Israel runakunata Josué yätsinqan
23
Tayta Dios yanapaptinmi contran runakunata ushakaskatsir Israel runakuna atska watana añaw kawayarqan. Josué awkinna kaykarmi 2 Israel runakunata, mayor runakunata, mandaqkunata, juezkunata y soldädukunapa mandaqninkunata qayaykatsir nirqan: “Rikayämanqaykinöpis noqaqa awkinnami kaykä. 3 Rikayashqaykimi kay nacioncho taq runakunata Tayta Diosnintsik imanö ushakätsinqantapis. Paymi noqantsik raykuq pelyashqa. 4 Trïbunpa trïbunpa chaskinantsikpämi tsay runakuna täyanqan partikunata suertita jitaypa rakipashqä. Manami qechunqantsik markakunallatatsu rakipashqä, tsaypa trokinqa qechuypä kaqkunatapis Jordán mayupita qallaykur hasta Mediterráneo Lamaryaqmi rakipashqä. 5 Tsay qechuypä kaq markakunacho tänantsikpämi tsaycho taq runakunata Tayta Diosnintsik qarqunqa. Tsaymi Tayta Diosnintsik awninqannö tsay markakunata chaskiyanki.6 “Tsaynö kaykaptinqa Moisés qellqanqan librucho leykuna ninqanta juktapis mana qonqaypa llapanta cumpliyanki. 7 Kay markakunacho taykaq jäpa runakunawanqa ama takukäyankitsu. Tsaynöpis paykuna adorayanqan dioskunata ama adorayankitsu ni sirviyankitsu ni jutincho imatapis ama awniyankitsu ni jutinkunata imapäpis joqariyankitsu. 8 Tayta Diosnintsikta kanan cäsukuyanqaykinölla imaypis cäsukuyanki.
9 “Kaycho tänantsikpämi jatusaq markakunacho taq tsaytsika runakunata Tayta Dios ushakätsishqa. Pay yanapamashqami kananyaq pipis ichipämashqantsiktsu. 10 Awnimanqantsiknölla noqantsik raykuq pelyaptinmi† qamkunaqa juk runalla karpis juk waranqa (1,000) runakunata qatikachar ushakätsiyanki.† 11 Tsaynö kaykaptinqa llapan shonquykikunawan Tayta Diosnintsikta kuyar pay munanqannö imaypis kawayay.
12 “Mana wanutsiyanqayki runakunawan takukar tsurikikuna paykunapa tsurinkunawan täyaptinqa 13 Tayta Diosnintsik tsay runakunata manami qarqunqatsu. Tsaypa trokinqa tsay runakuna qamkunapä kayanqa mällanö, trampanö, lätigunö y ñawikicho jatiraykaq kashanömi. Tsaynöpami maypis täkuypä nacionnintsikman churashurnikipis Tayta Diosnintsik llapaykikunata ushakätsiyäshunki.
14 “Noqaqa wanukunäpänami kaykä. Tsaynö kaptinpis musyayankimi llapan awnimanqantsikkunata Tayta Diosnintsik cumplinqanta. Tsaynö cumplinqantaqa imaypis ama qonqäyaytsu. 15 Tayta Diosnintsik yanapayäshunaykipä awniyäshunqaykita cumplinqannöllami mana cäsuyaptiki ushakätsiyäshunaykipä niyäshunqaykita cumplinqa. Tsaymi rikatsiyäshunqayki alli nacioncho ni jukllayllapis quëdayankitsu. 16 Noqantsikwan Tayta Diosnintsik pactu ruranqanta mana cumplir juk dioskunata adorar sirviyaptikiqa Tayta Diosmi pasaypa rabyakunqa. Tsaymi mana yarpashqata kay entregayäshunqayki alli nacioncho täyaptikipis ushakätsiyäshunki”.