Moisés bendisanqan
33
Moisésqa Tayta Dios akranqan runami karqan. Paymi manarä wanukur Israel runakunata bendisarnin 2 nirqan:“Tayta Diosmi Sinaí jirkapita shamushqa.
Seirpitami atsikyapämashqantsik.
Parán jirkapitami chipipïmushqa.
Chunka waranqa (10,000) angelninkunawanmi shamushqa.
Ninanörämi leyninpis derëcha kaq makincho chipipïmushqa.
3 Tayta Diosqa kuyanmi akranqan runakunata.
Pay munanqannö kawaq santu runakunataqa makinchömi tsararan.
Paykunaqa Diospa ñöpanmanmi qonqurikuyan.
Tsaychömi tantiyatsinqanta chaskikuyan.
4 Diospa leyninkunataqa Moisésmi willamashqantsik.
Jacobpita aywaraq kashqami tsay leykunaqa herenciantsiknö kaykan.
5 Jesurún runakunapaa † mandaqninkuna llapan trïbukunawan qorikarninmi Tayta Diosta chaskiyarqan mandaqnin rey kananpä”.
6 Rubén trïbu runakunapämi Moisés nirqan:
“Wallkaqlla karpis Rubén trïbu runakunaqa ama ushakäyätsuntsu”.
7 Judá trïbu runakunapämi Moisés nirqan:
“Tayta Dios, Judá trïbu runakuna mañakuyäshunqaykita wiyaykullay.
Paykunataqa mashtakashqa kaptinpis qoriykullay.
Munaynikiwan tsapaykullay.
Contrankunata vinciyänanpä yanapaykullay”.
8 Leví trïbu runakunapämi Moisés nirqan:
“Tayta Dios, Masahcho y Meribacho† yaku pashtamunqan kaqchömi Leví trïbu runakuna cäsukuyäshunqaykita o mana cäsukuyäshunqaykita musyayta munarqayki.
Ninqaykita wiyakuq kayaptinmi paykunata aptatsirqayki Tumimtawan Urimta.†
9 Paykunaqa ninqaykita cäsukurmi pactu ruranqaykita cumpliyarqan.
Mamankunata, taytankunata, wawqinkunata y tsurinkunata kuyayanqanpitapis masmi qamta kuyayäshunki.†
10 Ninqaykikunatapis Jacobpita aywaraq runakunatami tantiyatsiyan.
Leynikikunatapis Israel runakunatami yachatsiyan.
Ñöpaykichömi inciensiuwan qoshnitsiyan.
Altar jananchömi rupatsina sacrificiuta rupatsiyan.
11 Tayta Dios, paykuna sirviyäshunaykipä yanapaykullay.
Paykuna rurayanqan shonquykipänö kaykullätsun.
Chikiqninkuna yarpäyanqankunata manakaqman churaykullay.
Contrankunapis amana shäriyätsunnatsu”.
12 Benjamín trïbu runakunapämi Moisés nirqan:
“Paykunaqa Tayta Dios kuyanqanmi kaykäyan.
Diospa ñöpancho kushishqami kawayan.
Paykunatami imapitapis tsapanqa.
Makillanchömi imaypis tsararanqa”.
13 Josépita aywaraq trïbu runakunapämi Moisés nirqan:
“Paykunapa chakrankunamanqa Tayta Dios bendicionninta churaykullätsun.†
Shumaq ushmananpä ciëlupita shullyatsimutsun.
Qarpakuyänanpä yakutapis patsa rurinpita pashtatsimutsun.
14 Tsaynöpis rupaypa achayninwan mikuyninkuna shumaq poquykullätsun.
Cosëchankunapis tiempullancho shumaq qeshpiykullätsun.
15 Jirkankunachöpis mikuyninkuna alli wayuykullätsun.
Jallqakunachöpis atskata cosechaykuyällätsun.
16 Chakrankunapis alli chakra kaykullätsun.
Mikuyninkunapis alli wayuykullätsun.
Rupaykaq shirakacho yuripäkuq Tayta Dios paykunata kuyapaykullätsun.
Josétami llapan wawqinkunapita mandaq kananpä akrarqan.
Josépita aywaraq trïbu runakunapä kay bendición kaykullätsun.
17 Punta yuriq töru kallpasapa kanqannömi kallpasapa kaykäyan.
Waqrakuq töru runakunata waqrar ushanqannömi maytsay nación runakunatapis vincir ushayanqa.
Yupaytapis mana atipaypä Efraín runakunaqa tsaynömi kayanqa.
Yupaytapis mana atipaypämi Manasés runakunapis tsaynö kayanqa”.
18 Zabulón trïbu runakunapä y Isacar trïbu runakunapämi Moisés nirqan:
“Zabulón trïbu runakuna maypapis purir kushikuyätsun.
Isacar trïbu runakuna toldunkunacho alli kawayätsun.
19 Paykunaqa täyanqanlächo jirkamanmi juklä runakunata qayatsiyanqa.
Tsaychömi Tayta Dios munanqannö sacrificiukunata rupatsiyanqa.
Tsaynöllami lamarcho atska pescädukunata tsarir kushishqa kawayanqa.
Lamar kuchuncho kaykaq aqusha rurincho tarinqankunawanmi imaykayuq kayanqa”.†
20 Gad trïbu runakunapämi Moisés nirqan:
“Tayta Dios alabashqa kaykullätsun.
Paymi Gad trïbu runakunapa chakrankuna atska kayänanpä yanaparqan.
Paykunaqa cäzaq leonnömi kaykäyan.
Tsaymi vincinqan runapa rikrantapis umantapis pakiyan.
21 Paykunaqa allinnin kaq chakrakunatami tsariyashqa.
Chakrankunaqa soldädukunapa mandaqninkunapa allinnin kaq chakrannömi kaykan.
Israel mayinkunata yanaparmi puntanta aywayarqan.
Llapantapis Tayta Dios tantiyatsinqannöllami cumpliyarqan.
Israel nacionchöqa Tayta Dios munanqantami rurayarqan”.†
22 Dan trïbu runakunapämi Moisés nirqan:
“Dan trïbu runakunaqa Basán partipita yarqamuq malta leonnömi kaykäyan”.
23 Neftalí trïbu runakunapämi Moisés nirqan:
“Neftalí trïbu runakunataqa Tayta Dios kuyanmi.
Paykunataqa atskamanmi bendisarqan.
Qocha kuchunpami chakrankunapis kaykan”.
24 Aser trïbu runakunapämi Moisés nirqan:
“Aser trïbu runakunaqa wakinkunapita masrä bendicionta chaskiyätsun.
Paykunata Israel mayinkuna kuyayätsun.
Chakinkunata llushiyänanpä olïvu aceitipis atska kaykullätsun.
25 Marka yaykuna punkunpa trancankunapis fiërrupita y broncipita rurashqa kaykullätsun.
Wanuyanqanyaq kallpankunapis kaykullätsun”.
26 “Manami ima diospis kantsu Jesurúnpab Diosninnöqa.
Payqa pukutay janallanpami yanapayäshunaykipä shamun.
27 Imayyaqpis kawaq Tayta Diosmi imaykapitapis tsapäyäshunki.
Makinchömi imaypis tsararäyäshunki.
Paymi chikishuqnikikunatapis ñöpaykikunapita qarqun.
Tsaynö qarquptinmi qatikachar ushakätsiyanki.
28 Israel runakunaqa añawllami kawayanqa.
Jacobpita aywaraqkunapis kushishqami kawayanqa.
Chakrankunacho trïgupis üvapis allimi wayunqa.
Tiempullanchömi tamyapis tamyamunqa.
29 Israel runakuna, qamkunatami Tayta Dios kuyayäshunki.
Qamkunanö kushishqa kawaytaqa ¿pirä munanmantsu?
Qamkunataqa Tayta Diosmi salvayäshushqayki.
Paymi imaykapitapis tsapäyäshunaykipä escüdu kaykan.
Paymi contraykikunata vinciyänaykipä espäda kaykan.
Pay yanapayäshuptikimi chikishuqnikikunatapis ushakätsiyanki.
Diosninkunata adorayanqan altarkunatapis chipyaqmi juchutsiyanki”.