Moisés wanunqan
34
Tsaypitanami Moab pampapita Moisés aywar Nebo jirkacho Pisga niyanqan jirkaman witsarqan. Tsay jirkaqa Jericó tsimpanchömi kaykan. Tsay jirkapitami Tayta Dios rikatsirqan Galaad partipita hasta Dan partiyaq. 2 Tsaynöllami rikatsirqan Neftalí partita, Efraín partita, Manasés partita y Judá partita hasta Mediterráneo Lamaryaq. 3 Tsaynöllami rikatsirqan Neguevta y Jordán mayuman aywaq pampakunata Jericó markapita hasta Zoar markayaq. Jericópa jukaq jutinmi karqan Palmëra Marka. 4 Tsaynö rikaskatsirnami Tayta Dios nirqan: “Taqay rikanqayki nacionqa Abrahamta,† Isaacta,† Jacobta† y tsurinkunata awninqä nacionmi kaykan. Karullapitapis rikanaykitami munashqä. Tsaymanqa mananami yaykunkinatsu”.5 Tayta Dios ninqannöllami sirviqnin Moisés tsay jirkacho wanukurqan. Tsay jirkaqa Moab nacionchömi kaykan. 6 Wanuskiptinmi Bet-peor cercancho kaykaq Moab pampallacho pampakurqan. Kananyaq manami pipis musyantsu maynincho pamparanqantapis. 7 Juk pachak ishkay chunka (120) watayuq kaykarmi Moisés wanurqan. Wanunqanyaqpis ñawinqa manami tsakarqantsu ni kallpanpis ushakarqantsu. 8 Wanunqanta musyaskirmi Israel runakuna juk killayaq Moab pampacho lütuyarqan.
9 Manarä wanurmi Nunpa tsurin Josuépa umanman makinta churaykur Tayta Diosta Moisés mañakurqan tantiyakuq kananpä. Tsaymi Tayta Dios ninqannölla Moiséspa trokin Josuétana Israel runakuna respitar cäsukuyarqan.†
10 Tayta Diospa willakuqnin Moisésnöqa manami pipis karqantsu. Paywanmi Tayta Dios imaypis parlayaq.† 11 Paytami Tayta Dios kacharqan Egipto runakunata mantsakaypä castïgukunawan castigananpä. Tsay castïgukunawanmi Faraónta, yanapaqninkunata y llapan Egipto nacionta Tayta Dios castigarqan. 12 Llapan Israel runakuna rikaykaptinmi Tayta Dios munayninwan mantsakaypä castïgukunawan castigarqan.