Chakrata jamatsiyänanpä ninqan
25
Sinaí jirkachömi Moisésta Tayta Dios nirqan: 2 “Israel runakunata niy: ‘Rikatsishunaykipä kaq nacionman charqa Tayta Diosta cäsukur chakrata jamatsiyanki. 3 Soqta watallami chakrakunata muruyanki. Üva plantakunatapis soqta watallami podapar wayuyninta pallayanki. 4 Qanchis kaq watachöqa Tayta Diosta cäsukur chakrata jamatsiyanki. Tsay wataqa ama imatapis muruyankitsu ni üva plantakunatapis podapäyankitsu. 5 Chakracho kikillan wiñamuq trïgutapis ama qoriyankitsu. Podanni üva wayunqantapis ama qoriyankitsu. Tsay wataqa chakrata jamatsiyanki. 6 Mana churakuyaptikipis kikillan wiñamuqkuna y podanni üvapis wayurmi mikuyänaykipä aypanqa. Tsaynöllami wätayniki warmipis ollqupis, arupäshuqnikikuna y qamkunacho taq jäpa runakuna mikuyänanpä aypanqa. 7 Uywaykikunawan jirka uywakuna mikuyänanpäpis aypanqami.†Jubileo wata imanö kananpä ninqan
8 “ ‘Chusku chunka isqun (49) watata yupayanki. 9 Tsay watakuna päsaskiptinmi qanchis kaq killa chunka junaqcho cornëtata entëru nacioncho tukatsiyanki. Tsay junaqmi Israel runakuna purificashqa kayänanpä junaq† kanqa. 10 Tsay junaqmi qallaykunqa sagrädu Jubileo wata. Jubileo wata kaptinmi llapanpis wätay kayanqanpita castankunaman librina kutikuyanqa. Pï runapis chakranta rantikushqa karqa tsay watami chakranta qorikunqa. Cada pitsqa chunka (50) watami tsaynö kanqa.
11 “ ‘Tsay wata qamkunapä Jubileo wata kaykaptinqa chakraykikunata ama muruyankitsu. Raströjucho wiñamuq trïgutapis ama qoriyankitsu. Podanni üva wayunqantapis ama qoriyankitsu. 12 Tsay wata sagrädu karmi qamkunapä Jubileo wata kanqa. Mikuytapis mikuyanki raströjucho wayunqallanta y podapanni üvakuna wayunqallantami.
13 “ ‘Tsay Jubileo watami rantikuyanqan chakrankunatapis llapan qorikuyanqa. 14 Tsaynö kaykaptinqa manarä Jubileo wata chämuptin pipis chakrata rantir o rantikurqa aykacho rantikunanpäpis shumaq yarpachakutsun. Paqtä runa mayinta pipis engañanman. 15 Jubileo watacho chakrata kutitsinanpä ayka wata pishinqantapis yupaskir rantiq runa chaninta päganqa. Rantikuq kaqpis chaninta churanqa ayka kuti chakracho murunanpä kanqanta yupaskir. 16 Chakracho atska wata murunanpä kaptinqa chanin masmi kanqa. Wallka watalla murunanpä kaptinqa chanin wallkallami kanqa. Ayka wata murunanpä kanqantapis yupaskirmi chakrata rantikunqa.
17 “ ‘Tayta Diospita mantsapakur runa mayikita ama engañayankitsu. Noqami Tayta Diosnikikuna kaykä. 18 Leynïkunata cumplir ninqäkunata cumpliyanki. Cumplirqa nacionnikicho allimi kawayanki. 19 Chakraykikunapis alli wayuptinmi pacha junta mikur tranquïlu kawayanki.
20 “ ‘Qamkuna yarpachakur capazchi niyanki: “Qanchis kaq watacho mana mururqa y mikuyta mana qorirqa ¿imatarä mikushun?” 21 Tsaypita ama yarpachakuyankitsu. Soqta kaq watachömi bendicionnïta churamushä chakrayki alli wayunanpä. Tsaymi cosëchatapis qoriyanki kimsa wata cosechar qoriyänaykipä kaqtanö. 22 Tsaymi soqta kaq watacho churayanqayki puwaq kaq watacho mikuyänaykipäpis aypanqa. Tsaynöllami muruyanqayki poqunqanyaq isqun kaq watacho mikuyänaykipäpis maran kaqlla aypanqa’.
Rantikuyanqan chakranta y wayinta qorikuyänanpä ninqan
23 “Chakraqa noqapami kaykan. Qamkunaqa qorpanöllami taykäyanki. Tsaymi rantikuyanqayki chakraqa yupashqa watalla rantiqpa makincho kanqa. 24 Rantiyanqayki chakrata rantikuyta munarqa punta kaq duëñunta munatsiyanki.
25 “Punta kaq duëñun pasaypa imaynaq kar rantikunqan chakrata qoriyta mana kamäpakuptinqa legïtimu kaq castan rantitsun.† 26 Mayqan legïtimu castanpis chakranta rantiyta mana kamäpakuptinqa qorikunanpä punta kaq duëñunmi qellayta kamarinqa. 27 Tsay rantikuyta munaq runatami qellayninta kutitsinqa Jubileo watapa ayka wata pishinqantapis cuentata jipiskir. Tsaynöpami chakranta qorikunqa. 28 Chakranta qorinanpä qellaynin mana aypaptinmi itsanqa Jubileo wata chämunqanyaq rantiqpa makillancho kanqa. Tsay wata chämuptinrämi punta kaq duëñun qorikunqa.
29 “Pipis murallashqa markacho wayinta rantikuskir qorikuyta munarqa juk watallachömi qorikunqa. 30 Juk watayaq wayinta mana qoriptinqa rantiqpä y paypita aywaraqkunapänami kanqa. Jubileo wata chämuptinpis manami qorinqanatsu. 31 Murallanni markakunacho wayikunatami itsanqa chakrata qorinqannölla Jubileo wata chämuptin punta kaq duëñun qorikunqa.
32 “Levitakunaqa markankunacho rantikuyanqan wayinkunata imaypis qorikuyanqa. 33 Qorikuyta munaptinqa wayinta rantiq runa Jubileo wata chämuptin kutitsitsun. Levitakunapaqa wayillanmi markancho herencian kaykan. Israel nacioncho paykunapäqa manami mas ima herencianpis kantsu. 34 Levitakunapa markankunacho üsha mitsikuyänankunataqa ama rantikuyätsuntsu. Tsayqa paykunapami imaypis kanqa.
Waktsakunata yanapayänanpä ninqan
35 “Mayqan Israel mayikikuna muchuyman char yanapanaykipä rugakushuptiki yanapayanki. Jäpa runata patsatsiyanqaykinö wayikiman patsatsiyanki.† 36 Imata rantikurpis alläpa chaninchöqa ama rantikuyankitsu. Qellayta mañarpis wachayninta ama mañayankitsu. Tsaypa trokinqa mantsapakamar markaykikunacho añaw täkuyänanpä Israel mayikita yanapayanki. 37 Yapaymi nï: Qellayta mañarqa wachayninta ama mañayankitsu. Mikuyta rantikurpis alläpa chanintaqa ama cobrayankitsu.† 38 Egiptupita jipimushuqniki Tayta Diosnikikunami kaykä. Qamkunatami jipimushqä Canaánta rikatsinäpä y Diosnikikuna kanäpä.
39 “Israel mayiki muchuyman char wätayniki kananpä yaykamuptin wätaytanöqa ama arutsiyankitsu. 40 Tsaypa trokinqa arupakuqtanölla arutsiyanki y qorpatanölla alli rikayanki. Jubileo watayaqllami arupäyäshunki. 41 Tsaypitaqa librinami tsurinkunawan juntu castankunaman y chakrankunaman kutikunqa. 42 Israel runakunaqa sirvimaqnïmi kaykäyan. Noqata sirviyämänanpämi Egiptupita jipimushqä. Tsaymi Israel mayikikunata wätay kayänanpä rantikuyankitsu. 43 Tayta Diosnikikuna kaykaptïqa mantsapakamar Israel mayikikunata ama ñakatsiyankitsu.
Wätayyuq runakunapä yätsikuy
44 “Warmipis o ollqupis wätayniki kananta munarqa cercaykicho kaykaq nacionkunapita rantiyanki. 45 Tsaynölla wätaynikikuna kayänanpä rantiyanki qamkunacho taq jäpa runakunata y nacionnikikunacho yuriq tsurinkunata. 46 Wanukurqa tsurikikunata sirvinanpä jaqipaykuyanki. Paykunami imaypis wätayninkuna kayanqa. Israel mayikikunatami itsanqa ñakatsiyankitsu ni wätaynikikunapä tsararäyankitsu.†
47 “Qamkunacho kaykaq jäpa runa imaykayuq tikraptin y Israel mayiki muchuyman char tsay imaykayuq runapa wätaynin kananpä rantikuptinqa 48 Israel mayikipa derëchun kaykanmi castankuna pägakur jipinanpä. Tsaynö jipinqa wawqin, 49 tiyun, prïmun o mayqan legïtimu castan karpis. Qellaynin kaptinqa kikin wätaypis pägakur libri yarqukutsun. 50 Libri kananpä yarqukuyta munarqa patronninwan cuentata jipinqa Jubileo watapä ayka wata pishiykanqantapis. Tsay pishiykaq watakunapitami patronninta päganqa jornal ayka kanqantapis cuentata jipiskir. 51 Jubileo wata chämunanpä ayka wata pishinqanpitami patronninta päganqa. Atska watarä pishiptinqa mastami päganqa. 52 Wallka watallana pishiptinqa wallkallatanami päganqa. Tsaynöpami mana arupanqan kaq watakunapita päganqa. 53 Patronqa tsay wätayninta arupakuqtanöllami mana ñakatsir arutsinqa.
54 “Patronninta wätaynin imanöpapis pägayta mana kamäpakurqa Jubileo wata chämunqanyaqmi shuyanqa. Tsay wata chämuptinnami tsurinkunawan juntu mana pägaypa libri yarqukunqa. 55 Manami pipapis wätaynin kayänanpätsu Israel runakunata Egiptupita jipimushqä, tsaypa trokinqa noqata sirviyämänanpämi. Noqaqa Tayta Diosnikikunami kaykä.