mantsa mantsalla kayanki. 67 Pasaypa mantsakurmi patsa waraskiptinpis ‘¿imay hörarä tsakaykunqa?’ niyanki. Patsa tsakaskiptinpis ‘¿imay hörarä patsa waraykunqa?’ niyanki. 68 Egiptupa imaypis mana kutiyänaykipä Tayta Dios nishqa kaykaptinpis büquikunawanmi kutitsiyäshunki. Chikiyäshuqnikikunaman chaykatsiyäshurnikimi wätay kayänaykipä rantikuyäshuptikipis rantiyäshunkitsu”.