Cäsukuqkunata Tayta Dios yanapananpä ninqan
30
“Kanan musyayankinami cäsukuyaptiki Tayta Dios bendisayäshunaykipä kanqanta y mana cäsukuyaptiki maldicionar castigayäshunaykipä kanqanta. Tayta Dios maytsay nacionman qarquyäshuptikimi jutsaykikunapita pësakur 2 kanan ninqäkunata llapan shonquykikunawan y voluntänikikunawan qamkunapis tsurikikunapis Tayta Diosta cäsukuyaptiki 3 maytsay nacionpitapis kuyapäyäshurniki qoriyämushunki. 4 Maytsay karu nacioncho kayaptikipis kutitsiyämushunkimi. 5 Unay castantsikkunata Tayta Dios rikatsinqan nacionman kutitsiyämushuptikimi tsaycho yapay täyanki. Tsaycho tarmi unay castantsikkunapitapis mas alli kawar paykunapita mas atskaqman mirayanki.6 “Tsaychömi shonquykikunata y tsurikikunapa shonqunkunata Tayta Dios señalanqaa llapan shonquykikunawan y llapan voluntänikikunawan payllatana kuyar alli kawayänaykipä.† 7 Chikishuqnikikunata y contraykikunatami itsanqa kay ninqä llapan maldicionkunawan Tayta Dios castiganqa. 8 Tsaynöpami Tayta Diosta yapay cäsukur kanan junaq willanqä mandamientukunata llapanta cumpliyanki.
9 “Tsaymi wamraykikunaman, uywaykikunaman, chakraykikunaman y llapan aruyanqaykikunamanpis bendicionninta Tayta Dios churamunqa. Unay castantsikkunata yanapar kushikunqannöllami qamkunata yanapashurnikipis kushikunqa. 10 Tayta Diosmi tsaynö yanapayäshunki payta cäsukur kay röllucho qellqaraykaq mandamientunkunata y estatütunkunata llapan shonquykikunawan y voluntänikiwan cumpliyaptiki.
Alli kawayta o mana alli kawayta akrayänanpä ninqan
11 “Kanan junaq willanqä mandamientukunaqa tantiyayänaykipä y cumpliyänaykipä manami alläpa ajatsu. 12 Tsaymi niyankimantsu: ‘¿Pirä ciëluman aywar apaykamunman willamashqa cumplinantsikpä?’ 13 Tsaynöpis ama niyankitsu: ‘¿Pirä lamarpa jukaq kuchunman aywar apaykamunman willamashqa cumplinantsikpä?’ 14 Manami tsaynötsu. Tayta Diospa willakuyninta cumpliyänaykipäqa shimikikunacho y shonquykikunachömi kaykan.†
15 “Alli kawayänaykipä kaqta y mana alli kawayänaykipä kaqtapis qamkunata tantiyatsishqänami. Kanan shumaq yarpachakuyay mayqantapis akrayänaykipä. 16 Kanan junaqmi qamkunata nï Tayta Diosta kuyar y munanqannö kawar llapan mandamientunkunata, estatütunkunata y yachatsikuyninkunata cäsukur kawayänaykipä. Tsaynöpami Tayta Dios rikatsishunaykipä kaq nacionman yaykuyaptiki bendicionninta churamunqa atskaman mirayänaykipä y alli kawayänaykipä.
17 “Kanan tantiyatsinqäkunata mana cumplir wakin dioskunata adorar qonqurikurqa 18 kuyapaypämi ushakäyanki. Jordán mayuta tsimpar herenciata chaskirpis manami atska wataqa tsaycho täyankitsu.
19 “Bendicionta chaskir alli kawayänaykipä kaqta o maldicionashqa kar mana alli kawayänaykipä kaqta kanan junaq akrayay. Kanan akrayanqaykitaqa ciëlupis y kay patsapis testïgumi kaykan. Tsaynö kaykaptinqa qamkuna y qamkunapita aywaraqkunapis alli kawayänaykipä kaqta akrayay. 20 Tayta Diosta kuyar pay ninqankunata cäsukuyay. Payta cäsukurqa allimi kawayanki. Tsaynöpami Abrahamta,† Isaacta† y Jacobta† awninqan nacioncho tar atska wata kawayanki”.