Manasés trïbu runakunapa lindërunkuna maypa kanqanpis
17
Suertita jitaypami pullan Manasés trïbu runakunapis herenciata chaskiyarqan. Tsay runakunaqa Josépa mayor tsurin Manaséspita aywaraqkunami kayarqan. Manaséspa mayor tsurinqa Maquirmi karqan. Maquirpa tsurinqa Galaadmi karqan. Maquirpita aywaraq runakuna pelyayta alli yachayaptinmi herenciata rikatsirqan Galaad partita y Basán partita. 2 Jordán mayu tsimpan rupay jeqanan kaqläpanami Manasés trïbu wakin ayllu runakuna suertita jitaypa chaskiyarqan. Tsay runakunaqa kayarqan Abiezer ayllu runakuna, Helec ayllu runakuna, Asriel ayllu runakuna, Siquem ayllu runakuna, Hefer ayllu runakuna y Semida ayllu runakunami. Tsay runakunaqa Josépa tsurin Manaséspita aywaraqkunami kayarqan.3 Manasés trïbupitami juk runa Zelofehad jutiyuq karqan. Payqa Heferpa tsurinmi karqan, Hefernami karqan Galaadpa tsurin, Galaadnami karqan Maquirpa tsurin y Maquirnami karqan Manaséspa tsurin. Zelofehadpaqa ollqu tsurinkuna manami karqantsu, sinöqa warmillantämi tsurinkuna kayarqan. Tsay warmi tsurinkunapa jutinkunami karqan Maala, Noa, Hogla, Milca y Tirsa. 4 Paykunami sacerdöti Eleazarman, Josuéman y mayor runakunaman aywaykur niyarqan: Moisésta “Tayta Dios ninqannölla tiyükuna chaskiyanqan kaqcho noqakunatapis herenciäkunata rikaykatsiyämay”.†
Tsaynö niyaptinmi Tayta Dios ninqannölla herenciata Josué rikatsirqan tiyunkuna herenciata chaskiyanqan kaqcho.
5 Tsaynöpami Manasés trïbu runakunapa herencian karqan chunka. Tsaynöllami Jordán mayu wak tsimpancho Galaad partipis y Basán partipis Manasés trïbu runakunapa herencian karqan. 6 Ollqupis warmipis herenciata chaskiyanqanpitami pullan Manasés trïbu runakunapä chunka herenciankuna karqan. Galaad partitanami Manaséspita wakin aywaraqkuna chaskiyarqan.
7 Manasés trïbu runakunapa herencianpa lindërunqa Aserpita Micmetatyaqmi aywararqan. Micmetatqa Siquem tsimpanmi kaykan. Sur kaqläpanami aywararqan hasta Tapúa pukyuyaq. 8 Tapúa marka cercankuna Manasés trïbu runakunapa kaptinpis kikin Tapúa markaqa Efraín trïbu runakunapami karqan. 9 Tapúa pukyupitanami Manasés trïbu runakunapa herenciankunapa lindërun aywararqan Caná raqra kuchullanpa hasta Mediterráneo Lamaryaq. Caná raqra norti kaqlä Manaséspa kaptinpis tsay tsimpacho juk ishkaylla markakuna Efraín trïbu runakunapami karqan. 10 Imanö kaptinpis Caná raqra sur kaq tsimpan Efraín trïbu runakunapami karqan. Tsay raqra norti kaq tsimpannami Manasés trïbu runakunapa karqan. Raqra kuchullanpa aywararmi lindërun charqan Mediterráneo Lamarman. Manasés trïbu runakuna chaskiyanqan norti kaqlä lindërunmi Aser trïbu runakunapa lindërunwan tinkurarqan. Rupay yarqamunan kaqlä lindërunnami Isacar trïbu runakunapa lindërunwan tinkurarqan.
11 Manasés trïbu runakuna chaskiyanqan wakin markakunaqa Isacar y Aser trïbu runakunapa herenciankunachömi karqan. Caseriunkunawanmi tsay markakuna karqan Bet-seán, Ibleam, Dor, Endor, Taanac y Meguido. 12 Herencian kananpä tsay markakunata chaskirpis tsaycho taykaq cananeo runakunata manami qarquyta kamäpakuyarqantsu. 13 Israel runakuna atskaman mirarmi tsaycho taykaq cananeo runakunata arutsirnin munaynincho tsararäyarqan.†
Efraínwan Manasés trïbu runakuna herencian mas kananpä mañakuyanqan
14 Josépita aywaraq runakunami Josuéta niyarqan: “Tayta Diospa bendicionninwan atskaman miraykäyaptï ¿imanirtä wallkallata herenciata rakipäyämashqayki?”
15 Josuénami nirqan: “Efraín jallqakuna qamkunapä mana aypaptinqa ferezeo y refaíta runakuna täyanqan muntikunaman aywaykur tsaycho täyänaykipä chakrata kichayay”.
16 Paykunanami niyarqan: “Efraín jallqakuna manami aypäyämanqatsu. Tsaynöpis Jezreel pampacho y Bet-seáncho y caseriunkunacho taq cananeo runakunaqa alläpa aja vinciymi kaykäyan. Pelyaq aywayänanpä fiërru carrëtankunapis kanmi”.
17 Tsaymi Josépita aywaraq Manasés y Efraín trïbu runakunata Josué nirqan: “Qamkuna atskaq kaykarqa paykunata vinciyankimi. Tsaymi herenciayki 18 entëru tsay muntiyuq jallqakunapis kanqa. Tsay muntikunata tsaqukur chakrakunata kichayanki mayyaqpis lindërun chanqanyaq. Pampacho taq cananeo runakuna munayyuq kayaptinpis y fiërru carrëtankuna kaptinpis qamkunaqa qarquyankimi”.