Josué despidikunqan
24
Tsaypitanami mayor runakunata, mandaq runakunata, juezkunata, autoridäkunata y llapan Israel trïbu runakunata Siquem markaman Josué qayatsiptin llapanpis Tayta Diospa ñöpanmana qorikäyarqan. 2 Tsaychömi Josué nirqan: “Tayta Diosmi nin: ‘Unay castaykikuna Tarémi† tsurin Abrahamwan y Nacorwan Éufrates mayu wak tsimpancho täyarqan. Tsaycho tarmi paykunaqa juk dioskunata adorayarqan. 3 Tsaycho taykaptinmi Abrahamta pushamurqä Canaánman.† Tsaychömi tsurin Isaac yurirqan. Atskaman mirayänanpämi Isaacpita aywaraqkunata alli rikarqä.† 4 Isaacpa tsurinkunami kayarqan Jacobwan Esaú.† Esaúpita aywaraqkuna täyänanpämi rikatsirqä Seir jallqakunata.† Jacobnami tsurinkunawan Egiptuman aywakuyarqan tsaycho täyänanpä.†5 “ ‘Unay awiluykikuna Egiptucho taykäyaptinmi paykunata jipiyämunanpä Moiséstawan Aarónta kacharqä. Kachämuyta mana munayaptinmi Egipto runakunata pasaypa castigarqä.† 6 Tsaynöparämi kachapäyämurqan awiluykikuna Egiptupita yarqayämunanpä. Shamuykäyaptinmi Egipto soldädukuna carrëtankunawan y cawallunkunawan Puka Lamaryaq qatipäyämurqan. 7 Mantsarir awiluykikuna mañakayämaptinmi Egipto runakuna mana rikayänanpä tsakätsirqä. Lamar yakucho Egipto runakuna shenqaypa wanuyänanpäpis jundikätsirqämi. Egiptucho tsaykunata ruranqäta rikayarqaykimi. Tsaypita yarqamurmi atska wata tsunyaq jirkacho täyarqayki.
8 “ ‘Nirkurmi pushamurqä Jordán mayu tsimpan amorreo runakuna taykäyanqanman. Amorreo runakuna contrayki shärir atacayäshuptikipis qamkunatami yanaparqä paykunata ushakätsir nacionnintapis qechuyänaykipä.† 9 Tsaypitanami Ziporpa tsurin Balac qamkunawan pelyananpä kamarikurqan. Paymi moabita runakunapa mandaqnin rey kar Beorpa tsurin Balaamta qayatsirqan maldicionayäshunaykipä. 10 Tsaynö kaptinpis Balaam maldicionayäshunaykita manami munarqätsu. Tsaymi maldicionashunaykipa trokinqa bendicionta chaskiyänaykipä Balaam nirqan. Tsaynömi qamkunata salvarqä.†
11 “ ‘Tsaypitanami Jordán mayuta tsimpamur† Jericóman chäyämurqayki. Jericócho taq runakuna qamkunawan pelyaptinpis paykunata vinciyänaykipämi yanaparqä.† Tsaynömi amorreo runakunata, ferezeo runakunata, cananeo runakunata, heteo runakunata, gergeseo runakunata, heveo runakunata y jebuseo runakunata ushakätsiyänaykipä yanaparqä. 12 Amorreo runakunapa ishkay mandaqnin reykunatapis manami espädaykikuna ni flëchaykikuna kanqanpitatsu vincir ushakätsiyarqayki, tsaypa trokinqa kikï yanapaptïmi. 13 Tsaynöllami chakrakunatawan wayikunata listullatana kamariparqä. Tsaymi tsay wayikunachöna taykäyanki y juk plantanqan üvakunatawan aceitünasta mikuykäyanki’ ”.†
14 Nirkurnami mastapis Josué nirqan: “Kananqa Tayta Diospita mantsapakur pay munanqannö imaypis kawayanki. Éufrates mayu wak tsimpancho tarnin y Egiptucho tarnin unay castantsikkuna adorayanqan dioskunata ama adorayankitsu. Tsaypa trokinqa Tayta Diosllata adorar payllatana sirviyanki. 15 Tayta Diosta sirviyta mana munarqa kanan akrayay pita sirviyänaykipä kanqantapis. Éufrates mayu wak tsimpancho unay castantsikkuna sirviyanqan dioskunata o kaycho taq amorreo runakuna sirviyanqan dioskunata sirviyaptikipis noqami itsanqa wayïcho taqkunawan Tayta Diosllata imayyaqpis sirviyäshä”.
16 Tsaynö niptinmi Israel runakuna niyarqan: “Noqakunaqa Tayta Diosllatami imaypis sirviyäshä. Juk dioskunataqa manami sirviyäshätsu. 17 Kikin Tayta Diosnintsikmi unay castantsikkunata y noqantsiktapis Egiptucho wätay kanqantsikpita jipimarqantsik. Kikintsikmi rikashqantsik imaykaläya milagrukunata ruranqanta. Wakin markakunata päsamunantsikpäpis paymi imapitapis tsapämashqantsik. 18 Kanan taykanqantsik markakunacho taq amorreo runakunata y wakin runakunatapis Tayta Diosnintsikmi qarqur ushakätsishqa. Tsaynö yanapamanqantsikpitami payta imaypis sirvishun. Payllami Tayta Dios kaykan”.
19 Josuénami nirqan: “Ajarämi kaykan Tayta Diosta sirviyänaykipäqa. Payqa santu y castigakuq karmi jutsa ruraqkunata jananpantsu. 20 Tayta Diosta sirviykäyanqaykicho juk dioskunata adorayaptikiqa yanapakuq karpis castigayäshurnikimi ushakätsiyäshunki”.
21 Tsaynö niptinmi Israel runakuna Josuéta niyarqan: “Noqakunaqa Tayta Diosllatami imaypis sirviyäshä”.
22 Josuénami nirqan: “Kikikikunami nikäyanki Tayta Diosllata imaypis sirviyänaykipä kanqanta”.
Paykunanami niyarqan: “Awmi, taytay”.
23 Josuénami nirqan: “Tsaynö kaptinqa katsiyanqayki ïdulukunata pakir Tayta Diosllatana llapan shonquykikunawan imaypis adorayay”.
24 Israel runakunanami niyarqan: “Noqakunaqa Tayta Diosnillantsikta sirvirmi pay ninqallanta imaypis cäsukuyäshä”.
25 Tsaynami Josué tsay junaq Israel runakunawan Siquem markacho pactuta rurar yätsirqan Tayta Diospa estatütunkunata y leyninkunata imaypis cumpliyänanpä. 26 Llapan yätsinqankunatami Josué qellqarqan Tayta Diospa leyninkunata qellqanqan libruman. Tayta Diosta imaypis sirviyänanpä parlanqankunata yarparäyänanpämi encina jacha chakinman jatun wankata jawitsirqan. Tsay jacha ñöpanchömi Tayta Diospa Sagrädu Toldun karqan.
27 Nirkurnami runakunata Josué nirqan: “Kay wankami testïgu kaykan Tayta Diosnintsik imata nimanqantsikkunapitapis. Tsaynöllami testïgu kaykan payta imaypis sirviyänaykipä awniyanqaykita. Tayta Diosta sirviyänaykipä nikarpis mana cumpliyaptikiqa kay wankami shimpiyäshunki Tayta Dios castigayäshunaykipä”.
28 Tsaynö tantiyaskatsirmi markankunapa kutikuyänanpä runakunata Josué despacharqan.
Josué wanunqan
29 Tsaypita manaräpis unaytami juk pachak chunka (110) watayuq kaykar Tayta Diospa sirviqnin Josué wanukurqan. 30 Wanuykuptinmi Timnat-seracho kikinpa chakranman pampayarqan.† Tsayqa karqan Gaas jirka norti kaqläpa y Efraín jallqakunachömi.
31 Josué y Egiptupita wakin yarqamuqkunapis rikayarqanmi Israel runakunata yanapar milagrukunata Tayta Dios ruranqanta. Tsaymi paykuna kawayanqanyaq Israel runakuna Tayta Dios munanqannö kawayarqan.
Josépa tullunkunata Israel runakuna pampayanqan
32 Israel runakunaqa Josépa tullunkunata Egiptupita apayämunqanta† Siquem markaman apaykurmi chakranman pampayarqan. Tsay chakrataqa Josépa taytan Jacobmi rantirqan juk pachak (100) qellaywan Hamorpa tsurinkunapita.† Hamorqa Siquempa taytanmi karqan. Tsay chakratami Josépa tsurinkunapita aywaraqkunapa herencian kananpä entregarqan.
Eleazar wanunqan
33 Aarónpa tsurin Eleazar wanuykuptinnami tsurin Fineespa chakranman pampayarqan. Tsayqa Efraín jallqakunacho kaykaq Gibeachömi kaykan.