Simeón trïbu runakunapa lindërunkuna maypa kanqanpis
19
Herenciata rakipänanpä yapay suertita jitaptinmi Simeón trïbu ayllukunapä yarqamurqan. Tsaymi Simeón trïbu runakuna herencianta chaskiyarqan Judá trïbu runakunapa herencianpa chawpincho. 2 Tsaymi paykunapa markankuna karqan Beerseba, Seba, Molada, 3 Hazar-sual, Bala, Ezem, 4 Eltolad, Betul, Horma, 5 Siclag, Bet-marcabot, Hazar-susa, 6 Bet-lebaot y Saruhén. Tsay particho chunka kimsa markakunami caseriunkunawan karqan.7 Wakin chaskiyanqan markakunami karqan Aín, Rimón, Eter y Asán. Tsay particho chusku markakunami caseriunkunawan karqan. 8 Sur kaqläpa wakin kaq markakunapis Simeón trïbu runakunapämi hasta Baalat-beeryaq karqan. Baalat-beerpa jukaq jutinqa Neguev Ramatmi kaykan.
Tsaynömi Simeón trïbu runakuna castanpa castanpa herenciata chaskiyanqan markakunapis caseriunkunapis karqan.† 9 Simeón trïbu runakunapa herencianqa Judá trïbu runakunapa herencianpa chawpinchömi karqan. Tsaynö karqan Judá trïbu runakunapa herencian alläpa jatun kaptinmi.
Zabulón trïbu runakunapa lindërunkuna maypa kanqanpis
10 Herenciata rakipänanpä yapay suertita jitaptinmi Zabulón trïbupa ayllunkunapä yarqamurqan. Paykunapa herencianqa charqan hasta Saridyaqmi. 11 Saridpita rupay jeqanan kaqläpa aywarmi lindërun Maraläpa päsarqan hasta Dabesetyaq. Tsaypitami Jocneam tsimpancho kaykaq raqraman charqan. 12 Saridpita rupay yarqamunan kaqläpanami lindërun Quislot-taborpa päsar Daberatyaq charqan. Tsaypitanami witsararqan Jafíaman. 13 Nirkurmi päsarqan Gat-heferpa, Ita-cazínpa y Rimónpa. Rimónpitami Neapa tumarqan. 14 Norti kaqläpanami lindërun tumar Hanatónpa päsarqan. Nirkurmi Jefte-el pampapa charqan. 15 Tsay herenciacho kaq markakunami karqan Catat, Naalal, Simrón, Idala, Belén y wakin markakunapis. Paykunapa markankunaqa chunka ishkaymi karqan. Tsay markakunapa caseriunkunapis karqanmi. 16 Tsaynömi Zabulón trïbu runakuna castanpa castanpa herencianta chaskiyanqan markakuna y caseriunkuna karqan.
Isacar trïbu runakunapa lindërunkuna maypa kanqanpis
17 Herenciata rakipänanpä yapay suertita jitaptinmi Isacar trïbupa castankunapä yarqamurqan. 18 Paykunapa markankunami karqan Jezreel, Quesulot, Sunem, 19 Hafaraim, Sihón, Anaharat, 20 Rabit, Quisión, Abez, 21 Remet, En-ganim, En-hada y Bet-pases. 22 Lindërunmi päsarqan Taborpa, Sahazimapa y Bet-semespa hasta Jordán mayuman chanqanyaq. Paykunapa markankunaqa chunka soqtami karqan. Tsay markakunapa caseriunkunapis karqanmi. 23 Tsaynömi Isacar trïbu runakuna castanpa castanpa herenciata chaskiyanqan markakuna y caseriunkunapis karqan.
Aser trïbu runakunapa lindërunkuna maypa kanqanpis
24 Herenciata rakipänanpä yapay suertita jitaptinmi Aser trïbupa ayllunkunapä yarqamurqan. 25 Paykunapa markankunaqa karqan Helcat, Halí, Betén, Acsaf, 26 Alamelec, Amad y Miseal. Rupay jeqanan kaqläpami lindërun päsarqan Carmelo jirkapa y Sihor-libnatpa. 27 Tsaypita rupay yarqamunan kaqläpa tumar Bet-dagónpa päsarmi Jefte-el pampayaq charqan. Jefte-el pampachöqa Zabulón trïbu runakunapa lindërunwanmi tinkurarqan. Tsaypita norti kaqläpa tumarmi päsarqan Bet-emecpa y Neielpa hasta Cabulman chanqanyaq. 28 Tsaypita päsarqan Abdónpa, Rehobpa, Hamónpa y Canápa hasta jatunkaray Sidón markaman chanqanyaq. 29 Tsaypita tumararmi lindërun Ramápa päsarqan hasta corralashqa Tiro markayaq. Tsaypitaqa Hosapa päsar Mediterráneo Lamarmanmi charqan. Aser trïbu runakunapa markankunami karqan Mahaleb, Aczib, 30 Uma, Afec Rehob. Paykunapa markankunaqa ishkay chunka ishkaymi (22) karqan. Tsay markakunapa caseriunkunapis karqanmi. 31 Tsaynömi Aser trïbu runakuna castanpa castanpa herencianta chaskiyanqan markakuna y caseriunkunapis karqan.
Neftalí trïbu runakunapa lindërunkuna maypa kanqanpis
32 Herenciata rakipänanpä yapay suertita jitaptinmi Neftalí trïbupa castankunapä yarqamurqan. 33 Paykuna chaskiyanqan herenciapa lindërunqa Helefpitami qallaykurqan. Tsaypita päsarqan Alón-saananimpa, Adami-necebpa, Jabneelpa y Lacumpa hasta Jordán mayuyaq. 34 Rupay jeqanan kaqläpa lindërun Aznot-taborpa päsarmi charqan Hucocyaq. Sur kaqlächömi Zabulón trïbu runakunapa lindërunwan tinkurarqan. Rupay jeqanan kaqläpanami lindërun Aser trïbu runakunapa lindërunwan tinkurarqan. Rupay yarqamunan kaqläpanami lindërun charqan Jordán mayuyaq. 35 Paykunapa corralashqa markankunami karqan Sidim, Zer, Hamat, Racat, Cineret, 36 Adama, Ramá, Hazor, 37 Cedes, Edrei, En-hazor, 38 Irón, Migdal-el, Horem, Bet-anat y Bet-semes. Paykunapa markankunaqa chunka isqunmi karqan. Tsay markakunapa caseriunkunapis karqanmi. 39 Tsaynömi Neftalí trïbu runakuna castanpa castanpa herencianta chaskiyanqan markakuna y caseriunkuna karqan.
Dan trïbu runakunapa lindërunkuna maypa kanqanpis
40 Herenciata rakipänanpä yapay suertita jitaptinmi Dan trïbupa ayllunkunapä yarqamurqan. 41 Paykunapa markankunami karqan Zora, Estaol, Ir-semes, 42 Saalabín, Ajalón, Jetla, 43 Elón, Timnat, Ecrón, 44 Elteque, Gibetón, Baalat, 45 Jehúd, Bene-berac, Gat-rimón, 46 Mejarcón y Racón. Tsaynöllami paykunapä Jope marka cercancho kaykaq partikuna karqan. 47 Tsaynö kaptinpis herencianta Dan trïbu runakuna manami qechuyta kamäpakuyarqantsu. Tsaymi Lesemman witsäyarqan tsaychöna tänanpä. Lesem runakunawan pelyar wanutsirmi tsaychöna täkuyarqan.† Tsay markapa jutintami trukatsiyarqan Dan jutin kananpä. Tsaymi unay castanpa jutin kanqannö markapa jutinpis Dan karqan. 48 Tsaynömi Dan trïbu runakuna castanpa castanpa herencianta chaskiyanqan markakuna y caseriunkunapis karqan.
Josuépis herencianta chaskinqan
49 Herenciankuna rakipayta ushaskiptinmi Nunpa tsurin Josuétapis herencianta Israel runakuna rikatsiyarqan wakin kaq trïbukuna chaskiyanqan herencia chawpincho. 50 Tayta Dios ninqannömi Josué mañakuptin markata rakipäyarqan. Tsaymi chaskirqan Efraín jallqakunacho kaq Timnat-sera markata. Josuéqa tsay markata allitsar wayikunatapis yapay shärirkatsirmi tsaycho tarqan.
51 Israel runakunata herenciata rakipäyänanpämi sacerdöti Eleazar, Josué y Israel runakunapa mandaqninkuna suertita jitayarqan. Tinkuna Toldu punkuchömi Tayta Diospa ñöpancho tsaynö suertita jitayarqan. Tinkuna Tolduqa Siluchömi karqan. Tsaynöpami herenciankunata llapan trïbukunata rakipayta ushayarqan.