32
“Ciëlu, kanan cantanqäta wiyamay.Patsa, imata ninqätapis wiyamay.
2 Yachatsinqäkuna imayka tamyanömi runakunaman chanqa.
Willakuynïqa shullyanömi, qewaman chaq chirapanömi y picüyucho shullya takyaranqannömi kanqa.
3 “Tayta Dios munayyuq kanqantami willakushä.
¡Payta llapayki alabayay!
4 Paymi imaykapitapis tsapämantsik.
Imatapis allillatami ruran.
Leyninkunapis allimi.
Manami imaypis llullakuntsu.
Manami jutsata rurantsu.
Rasun kaqllatami parlan.
5 “Tsaynö kaptinpis jutsasapa karmi Tayta Diosta ajanaykätsiyanki.
Paypa wamran kaytapis manami merëciyankitsu.
6 Mana tantiyakuq upa runakuna, ¿imanirtä mal agradecïdu kaykäyanki?
Tayta Diosqa ¿manaku Taytaykikuna kaykan?
Tsaynöpis ¿manaku kamayäshuqniki y kawayta qarayäshuqniki Dios kaykan?
7 “Unay Israel runakuna imanö kawayanqantapis yarpäyay.
Musyayänaykipä taytaykikunata tapukuyay.
Willayäshunaykipä awiluykikunata tapupäyay.
8 Runakunata nacionkunaman rakirmi poderyuq Tayta Dios lindërunkunata churaparqan.†
Tsaynö churarqan Israel runakuna aykapis kayanqanman tupumi.
9 Tsaymi paykunata kuyar yanapananpä akrarqan.
Jacobpita aywaraqkunatami paypa herencian kayänanpä qorirqan.
10 Wayralla tumaykaq tsunyaq jirkachömi paykunata tarirqan.
Kuyaparnin qoriskirmi shumaq yachatsirqan.
Ñawi nïñuntanömi paykunata cuidarqan.
11 Tsaymi qeshun jananpa tumar pushapankunata anka rikanqannö paykunata imaypis yanaparqan.†
12 “Tayta Diosllami paykunata pushamurqan.
Juk dioskunaqa manami yanapayarqantsu.
13 Llapanta vinciyänanpä yanaparmi jallqakunapa pushamurqan.
Jirka jachakunapa wayuyninta mikuyänanpämi kamariparqan.
Paykunata qarananpämi mieltapis aceititapis qaqapita yarqatsimurqan.
14 Quësuta y cabrapa lichintami kamariparqan.
Basán partichöpis wera carnërukunata, üshakunata y chïvukunatami kamariparqan.
Bendicionninta churaptinmi allinnin kaq trïguta mikuyarqan.
Allinnin kaq üvapita rurashqa vïnutami upuyarqan.
15 “Tsaynö kawarmi Jesurún runakunaa † pasaypa werayäyarqan.
Alläpa werayarmi llushu llushurä kayarqan.
Tsaynö karmi kamaqnin Tayta Diostapis qonqaskiyarqan.
Salvaqnin y tsapaqnin kaptinpis manami cäsukuyarqantsu.
16 Juk dioskunata adorarmi Tayta Diosta ajanätsiyarqan.
17 Sacrificiukunatapis supaykunapä† y manakaq dioskunapämi rupatsiyarqan.
Tsay dioskunataqa unay castankunapis manami imaypis adorayarqantsu.
18 “Israel runakuna, qamkunaqa qonqaykuyashqaykimi imaykapitapis tsapämaqnintsik Tayta Diosta.
Kawayta qaramaqnintsik Tayta Diostami qonqaykuyashqayki.
19 Tsaynö kayaptikimi Tayta Dios ajanashqa.
Wamrankuna kaykarmi tsaynö ajanätsiyashqayki.
20 Tsaymi nirqan:
‘Paykunata manami rikaytapis munätsu.
Mä imanöshi paykuna kawayanqa.
Wamräkuna karpis mana yärakuypä mana alli runakunami kaykäyan.
21 Manakaq dioskunata adorarmi ajanätsiyäman.†
Ïdulukunaman yärakurmi ajanätsiyäman.
Tsaymi jäpa runakunatana yanapar paykunatapis ajanätsishä.
Mana tantiyakuq runakunata chaskirmi paykunata llakikatsishä.†
22 Imayka nina lunyaqnörämi pasaypa ajanaykä.
Patsa rurinyaq y jirkakunapa cimientunyaqmi ajananqä chanqa.
Tsaymi chakrakunachöpis mikuykuna wayunqanatsu.
23 Paykunataqa imaykanöpami castigashä.
Wakpita kaypitami flëchäkunatapis chätsishä.
24 Mallaqayta, fiebrita y pesti qeshyatami paykunata ushananpä kachamushä.
Chucaru uywakunata y venënuyuq culebrakunatami yuritsimushä.
25 Cällikunachöpis espädawanmi wanutsiyanqa.
Wayinkunachöpis pasaypami mantsariyanqa.
Chölupis, jipashpis, llullupis awkinpis wanuyanqami.
26 “ ‘Maytsay nacionkunamanmi qarquyta yarpashqä.
Imaypis kawayanqanta pipis mana musyananpämi ushakätsiyta yarpashqä.
27 Tsaynö kaptinpis contrankuna kushipäyänanta manami munätsu.
Tsaynöpis manami munätsu contrankuna allish tukur niyänanta:
“Tayta Diosnin tsapaykaptinpis noqantsikmi ushakätsishqantsik” ’.
28 “Israel runakunapaqa yarpayninkunapis manami kantsu.
Imata rurayanqantapis manami tantiyakuyantsu.
29 Kanan ninqäkunata tantiyakuyaptin ima allirä kanman.
Ushakäyänanpä kanqanta tantiyakuyaptin allimi kanman.
30 Tayta Dios mana yanapaptinqa ¿imanöparä juk runalla juk waranqa (1,000) runakunata qatikachanman?
Tsaynöpis ¿imanöparä ishkaq runalla chunka waranqa (10,000) runakunata qatikachäyanman?
Tsaynöllami contrankunata Tayta Dios yanapaptin Israel runakunata qatikachar vinciyarqan.
31 “Contrantsik runakunapa diosninkunaqa manami Diosnintsiknötsu kaykan.
Tsaytaqa paykunapis musyayanmi.
32 Contrantsik runakunaqa Sodomacho y Gomorracho taq runakunanömi kaykäyan.
Pochquq y venënuyuq üvata wayuq chakranömi kaykäyan.
33 Tsay üvapita rurashqa vïnupis culebrapa venënunnömi kaykan.
34 “Paykunapämi Tayta Dios nin:
‘Jutsata rurayanqankunata manami qonqätsu.
Qonqänäpä kanqantachi yarpaykäyan.
35 Llutanta rurayanqanpita kikïmi juzgashä.†
Mana kuyapaypa ushakätsinäpämi jutsankuna tinkuykanna.
Höran chaykämunnami paykunata juzganäpä’.
36 “Kuyanqan runakunataqa kallpan ushakaptinpis Tayta Diosmi yanapanqa.
Payta sirviqkunatami ushakäyänanpä kaptinpis kuyapanqa.†
37 Tsaymi Tayta Dios ninqa:
‘¿Maytä imapitapis tsapäyäshunaykipä yärakuyanqayki diosnikikuna?
38 Uywakunapa wiranta qarayanqayki y vïnuta upunanpä wiñapanqayki diosnikikuna ¿maychötä kayan?
¡Kanan sharkayämutsun yanapayäshunaykipä!
¡Shäyämutsun washäyäshunaykipä!
39 Noqallami Tayta Dios kaykä.
Noqapita juk diosqa manami kantsu.
Noqami munayyuq kaykä pitapis kawayta qaranäpä y kawayta qechunäpäpis.
Noqami pitapis qeshyatsï y alliyätsï.
Makïpita manami pipis qeshpintsu.
40 Imayyaqpis kawaq Dios karmi makïta ciëluman joqarkur jurar nï:
41 Conträkunata juzganäpä chipipiqtarämi espädäta afilashä.
Chikimaqnïkunataqa jama jamaykurmi castigashä.
42 Paykunata wanutsiptï flëchäkunapis yawarllanami kanqa.
Espädäpis aytsankunatami roqunqa.
Tsaynömi wanuyanqa guërracho pelyarpis o prësu tsarishqa karpis.
Mandaqninkunapa umantapis espädämi roqunqa’.
43 “Maytsay nacioncho taqkuna,
Tayta Dios kuyanqan runakunawan juntu kushikuyay.†
Payta sirviq runakunata wanutsiyanqanpita kikinkunatami ushakätsinqa.†
Kuyanqan runakunata perdonarmi nacionnintapis purificanqa”.
Ushanan yätsikuykuna
44 Tsay cantutami Numpa tsurin Josuéwan aywaykur llapan Israel runakunata Moisés liyiparqan. 45 Liyipayta ushaskirmi Israel runakunata 46 nirqan: “Kanan junaq tantiyatsinqäta shumaq tantiyakuyay. Yachatsinqä leykunata cumpliyänanpä tsurikikunata yachatsiyay. 47 Kay leykunataqa manami manakaqllapätsu yachatsishqä, tsaypa trokinqa tsaykunata cumplir alli kawayänaykipämi. Tsay leykunata cumplirqa Jordán mayuta tsimparmi herenciata chaskir atska wata tsaycho kawayanki”.
Tayta Dios awninqan nacionta Moisés rikanqan
48 Tsay junaqmi Moisésta Tayta Dios nirqan: 49 “Moab nacioncho kaykaq Abarim jirkakunaman aywar Nebo jirkaman witsay. Tsayqa kaykan Jericó marka tsimpanchömi. Tsay jirkapitami rikanki Israel runakunata rikatsinäpä kaykaq Canaánta. 50 Hor jirkacho wawqiki Aarón wanunqannömi qampis Nebo jirkacho wanur unay castaykikunawan tinkuq aywakunki. 51 Israel runakunapa ñöpancho wawqiki Aarónwan manami cäsukayämarqaykitsu. Meriba pukyu pashtamuqcho kaykar manami respitayämarqaykitsu. (Tsayqa Zin niyanqan tsunyaq jirkacho kaykaq Cadeschömi karqan.) 52 Tsaynö kanqaykipitami Israel runakunata rikatsinäpä kaykaq nacionta karullapita rikanki. Tsaymanqa manami imanöpapis yaykunkitsu”.†