4 “Amorreo runakunapa mandaqnin reykuna Sehónta y Ogta y mandayanqan runakunata ushakätsinqannömi yaykuyänaykipä kaykaq nacioncho taykaq runakunatapis Tayta Dios ushakätsinqa.^† 5 Tsay runakunata ushakätsiyänaykipäqa^† makikikunamanmi Tayta Dios churamunqa. Churamuptin noqa ninqänölla llapanta ushakätsiyanki. 6 Ushakätsiyänaykipä kallpata tsariyay. Tayta Diosmi qamkunawan aywanqa. Manami kachäyäshunkitsu ni qonqäyäshunkitsu. Tsaynö kaykaptinqa tsay runakunata ama mantsayaytsu”.

7 Tsaypitanami Josuéta qayaskir llapan runakunapa ñöpancho Moisés nirqan: “Kananqa tseqllaykita chachak wachakakurkur mana mantsariypa kay runakunata pushay unay castantsikkunata Tayta Dios awninqan nacionman. Qammi tsay nacionman chaykatsir herenciankuna aypunki. 8 Kikin Tayta Diosmi puntaykita aywar mana kachaypa yanapashunki. Manami kachäyäshunkitsu ni qonqäyäshunkitsu.^† Tsaynö kaykaptinqa ama mantsarinkitsu”.

9 Llapan kay tantiyatsinqankunata Moisés qellqaskirmi Pactu Babulta apaq Leví sacerdötikunata y mayor runakunata aptatsirqan. 10 Aptaskatsirnami paykunata nirqan: “Cada qanchis wata jaqakunata perdonayänan wata chämuptin^† Ramäda fiestacho^† 11 Tayta Dios akranqan sitiuman Israel runakuna qorikäyanqa. Tsaycho llapan wiyayänanpä kay leykunata liyipäyanki.^† 12 Tsaychömi ollqukunapis, warmikunapis, wamrakunapis y qamkunacho taq jäpa runakunapis qorikäyanqa liyiyanqaykita wiyar Tayta Diosnintsikpita mantsapakur yachakuyänanpä y kay leykunacho llapan ninqankunata cäsukur kawayänanpä. 13 Tsaynöpami tsurikikunapis Tayta Diospita imaypis mantsapakuyänanpä yachakuyanqa. Jordán mayuta tsimpaskir chaskiyänaykipä kaq nacioncho tar imaypis tsaynö liyiyanki”.

14 Tsaypitanami Moisésta Tayta Dios nirqan: “Wanukunaykipä wallkallanami pishiykan. Tinkunantsik Tolduman Josuéta pushakurkur shamuy. Tsaychömi payta yätsishä imata rurananpäpis”.

Tsaynö niptinmi Moiséswan Josué Tinkuna Tolduman aywayarqan. 15 Tsaychönami ichiraykaq pukutaycho Tayta Dios paykunata yuriparqan. Tsay pukutayqa Tinkuna Tolduman yaykuna punku jananchömi kaykarqan.

16 Tsaypitami Moisésta Tayta Dios nirqan: “Wanukur unay castaykikunawan tinkuq aywakunaykipä wallkallanami pishiykan. Wanuskiptikimi awninqä nacionman Israel runakuna yaykur tsaycho taq runakuna adorayanqan dioskunata adorayanqa. Tsaynöpami qonqaykayämar paykunawan pactu ruranqätapis cumpliyanqanatsu. 17 Tsaynö mana cumpliyaptinmi noqapis pasaypa ajanarnin kacharir yanapashänatsu. Tsaymi paykunata mana kuyapaypa castigaptï imayka desgraciakuna päsanqa. Pasaypa ñakarmi niyanqa: ‘Tayta Diosnintsik manana yanapamashqami kay tukuyläya desgraciakuna päsaykämantsik’. 18 Tsaynö niyaptinpis llutankunata rurar juk dioskunata adorayanqanpitami paykunapita witikushä. 19 Tsaymi kanan yachatsishayki juk cantuta qellqaskir Israel runakunata yachatsinaykipä. Tsay cantuta cantarmi jutsata ruraykäyanqanta tantiyakuyanqa.

20 “Israel runakunatami kanan yaykatsishä unay castankunata awninqä nacionman. Tsaycho lichipis abëjapa mishkinpis yakunörä atska kaptinmi pacha junta mikuyanqa. Werayaskirnami juk dioskunata adorar qonqaskayämanqa. Tsaynö rurarmi paykunawan pactu ruranqätapis cumpliyanqanatsu. 21 Tsaynö kaptinqa kay cantuta paykunata yachatsinki. Tsaynöpami paykunapita aywaraq tsurinkunapis mana qonqaypa cantayanqa. Tsaymi mana cäsukayämanqanpita desgracia päsaptin y llakikuy tsariptin kay yachatsinqä cantukunata cantar jutsata ruraykäyanqanta tantiyakuyanqa. Awninqä nacionman manarä yaykuyaptinmi musyäna imanö kayänanpä kanqantapis”.

22 Tsaynö niptinmi tsay höra cantuta qellqaskir Israel runakunata Moisés yachatsirqan.

23 Tsaypitanami Nunpa tsurin Josuéta Tayta Dios nirqan:^† “Qammi Israel runakunata awninqä nacionman chätsinki. Qamwan kaykaptïqa ama qelanaytsu ni mantsariytsu”.^†

24 Llapan leykunata libruman Moisés qellqaskirmi 25 Tayta Diospa Pactu Babulninta apaq levitakunata nirqan: 26 “Tayta Diosnintsikpa Pactu Babulnin ñöpanman kay libruta churayay. Kay libruqa testïgunömi kanqa jutsaykikunapita Tayta Dios juzgayäshunaykipä. 27 Noqaqa musyämi mana wiyakuq y mana tantiyakuq kayanqaykita. Kawaykaptillärä Tayta Diosta pasaypa ajanaykätsirqa wanuskiptï ¿imatanarä rurayankipis?

28 “Kananqa llapan mayor runakunata y cada trïbupa mandaqninkunata pushamuy Tayta Dios ninqankunata tantiyatsinäpä. Paykunata tantiyatsinqäta ciëlupis y kay patsapis mayarmi testïgu kayanqa. 29 Musyänami wanukuptï Tayta Diosta mana cäsukur tantiyatsinqäkunata qonqäyänaykipä kanqanta. Llutankunata rurar Tayta Diosta pasaypa ajanätsiyanqaykipitami pasaypa ñakayanki”.

30 Tsaynö niskirmi llapan Israel runakunapa ñöpancho kay cantuta qallaykunanpita ushananyaq Moisés liyiparqan: