Amparakuyänanpä markakunata akrayanqan
20
Tsaypitanami Josuéta Tayta Dios nirqan: 2 “Israel runakunata ninki Moisésta ninqänölla amparakuyänan markakunata akrayänanpä. 3 Tsay markakunamanmi runa mayinta mana yarpaypa wanutsiq runa qeshpir amparakunqa. Tsaymanmi qeshpinqa wanuq runapa castankuna venganzata ashir mana wanutsiyänanpä.4 “Amparakuyta munaq kaqqa mayqan amparakuyänan markamanpis chaykur marka yaykuna punkucho mayor runakunawan parlanqa. Tsaychömi paykunata willanqa imanöpa wanupakunqantapis. Tsaymi mayor runakunaqa markaman yaykatsir maynincho tänanpäpis rikatsiyanqa. 5 Contran mana kaykar runa mayinta wanupakushqa kaptinmi wanuqpa legïtimu castankuna qepanta chaptin mayor runakuna entregayanqatsu. 6 Tsaypa trokinqa tsaycho taq runakunami juzgar niyanqa yarpaypa o mana yarpaypa wanutsinqantapis. Mana yarpaypa wanutsinqanta niptinqa tsay markallachömi täkunqa mandaq sacerdöti wanunqanyaq. Tsaypitarämi wayinman kutikunqa”.
7 Tayta Dios tsaynö niptinmi amparakuyänanpä kaq markakunata Israel runakuna akrayarqan Cedesta, Siquemta y Quiriat-arbata. Cedesqa Neftalí trïbu runakuna täyanqan jallqakunacho kaykaq Galileachömi kaykan. Siquemqa Efraín jallqakunachömi kaykan. Quiriat-arbaqa Judá trïbu runakuna täyanqan jallqakunachömi kaykan. Quiriat-arbapa jukaq jutinmi kaykan Hebrón. 8 Jericóta päsar Jordán mayu wak tsimpachömi akrayarqan Beserta, Ramotta y Golánta. Beserqa Rubén trïbu runakuna täyanqan tsunyaq pampachömi kaykan. Ramotqa Galaadchömi kaykan. Golánqa Basánchömi kaykan. Basánqa Manasés trïbu runakuna täyanqanchömi kaykan.
9 Tsay markakuna karqan Israel runakuna y Israel runakunacho taq jäpa runakunapis mana yarpaypa runa mayinta wanutsiyanqanpita amparakuyänanpämi. Tsayman amparakuptinmi wanuqpa castankuna venganzata ashir wanutsiyanqatsu. Tsaycho taq runakunanami qorikaykur tsay runata juzgayanqa yarpaypa o mana yarpaypa wanutsinqantapis musyayänanpä.