3 Tsaymi Israel runakunata Josué nirqan: “Unay castantsikkuna yärakuyanqan Tayta Dios Canaánman chätsimashqantsiknami. ¡Imayyaqrä shuyaräyanki herenciata chaskiyänaykipä! 4 Cada trïbupita kimsa runata akrayay. Paykunatami kachashä chaskiyänaykipä kaq partikunata rikapakayämunanpä. Rikapakamurmi markakuna may maycho kanqantapis qellqayämunqa. Kutiykamurnami qellqayanqanta entregayämanqa lindërunkuna mayninpa kanqantapis musyar cada trïbuta herenciankunata rakipänäpä.

5 “Tsay rikapakuq aywaq runakunami qanchis partiman nacionta rakiyanqa. Itsanqa ama rakiyätsuntsu sur kaqlächo Judá trïbu chaskinqan herenciata ni norti kaqlächo Josépita aywaraq trïbukuna chaskiyanqan herenciata. 6 Qanchis partiman rakiykur markakuna maycho kayanqantapis qellqayämutsun kutiykamur entregayämänanpä. Noqanami Tayta Diosnintsikpa ñöpancho suertita jitashä tsay partikunata rakipänäpä.

7 “Wakin trïbu runakuna herencianta chaskiyaptinpis Leví trïbu runakunaqa manami chaskiyanqatsu. Tsaypa trokinqa sacerdöti kayaptin paykunapa herencian kanqa Tayta Diosta sirviyanqanmi. Tsaynöllami Gad, Rubén y pullan Manasés trïbu runakunaqa herenciata chaskiyashqana. Tsay herenciataqa Tayta Diospa sirviqnin Moisésmi Jordán mayu wak tsimpacho kaykanqantsik witsan rakiparqan”.

8 Nacionta rikapakuqkuna yarquyänanpä kaykaptinmi Josué nirqan: “Manarä rakipanqä partikunata tumamur markakuna maycho kanqantapis qellqayämunki. Ushaskir kay Siluman kutiyämunki qellqayanqaykita entregayämänaykipä. Noqanami Tayta Diospa ñöpancho suertita jitashä tsay partikunata rakipänäpä”.

9 Tsaymi tsay runakuna aywar manarä aypunqan partikunata entërupa rikapakur tumayämurqan. Qanchis partiman rakiskirmi qellqayarqan markakuna may maycho kanqantapis. Nirkurnami Josué kaykanqan Siluman kutiyarqan. 10 Josuénami Silullacho Tayta Diospa ñöpancho suertita jitarqan cada partita mayqan trïbutapis rakipänanpä.

11 Herenciata rakipänanpä suertita jitayaptinmi Benjamín trïbupa castankunapä yarqamurqan. Tsaymi Benjamín trïbu runakuna herenciata chaskiyarqan Judá trïbu runakunapa herencian kanqanpita hasta Josépita aywaraq trïbu runakunapa herencian kanqanyaq.

12 Benjamín trïbu runakunapa herencianpa norti kaq lindërunqa Jordán mayupitami qallaykurqan. Tsaypita Jericó norti kaqläpa päsarmi rupay jeqanan kaqläpa witsararqan. Jallqakunapa päsarmi Bet-avén tsunyaq jirkapana päsarqan. 13 Tsaypita sur kaqläpa tumarninmi Luzpa päsar Atarot-adarpa urarqan. Luzpa jukaq jutinqa Bet-elmi kaykan. Atarot-adarqa juk jirkanchömi kaykan. Tsay jirkanqa ura kaq Bet-horón sur kaq tsimpanchömi kaykan. 14 Tsaypita tsay jirkan kinrallanpami lindëru päsarqan hasta rupay jeqanan kaqlä kuchunyaq. Nirkurmi sur kaqläpa yapay tumarnin Quiriat-baalyaq charqan. Quiriat-baalqa Judá trïbu runakunapa markanmi karqan. Tsay markapa jukaq jutinmi kaykan Quiriat-jearim. Rupay jeqanan kaqlä lindërunmi tsay markakunapa, jallqakunapa y raqrakunapa päsararqan.

15 Sur kaqläpa aywaq lindërunqa qallaykurqan Quiriat-jearimpa kuchunpitami. Nirkurmi rupay yarqamunan kaqläpa päsar Neftoa pukyuyaq charqan. 16 Tsaypita urarqan Refaim pampa norti kaq kuchunyaq. Tsayqa jirka chakinchömi kaykan. Tsaypitaqa Ben-hinom raqrami qallaykun. Tsay lindëru Ben-hinom pampallanpa päsarninmi jebuseo runakuna täyanqan jirka sur kaqläpa aywararqan. Tsaypitami aywararqan En-rogel pukyuyaq. 17 Tsaypitami norti kaqläpa tumarnin En-semespa päsar Gelilotyaq charqan. Gelilotqa Adumín jirkan tsimpanchömi kaykan. Nirkurmi urarqan Bohán Ben-Rubén qaqapa. 18 Tsaypita Arabá pampa kuchuncho kaykaq jirkakuna norti kaqläpa päsarninmi Arabá pampapana urarqan. 19 Bet-hogla norti kaqläpa päsarnami Kachi Lamar norti kaq kuchunpa charqan. Tsaychömi Jordán mayu ushaykan. Tsay markakunapa, jallqakunapa y raqrakunapami päsarqan sur kaq lindërun.

20 Rupay yarqamunan kaqlä lindërunqa Jordán mayu kuchullanpami aywararqan. Tsay markakunapa, jallqakunapa y raqrakunapami Benjamín trïbu castakunapa lindërun päsarqan.

21 Benjamín trïbu runakuna castanpa castanpa chaskiyanqan markakunami karqan Jericó, Bet-hogla, Emec-casis, 22 Bet-arabá, Zemaraim, Bet-el, 23 Avim, Pará, Ofra, 24 Quefar-haamoni, Ofni y Geba. Tsay particho chunka ishkay markakunami caseriunkunawan karqan. 25 Wakin chaskiyanqan markakunami karqan Gabaón, Ramá, Beerot, 26 Mizpa, Cafira, Mozah, 27 Requem, Irpeel, Tarala 28 Zela, Elef, Jebús (Jebúspa jukaq jutinmi kaykan Jerusalén), Gabaa y Quiriat. Tsay particho chunka chusku markakunami caseriunkunawan karqan. Tsaypami Benjamín trïbu runakuna castanpa castanpa chaskiyanqan herencianpa lindërun karqan.