2 (1) Tsaymi llapan Israel runakunata qoriykur Moisés nirqan: “Egiptucho kaykar rikayarqaykimi Faraóntawan yanapaqninkunata y Egipto runakunata Tayta Dios castiganqanta. 3 (2) Kikikikunami rikayarqayki milagrukunata, señalkunata y mantsakaypä kaqkunata ruranqanta. 4 (3) Tsaynö kaptinpis Tayta Dios upatakätsiyäshuptikimi kananyaqpis tantiyayankirätsu. Rikaykarpis mana rikaqnömi kaykäyanki. Wiyaykarpis mana wiyaqnömi kaykäyanki.^†

5 (4) “Chusku chunka (40) watami tsunyaq jirkapa qamkunata pushamushqä. Tsay watakunacho manami mayqantsikpapis latsapantsikkuna ni llanqintsikkuna ushakarqantsu. 6 (5) Mikunantsikpä tanta mana kaptinpis ni upunantsikpä vïnu ni aswa mana kaptinpis Tayta Diosmi maná ninqan mikuyta kamaripämarqantsik. Tsaynö rurarqan Tayta Diosnintsik kanqanta tantiyakur payta cäsukunantsikpämi.

7 (6) “Kayman chaykamushqami Hesbón markacho taq rey Sehón^† y Basán nacionpa mandaqnin rey Og^† soldädunkunawan atacamänantsikpä shäyämurqan. Tsaynö shayämuptinpis llapantami ushakätsirqantsik. 8 (7) Nacionninta qechuskirnami Rubén trïbu runakunata, Gad trïbu runakunata y pullan Manasés trïbu runakunatapis rakipurqantsik.^† 9 (8) Tsaynö kaykaptinqa Tayta Dios pactu ruranqanta mana qonqaypa cumpliyanki. Cumpliyaptikiqa ima rurayanqaykipis allimi kanqa.

10 (9) “Cada trïbupa mandaqninkuna, mayor runakuna, autoridäkuna y Israel mayikikuna karpis Tayta Diosnintsikpa ñöpanchömi kaykäyanki. 11 (10) Tsaynöllami tsurikikunapis y warmikikunapis kaycho kaykäyan. Yantata y yakuta apamuq wätayniki jäpa runakunapis kaychömi kaykäyan. 12 (11) Llapaykimi kaycho kaykäyanki Tayta Dios ruranqan pactuta chaskiyänaykipä. Imayyaqpis cumplinanpä jurarmi tsay pactuta Tayta Dios kanan junaq noqantsikwan ruraykan. 13 (12) Tsaymi unay castantsikkunata Tayta Dios awninqannölla kuyanqan runakuna kaykäyanki. Tsaynöllami qamkunapa Diosnikikuna kikin Tayta Dios kaykan. 14-15 (13-14) Tayta Diosnintsikpa ñöpancho kaykar paywan rurayanqayki pactuqa manami qamkunallapätsu kaykan, tsaypa trokinqa tsurikikunapä, willkaykikunapä y paykunapita aywaraqkunapäwanmi kaykan.

16 (15) “Egiptucho imanö kawanqantsiktapis musyayankimi. Tsaynöpis musyayankimi kayman chämunqantsikyaq atska nacionkunata imanö päsamunqantsiktapis. 17 (16) Qerupita, rumipita, qellaypita y qoripita rurashqa ïdulukunata tsay nación runakuna adorayanqanta rikayashqaykimi. 18 (17) Qamkunachöqa ollqupis ni warmipis ni mayqan castapis ni mayqan trïbupis Tayta Diosnintsikta qonqaskir ïdulukunata manami adorayanmantsu. Ïdulukunata adoraqkuna kayaptinqa qamkunacho venënuyuq iwjiq jachanömi kayanqa.^†

19 (18) “Kay pactuta rurar ama yarpäyaytsu mana cumpliyaptikipis Tayta Dios mana castigayäshunaykipä kanqanta. Mana cumpliyaptikiqa Tayta Diosmi llapaykita ushakätsiyäshunki. 20 (19) Tayta Dios manami perdonayäshunkitsu, tsaypa trokinqa pasaypa ajanarmi qamkunapita aywaraqkunapis ushakäyanqanyaq kay librucho qellqaraykaq llapan maldicionkunawan castigayäshunki. 21 (20) Llapan Israel trïbukunapita rakiyäshuptikimi imayka desgraciakuna päsayäshunki. Llapan tsay maldicionkuna päsayäshunki kay pactu librucho ninqannömi.

22 (21) “Täyanqayki nacionchöpis desgraciakunawan y qeshyakunawan Tayta Dios castigashunqaykitami qepa yuriq Israel runakunawan karu nacionpita shamuq jäpa runakunapis rikayanqa. 23 (22) Tsaymi pasaypa mantsarir niyanqa: ‘¡Tsay chakrakunachöqa kachiwan azufrimi mashtaraykan! Manami imapis tsaycho wayunqatsu ni qewapis wiñamunqatsu. Sodomata, Gomorrata, Admata y Zeboimta Tayta Dios castigar ushakätsiptin imapis mana quëdanqannömi tsaycho imapis kanqatsu’.

24 (23) “Llapan nación runakunapis parlarmi niyanqa: ‘Kay nacionta ¿imanirrä Tayta Dios tsaynö castigashqa? ¿Imanirrä pasaypa ajanashqa?’ 25 (24) Niptinmi niyanqa: ‘Unay castankuna yärakuyanqan Tayta Diosmi tsaynö castigashqa paykunawan pactu ruranqanta mana cumpliyanqanpita. Tsay pactuta rurarqan Egiptupita jipimurmi. 26 (25) Tsay runakunaqa Tayta Diosta adorayänanpa trokinmi mana reqiyanqan y imachöpis mana yanapakuq dioskunata adorayashqa. 27 (26) Tsaymi Tayta Diosta ajanätsiptin kay librucho qellqaraykaq llapan maldicionkunawan tsay runakunata castigashqa. 28 (27) Rikanqantsiknöpis pasaypa ajanarmi juklä nacionkunaman qarqushqa’.

29 (28) “Manami llapan yarpanqankunatatsu Tayta Diosnintsik musyatsimantsik. Leyninkunatawan mandamientunkunatami itsanqa kikintsikpis tsurintsikkunapis imaypis cumplinantsikpä musyatsimashqantsik”.