3 Tsaynö niyaptinmi Tayta Dios ninqannölla Israel runakuna rakipäyarqan markakunata y jallqakunatapis.

4 Puntatami suertita jitayarqan sacerdöti Aarónpita aywaraqkuna markankunata chaskiyänanpä. Aarónpita aywaraq Coat casta wakin runakunami chunka kimsa markakunata chaskiyarqan. Tsay markakunaqa kayarqan Judá trïbu, Simeón trïbu y Benjamín trïbu chaskiyanqan herenciakunachömi. 5 Coat casta wakin runakunanami chunka markakunata chaskiyarqan. Tsay markakunaqa Efraín trïbu, Dan trïbu y pullan Manasés trïbu chaskiyanqan herenciakunachömi karqan.

6 Tsaypitanami suertita jitayarqan Gersón casta runakuna markankunata chaskiyänanpä. Paykunami chunka kimsa markakunata chaskiyarqan. Tsay markakunaqa kayarqan Isacar trïbu, Aser trïbu, Neftalí trïbu y Basáncho kaq pullan Manasés trïbu chaskiyanqan herenciakunachömi.

7 Merari casta runakunanami chunka ishkay markakunata chaskiyarqan. Tsay markakunaqa kayarqan Rubén trïbu, Gad trïbu y Zabulón trïbu chaskiyanqan herenciakunachömi. 8 Moisésta Tayta Dios ninqannöllami Israel runakuna suertita jitaypa Leví trïbu runakunata rakipäyarqan markakunata y uywankunata mitsikuyänanpä jallqakunatapis.

9-10 Leví trïbu Coat casta runakunapä puntata suerti yarqamuptinmi Judá trïbu runakunapa y Simeón trïbu runakunapa herencianpita markakunata rakipäyarqan. 11 Tsaymi paykunata rakipäyarqan Judá trïbu runakuna täyanqan jallqakunacho kaq Quiriat-arbata y ñöpancho kaykaq jallqakunatapis. Quiriat-arbapa jukaq jutinqa Hebrónmi kaykan. Quiriat-arbachömi anaceo runakuna täyarqan. 12 Quiriat-arbapita mas washaqnincho kaykaq jallqakunatawan caseriunkunatami itsanqa Jefonipa tsurin Calebta herencian kananpä Josué rikatsirqan.

13 Sacerdöti Aarónpita aywaraq runakuna chaskiyanqan Hebrón markaqa karqan runa mayinta mana yarpaypa wanutsiq runakuna amparakuyänanpämi. Tsaynöllami chaskiyarqan Libnata, 14 Jatirta, Estemoata, 15 Holónta, Debirta, 16 Aínta, Jutata y Bet-semesta. Tsaymi Judá trïbupita y Simeón trïbupita isqun markakunata chaskiyarqan. Cada markapami mitsikuyänanpä jallqankuna karqan. 17 Benjamín trïbupitami chaskiyarqan Gabaónta, Gebata, 18 Anatotta y Almónta. Tsaymi Benjamín trïbupita chusku markakunata chaskiyarqan. Cada markapami mitsikuyänanpä jallqankuna karqan. 19 Tsaynöpami Aarónpita aywaraq sacerdötikuna chunka kimsa markakunata jallqankunatawan chaskiyarqan.

20 Coat casta wakin Leví trïbu runakunanami Efraín trïbu chaskinqan herenciacho markankunata chaskiyarqan. 21 Paykunami chaskiyarqan Efraín jallqakunacho kaykaq Siquemta. Siquemqa runa mayinta mana yarpaypa wanutsiq runakuna amparakuyänanpä markami karqan. Tsaynöllami Gezerta, 22 Kibsaimta y Bet-horónta chaskiyarqan. Tsay chusku markakunapami mitsikuyänanpä jallqankuna karqan. 23 Dan trïbupitami Eltequita, Gibetónta, 24 Ajalónta y Gat-rimónta chaskiyarqan. Tsay chusku markakunapami mitsikuyänanpä jallqankuna karqan. 25 Pullan Manasés trïbupitami Taanacta y Gat-rimónta chaskiyarqan. Tsay ishkay markakunapami mitsikuyänanpä jallqankuna karqan. 26 Tsaynöpami Coat casta wakin Leví trïbu runakuna chunka markakunata jallqankunatawan chaskiyarqan.

27 Gersón casta Leví trïbu runakuna pullan Manasés trïbupitami Basáncho kaykaq Golánta y Beesterata chaskiyarqan. Golánqa runa mayinta mana yarpaypa wanutsiq runakuna amparakuyänanpä markami karqan. Tsay ishkay markakunapami mitsikuyänanpä jallqankuna karqan. 28 Isacar trïbupitami Cisónta, Daberatta, 29 Jarmutta y En-ganimta chaskiyarqan. Tsay chusku markakunapami mitsikuyänanpä jallqankuna karqan. 30 Aser trïbupitami Misaelta, Abdónta, 31 Helcatta y Rehobta chaskiyarqan. Tsay chusku markakunapami mitsikuyänanpä jallqankuna karqan. 32 Neftalí trïbupitami Galileacho kaykaq Cedesta, Hamot-dorta y Cartánta chaskiyarqan. Cedesqa runa mayinta mana yarpaypa wanutsiq runakuna amparakuyänanpä markami karqan. Tsay kimsa markakunapami mitsikuyänanpä jallqankuna karqan. 33 Tsaynöpami Gersón casta Leví trïbu runakuna chunka kimsa markakunata jallqankunatawan chaskiyarqan.

34 Leví trïbu runakunapa ultimu castan Merari castami karqan. Merari casta runakuna Zabulón trïbupitami markankunata chaskiyarqan Jocneamta, Cartánta, 35 Dimnata y Naalalta. Tsay chusku markakunapami mitsikuyänanpä jallqankuna karqan. 36 Rubén trïbupitami Beserta, Jahazata, 37 Cademotta y Mefaatta chaskiyarqan. Tsay chusku markakunapami mitsikuyänanpä jallqankuna karqan. 38 Gad trïbupitami Galaadcho kaykaq Ramot markata chaskiyarqan. Ramotqa runa mayinta mana yarpaypa wanutsiq runakuna amparakuyänanpä markami karqan. Tsaynöllami Mahanaimta. 39 Hesbónta y Jazertapis chaskiyarqan. Tsay chusku markakunapami mitsikuyänanpä jallqankuna karqan. 40 Tsaynöpami Merari casta Leví trïbu runakuna chunka ishkay markakunata chaskiyarqan.

41 Israel runakunapa herenciancho Leví trïbu runakuna chaskiyanqan markakuna chusku chunka puwaqmi (48) karqan. 42 Tsay markakunapa cercancho kaq jallqankunatapis chaskiyarqanmi.

43 Tsaynömi Israel runakunata herenciankunata Tayta Dios rikatsirqan unay castankunata awninqannölla. Tsaymi Israel runakuna yaykur tsaychöna täyarqan. 44 Tayta Dios yanapaptinmi contran runakuna imanöpapis ichipayta kamäpakuyarqantsu. Tsaynöpami Abrahamta, Isaacta y Jacobta Tayta Dios unay awninqannö Israel runakunaqa añawna täkuyarqan. 45 Israel runakunata awninqantaqa llapantami mana qonqaypa Tayta Dios cumplirqan.