3 “ ‘Leynïkunata y mandamientükunata cumpliyaptikiqa 4 tamyatapis tiempullanchömi tamyatsimushä. Chakrakunacho mikuykunapis y jachakunapis allimi wayunqa. 5 Trïgupis üva poqumunqanyaqmi aypanqa. Üvapis trïguta murunqaykiyaqmi aypanqa. Pacha junta mikurmi nacionnikichöpis alli kawayanki.^†

6 “ ‘Nacionnikicho alli kawarmi mana pipis wajupashqa punuyanki. Noqami chucaru munti uywakunapita y guërrapitapis tsapäshayki. 7 Guërrata rurar contrayki runakuna shayämuptinpis vincirmi qatikachäyanki. Paykunataqa llapantami espädaykikunawan wanutsiyanki. 8 Pitsqa runakunallami juk pachak (100) runakunata qatikachäyanki. Juk pachak runakunallami chunka waranqa (10,000) runakunata qatikachäyanki. Contraykikunataqa espädaykikunawanmi wanutsiyanki.

9 “ ‘Pactuta rurar awninqänöllami atskaman mirayänaykipä bendicionnïta churamushä. 10 Atska wata mikuyänaykipämi maran trïguykipis aypanqa. Tsayrä cosechayanqaykitapis tröjata jäkatsirrämi churayanki.

11 “ ‘Qamkunawanmi imaypis täshä. Manami imaypis kachayäshaykitsu. 12 Maypa aywayaptikipis qamkunawanmi kaykäshä. Noqami qamkunapa Diosnikikuna imaypis kashä. Qamkunami kuyanqä runakuna kayanki.^† 13 Noqaqa Tayta Diosnikikunami kaykä. Egiptucho wätay kayanqaykipitami jipimushqä. Pitapis mana mantsaypa kawayänaykipämi yanapashqä.

14 “ ‘Noqa ninqäkunata mana wiyakayämaptiki mandamientükunata mana cumpliyaptiki, 15 leynïkunata mana cäsukur mana respitayämaptiki y pactu ruranqäta manakaqman churayaptikiqa 16 mantsariypämi castigayäshayki. Tsaymi qamkunaman kachamushä fiebrita, ñawi nanayta, aywapakayta y wanutsikuq qeshyata. Contraykikuna shamur cosëchaykita apakuyaptinmi muruyanqaykipis manakaqllapä kanqa. 17 Tsaynöllami qamkunapa contrayki kaptï chikiyäshuqnikikuna vinciskir munaynincho katsiyäshunki. Pipis mana qatikachaykäyäshuptikimi qeshpir aywakuyanki.

18 “ ‘Tsaynö ruraykaptïpis mana cäsukayämaptikiqa qanchis kuti masmi castigayäshayki. 19 Mana cäsukuq orgullösu kayaptikimi tamyatapis tamyatsimushätsu y murukuyanqaykipis manami wayunqatsu. 20 Chakraykikuna mana wayuptin wallällami aruyankipis. Tsaynöllami plantayanqayki jachakunapis wayunqatsu.

21 “ ‘Mana cäsukamar ninqäkunata manakaqman churayaptikiqa jutsata rurayanqaykiman tupumi qanchis kuti mas castigayäshayki. 22 Munti uywakunatami kachamushä tsurikikunata y uywaykikunata ushayänanpä. Tsaymi ni nänipa puriyänallanpäpis kanqatsu.

23 “ ‘Tsaynö castigaykaptïpis mana cäsukamar ninqäkunata manakaqman churayaptikiqa 24 noqapis qamkunapa contrayki shärirmi jutsata rurayanqaykipita qanchis kuti mas castigayäshayki. 25 Mana cäsukayämaptikiqa pactuta rurar ninqänöllami wanutsikuq runakunata kachamushä. Markaykikunaman pakakur qeshpiyaptikipis mantsariypä qeshyatami kachamushä. Tsayman contraykikuna yaykamurmi ushakätsiyäshunki.

26 “ ‘Mikuynikikunata ushakätsiptïmi chunka warmikuna juk tullpallachöna kusinakuyanqa. Tsaymi ichik ichiklla qarayäshuptiki pachaykikunapis juntanqatsu.

27 “ ‘Tsaynö castigaykaptïpis mana cäsukamar ninqäkunata manakaqman churayaptikiqa 28 rabyanarmi jutsata ruranqaykipita qanchis kuti mas castigayäshayki. 29 Pasaypa mallaqarmi tsurikikunata warmitapis ollqutapis mikuyanki. 30 Ïdulukunata adorayänaykipä shäritsiyanqayki altarkunatapis juchutsirmi ushashä. Inciensiu qoshnitsikuyänayki altarkunatapis pakirmi ushashä. Qamkunata wanuskatsirmi ïduluykikuna jananman ayaykikunata jitarishä. Pasaypa ajanätsiyämanqaykipitami tsaynö ushakätsiyäshayki. 31 Markaykikunatapis raqällatana jaqirmi altarnikikunatapis juchutsir ushakätsishä. Sacrificiuta rupatsiyaptikipis manami chaskiyäshaykinatsu.

32 “ ‘Kikïmi markaykikunata chipyaq ushakätsishä. Ushakätsinqäta rikarmi contraykikunapis markaykikunaman tänanpä shamur pasaypa mantsakashqa rikakuyanqa. 33 Wakinnikitaqa espädawanmi wanutsiyäshayki y wakinnikitanami juklä nacionkunaman qarquyäshayki. Tsaynö ushakätsiptïmi nacionnikikunapis pasaypa tsunyaqllana rikakunqa. Markaykikunapis mantsariypa raqällami quëdanqa. 34 Chakraykikunata jamatsiyänaykipä nikaptïpis mana jamatsiypa muruyanqaykipitami contraykikunapa nacionnincho kayanqaykiyaq chakraykikuna jamanqa. 35 Tsaynö mana jamatsiypa muruyanqaykipitami chakraykikuna jamanqa.

36 “ ‘Kawaykar quëdaqkunapis contraykikunapa nacionnincho karmi pasaypa mantsa mantsalla kawayanqa. Tsaymi ima qashraraptillanpis espädawan runa qatikachaykäshunqaykita yarpar qeshpiyanki. Tsaynö qeshpiykarmi mantsariywan wakinniki wanuyanki. 37 Pipis mana qatikachaykäshuptikimi guërrapita qeshpiykaqnö takanakurrä qeshpiyanki. Manami mayqaykipis contraykikunawan pelyayta kamäpakuyankitsu. 38 Juklä nacionkunachömi wanuyanki. Tsaynöllami contraykikunapa nacionnincho ushakäyanki. 39 Mana cäsukayämanqaykipitami contraykikunapa nacionnincho kawaykar quëdaq tsurikikunapis wanuyanqa.

40-41 “ ‘Contraykikunapa nacionninman qarquptïmi tantiyakuyanki kikikikuna y taytaykikuna conträ shärir jutsayuq kayanqaykita. Tsaynö tantiyakur perdonta mañakayämaptikiqa 42 Jacobwan,^† Isaacwan,^† Abrahamwan^† pactu ruranqätami yarpäshä. Tsaynöllami chakraykikunapäpis yarpäshä. 43 Chakraykikunata mana jamatsiypa muruyanqaykipitami juklä nacioncho täyanqaykiyaq chakraykikuna jamanqa. Mana cäsukamar jutsata rurayanqaykipita y leynïkunata mana cumpliyanqaykipitami pasaypa ñakayanki.

44 “ ‘Tsaynö kaptinpis unay castaykikunawan pactu ruranqäta manami qonqäshätsu. Noqa Tayta Diosnikikuna karmi llapaykikunata ushakätsiyäshunaykita kachapäshätsu. 45 Tsaypa trokinqa unay castaykikunawan pactu ruranqäta yarparmi qamkunata yanapayäshayki. Tsay pactuta rurarmi unay castaykikunapa Diosninkuna kanäpä wakin nación runakuna rikaykaptin Egiptupita jipimurqä. Noqaqa Tayta Diosmi kaykä’ ”.

46 Tsaynö nirmi leyninkunata, mandamientunkunata y yachatsikuyninkunata Israel runakunata Moiséswan Sinaí jirkacho Tayta Dios willakatsirqan.