Rubén, Gad y pullan Manasés trïbu runakuna herenciankunaman kutiyanqan
22
Tsaypitanami Josuéqa Rubén trïbu, Gad trïbu y pullan Manasés trïbu runakunata qayaykur 2 nirqan: “Tayta Diospa sirviqnin Moisés niyäshunqaykita llapantanami cumpliyashqayki. Noqa ninqäkunatapis llapantami wiyakuyashqayki. 3 Kananyaqmi Israel mayintsikkunata mana jaqiypa yanapayashqayki. Tayta Diosnintsikpa mandamientunkunata llapantami cumpliyashqayki. 4 Tsaymi kananqa Tayta Diosnintsik awnimanqantsiknölla Israel mayintsikkunata jamayman yaykatsishqa. Tsaynö kaykaptinqa Jordán mayuta tsimpar Tayta Diospa sirviqnin Moisés rikatsiyäshunqayki herenciaykikunaman kutikuyay.† 5 Itsanqa yätsimanqantsiknölla llapan yachatsimanqantsik leykunata mana qonqaypa cumpliyanki. Tayta Diosnintsikta kuyar pay munanqannölla llapayki kawayanki. Tsaynöpis ninqankunata cumplir llapan shonquykikunawan y llapan voluntänikikunawan payta sirviyanki”.6 Tsaynö yätsiskirmi alli kawayänanpä bendicionta Josué qararqan. Nirkurnami cada ünun wayinkunapa kutikuyänanpä despacharqan.
7 Jordán mayuta Israel runakuna manarä tsimpayanqan witsanmi Basán partita pullan Manasés trïbu runakunata Moisés rakiparqan herenciankuna kananpä. Wakin Manasés trïbu runakunatanami herenciankunata Josué rakiparqan Jordán mayuta tsimpaskir. Tsay tsimpachömi wakin Israel runakunapis herenciata chaskiyarqan. Basán partiman kutikuyänanpämi pullan Manasés trïbu runakunatapis bendisar Josué 8 nirqan: “Vinciyanqayki runakunapita imaykankunata qechuyanqaykiwan imaykayuqyashqami kutiykäyanki. Atskatami uywatapis, qoritapis, qellaytapis, broncitapis, fiërrutapis y latsapakunatapis apaykäyanki. Tsaynö kaykaptinqa markaykikunaman chaykur marka mayikikunata rakipäyanki”.
9 Tsaynö niptinmi Rubén trïbu, Gad trïbu y pullan Manasés trïbu runakuna Israel mayinkunawan Silucho kaykäyanqanpita Galaadman kutikuyarqan. Moisésta Tayta Dios ninqannöllami paykunapa herenciankuna Galaadcho karqan.
Jordán mayu kuchuncho altarta rurayanqan
10 Rubén trïbu, Gad trïbu y pullan Manasés trïbu runakunami kutiykäyanqancho Jordán mayu kuchunman chaykur Canaánllachörä jatunkaray altarta pirqayarqan. 11 Tsay altarta pirqayanqanta wakin kaq Israel runakuna musyaskirmi 12 Tayta Diospa contran shäriyanqanta yarpäyarqan.† Tsaymi altarta pirqaq runakunawan pelyaq aywayänanpä Siluman qorikäyarqan. 13 Manarä pelyaq aywarmi sacerdöti Eleazarpa tsurin Fineesta Galaadman kachayarqan Rubén trïbu, Gad trïbu y pullan Manasés trïbu runakunawan parlayänanpä. 14 Fineeswanmi Israel runakunapa chunka mandaqninkunapis aywayarqan. Paykunaqa cada trïbupa mandaqninkunami kayarqan.
15 Galaadman chaykurmi Rubén trïbu runakunata, Gad trïbu runakunata y pullan Manasés trïbu runakunata niyarqan: 16 “Israel mayintsikkuna llapanpis musyaytami munaykäyan imanir Tayta Diosta mana cäsukunqaykita y imanir paypa contran shärir juk altarta rurayanqaykita. 17 ¿Manaku yarpäyanki jutsa ruraqkunata Peorcho Tayta Dios ushakätsinqanta?† Jutsata rurayanqanpita manami kananyaqpis shumaqllaqa purificashqarätsu kaykantsik. 18 ¿Imanirtä qamkunapis Tayta Diospa contran shärir tsay altarta rurayashqayki? Tsaynö rurayanqaykipita Tayta Dios pasaypa ajanar llapantsiktami castigamäshun.
19 “ ‘Herenciayki impüru kanqanta yarparqa täyänaykipä noqakuna täyanqä kaqman shakayämuy. Tsaychömi Tayta Diospa Sagrädu Toldunpis kaykan. Shakamurqa noqakuna kaqchömi qamkunapis herenciaykikunata chaskiyanki. Imanö karpis juk altartaqa ama rurayankimantsu karqan. Juk altarta rurarqa Tayta Diosnintsikpa contran y noqakunapa conträkunami shäriykäyanki. 20 Ama qonqäyaytsu Zerapa tsurin Acán rupatsinanpä kaqkunata pakar jutsata ruranqanta. Tsaynö ruranqanpitami Tayta Diosqa llapantsikwan pasaypa rabyakurqan.† Acánqa manami kikillantsu jutsata ruranqanpita wanurqan, sinöqa wakin Israel mayintsikkunapis wanuyarqanmi’ ”.
21 Tsaynö niptinmi Rubén trïbu, Gad trïbu y pullan Manasés trïbu runakunaqa Israel mayinkuna kachayanqan mandaqkunata niyarqan: 22 “¡Tayta Diosllami Dios kaykan! ¡Paypita masqa manami Dios kantsu! Paypa contran mana shäriyanqätaqa Tayta Diosmi musyan. Juk diosta adorayta yarpar tsay altarta rurashqa kayaptïqa mana kuyapaypa wanutsiyämay. 23 Tayta Diospa contran shärir rupatsina sacrificiuta, tsaki mikuy ofrendakunata o alli päsakuy sacrificiuta rupatsiyänäpä tsay altarta rurashqa kayaptïqa kikin Tayta Dios juzgayämätsun.
24 “Waray warantin noqakunapita aywaraqkunata qamkunapita aywaraqkuna capazchi michar niyanman: ‘Qamkunaqa ¿imanirtä yarpäyanki noqakuna adorayanqä Tayta Dios qamkunapapis Diosnikikuna kanqanta? 25 Noqakuna adorayanqä Tayta Diosmi Jordán mayuta churashqa rakimänantsikpä. Tsaymi qamkunaqa, Rubén trïbu y Gad trïbu kar, adorayanqä Tayta Diosta adorayankimantsu’. Tsaynö michäyaptinqa Tayta Diosta manami tsurïkuna adorayanqanatsu.
26 “Tsaynö mana kananpämi tsay altartaqa rurayashqä. Manami rupatsina sacrificiuta ni alli päsakuy sacrificiuta tsaycho rupatsiyänäpätsu rurayashqä, 27 tsaypa trokinqa noqakunapita aywaraqkuna Tayta Diosta imaypis mana qonqaypa adorayänanpämi. Tsaynöpami noqakunapita aywaraqkuna rupatsina sacrificiuta, alli päsakuy sacrificiuta y wakin sacrificiukunatapis Sagrädu Tolduman Tayta Diospä rupatsiq aywayaptin qamkunapita aywaraqkuna michäyanqatsu. 28 Pipis tsaynö michaptinqa kaynömi niyanqa: ‘Rikayay unay castäkuna Tayta Diospa altarnin niraqta rurayanqanta. Tsay altarta rurarpis manami rupatsina sacrificiuta ni wakin sacrificiuta rupatsiyänäpätsu rurayarqan, tsaypa trokinqa noqakunapis qamkunanö Tayta Diosta sirviyanqäta musyayänaykipämi’. Pipis michaptin tsaynömi niyanqa. 29 Noqakuna manami yarpäyätsu juk altarta rurarpis Tayta Diospa contran shäriyta. Tayta Diosnintsikpa altarnin Sagrädu Toldun ñöpancho mayna kaykaptinqa ¿imapänatä rupatsina sacrificiuta, tsaki mikuy ofrendata y wakin sacrificiuta rupatsiyänäpä juklächo altarta rurayäman?”
30 Tsaynö niyaptinmi sacerdöti Finees y Israel runakunapa mandaqninkunapis tantiyakuyarqan paykuna allita rurayanqanta. 31 Tsaymi sacerdöti Eleazarpa tsurin Finees nirqan: “Allita yarpar tsay altarta rurayanqaykita tantiyarmi kanan musyayä Tayta Dios noqantsikwan kaykanqanta. Tsaynö kaptinqa Tayta Dios manami castigamäshuntsu”.
32 Tsaypitanami Finees y paywan aywaq runakuna Galaadpita Canaánman kutikuyarqan. Wakin Israel runakuna kaykäyanqanman chaykurmi willayarqan Rubén trïbu runakuna y Gad trïbu runakuna imata niyanqantapis. 33 Tsaynö willayaptinmi kushikurnin Tayta Diosta alabayarqan. Tsay junaqpitaqa mananami willanakuyarqannatsu Rubén trïbu runakunata y Gad trïbu runakunata ushakätsiq aywayänanpä.
34 Rubén trïbu y Gad trïbu runakunaqa tsay altarta jutitsiyarqan Yarpätsikuq jutin kananpämi. Tsaynö jutitsiyarqan: “Kay altarmi runakunata yarpätsinqa noqantsikpis Tayta Diosta adoraykanqantsikta”.