Castanta Tayta Diosta entregar aykata pägananpäpis ninqan
27
Mastami Moisésta Tayta Dios nirqan: 2 “Israel runakunata niy: ‘Pipis castanta Tayta Diosta entregayta munarqa runapa chanintami päganqa: 3 Ishkay chunka (20) watayuqpita soqta chunka (60) watayuqyaq ollquta entregayta munarqa pitsqa chunka (50) siclo qellaytamia päganqa. Tsay qellaytami pësanqa Tinkuna Tolducho kaykaq pësakunawan. 4 Warmita entregayta munarqa kimsa chunka (30) siclo qellaytami päganqa. 5 Pitsqa watayuqpita ishkay chunka (20) watayuqyaq ollquta entregayta munarqa ishkay chunka (20) siclo qellaytami päganqa. Pitsqa watayuqpita ishkay chunka (20) watayuqyaq warmita entregayta munarqa chunka siclo qellaytami päganqa. 6 Juk killayuqpita pitsqa watayuqyaq ollquta entregayta munarqa pitsqa siclo qellaytami päganqa. Juk killayuqpita pitsqa watayuqyaq warmita entregayta munarqa kimsa siclo qellaytami päganqa. 7 Soqta chunka (60) watayuqpita janaman ollquta entregayta munarqa chunka pitsqa siclo qellaytami päganqa. Soqta chunka (60) watayuqpita janaman warmita entregayta munarqa chunka siclo qellaytami päganqa. 8 Imaynaq kar pägananpä mana aypäpakurqa sacerdötitami willanqa. Sacerdötinami aypäpakunqallanpita pägananpä ninqa.9 “ ‘Sacrificiupä alli uywata Tayta Diospä apaptinqa tsay uywa sagrädunami kanqa. 10 Apananpä kaq uywataqa manami trukatsinmantsu alli o mana alli kaptinpis. Trukatsiptinqa ishkannami sagrädu kar Tayta Diospä kanqa.
11 “ ‘Sacrificiupä mana alli uywata Tayta Diospä aparqa sacerdötimanmi apanqa. 12 Sacerdötinami tsay uywata rikaykur chaninta churanqa. Tsay uywapa chaninqa sacerdöti churanqannöllami kanqa. 13 Duëñun qorikuyta munarqa chaninta churanqan jananman quinta parti mastami yapanqa.
14 “ ‘Pipis wayinta Tayta Diospä entregaptinqa wayita rikaykur chanin ayka kanqantapis sacerdöti churanqa. Tsay wayipa chaninqa sacerdöti churanqannöllami kanqa. 15 Wayinta duëñun qorikuyta munarqa chaninta churanqan jananman quinta parti mastami päganqa.
16 “ ‘Pipis Tayta Diospä juk chakrata entregaptinqa tsay chakrata sacerdöti calculanqa ayka arröba muru yaykunqantapis. Cada ishkay chunka (20) arröba cebäda muru yaykuptinqa pitsqa chunka (50) siclo qellaytami päganqa. 17 Jubileo watacho chakranta Tayta Diospä entregaptinqa chaninta churanqannöllami päganqa. 18 Jubileo wata päsaskiptinrä entregaptinqa aykata pägananpä calculanqanpita chaninta sacerdöti bäjatsinqa. Jubileo watapä ayka wata pishinqantapis yupaskirmi tsaynö bäjatsinqa.
19 “ ‘Rikatsinqan chakranta duëñun qorikuyta munarqa chaninpa jananman quinta parti mastami päganqa. Tsaynö pägaykurmi chakranta qorikunqa. 20 Kikin mana qorikuptin tsay chakrata juktana sacerdöti rantikuskiptinqa mananami qorinqanatsu. 21 Jubileo wata chämunqanyaq tsay chakrata pipis mana qoriptinqa Tayta Diospä sagrädumi kanqa. Tayta Diospä karmi tsay chakraqa sacerdötipäna kanqa.
22 “ ‘Herencia chaskinqan chakrata entregananpa trokin rantinqan chakrata Tayta Diospä entregaptinqa 23 Jubileo watapä ayka wata pishiykanqanta yupaskirmi tsay chakrapa chaninta sacerdöti churanqa. Duëñunnami chakrapa chaninta churanqannölla tsay junaq päganqa. Päganqanqa Tayta Diospä sagrädumi kanqa. 24 Jubileo wata chämuptinnami punta kaq duëñun tsay chakrata qorikunqa.
25 “ ‘Päganqan siclo qellaykunataqa Tinkuna Tolducho kaykaq pësakunawanmi pësanqa. Tsay pësakunawan pësaptinmi chunka juk grämu qellay juk siclo kanqa.
26 “ ‘Malta uywaykikunapa punta yuriq orqu wawankunaqa üsha o wäka karpis Tayta Diospanami kaykan. Tsaynö kaykaptinqa Tayta Diospa kaqtaqa ama apakuyaytsu, sinöqa kikikipa kaqta apakuyay. 27 Pipis impüru uywata apaykur qorikuyta munarqa sacerdöti chaninta churanqan jananman quinta parti masta pägaykurmi qorikunqa. Mana qoriptinqa chanin churanqallanchömi sacerdöti rantikunqa.
28 “ ‘Pipis kikinpa kaqta uywata, runata o herencia chaskinqan chakrata karpis Tayta Diospä entregarqa manami rantikunqanatsu ni qorikunqanatsu. Imatapis Tayta Diospä entregaptinqa sagrädu kar paypanami kanqa.†
29 “ ‘Wanutsishqa kananpä destinashqa kaykaq runataqa manami pägaypapis salvanmantsu. Tsay runaqa wanutsishqami kanqa.
30 “ ‘Chakraykikunacho wayunqan tsaki mikuy o jachakunapa wayuynin kaptinpis cada chunkapita jukta Tayta Diospä apayanki. Tsay apayanqayki diezmuqa Tayta Diospä santumi kanqa. 31 Tsay apayanqaykita qorikuyta munarqa chaninta calculaskirmi tsay jananman quinta parti masta yapayanki.
32 “ ‘Uywaykikuna mirayanqanpitapis cada chunkapita jukta Tayta Diospä apayanki, wäka, üsha o cabra kaptinpis. Tsay diezmuqa Tayta Diospä santumi kanqa. 33 Uywataqa alli o mana alli kaptinpis ama akrayankitsu. Tsaynöpis alli kaqta mana alli kaqwanqa manami trukatsiyankimantsu. Trukaptikiqa ishkannami sagrädu kar Tayta Diospä kanqa. Tsaykunataqa kikikikunapä manami qorikuyankimantsu’ ”.†
34 Llapan Israel runakunata tantiyatsiyänanpämi Sinaí jirkacho mandamientukunata Moisésta Tayta Dios tsaynö tantiyatsirqan.