Efraín trïbu y pullan Manasés trïbu runakunapa lindërunkuna maypa kanqanpis
16
Josépita aywaraq runakuna suertita jitaypa chaskiyanqan herenciapa lindërunkunaqa rupay yarqamunan kaqlä Jordán mayu kuchunpitami qallaykurqan. Jericó pukyukunapita aywararmi tsunyaq jirkapa päsar Bet-el jallqakunayaq charqan. 2 Bet-elpita Luzyaq päsarmi arquita runakuna taykäyanqan Atarotyaq charqan. 3 Tsaypita urarnami rupay jeqanan kaqläpa päsarqan Jaflet runakuna taykäyanqan ura kaq Bet-horónyaq. Nirkurnami Gezerpa päsar Mediterráneo Lamaryaq charqan. 4 Tsaynömi Josépa tsurin Manaséspita aywaraq runakunapa y Josépa tsurin Efraínpita aywaraq runakunapa herencian karqan.Efraín trïbu runakunapa lindërunkuna maypa kanqanpis
5 Efraín trïbu runakuna castanpa castanpa chaskiyanqan herenciapa lindërunqa rupay yarqamunan kaqläpita qallaykurmi Atarot-adarta y Bet-horónpa päsar 6 Mediterráneo Lamaryaq charqan. Norti kaqläpanami lindërun qallaykurqan Micmetatcho. Tsaypita rupay yarqamunan kaqläpa tumar Taanat-silupa päsarqan hasta Janoayaq. 7 Janoapita sur kaqläpa tumar Atarotpa y Naaratpa urarqan hasta Jericóman chanqanyaq. Nirkurmi Jordán mayuyaq charqan. 8 Tapúapitanami rupay jeqanan kaqläpa aywar Caná raqra kuchullanpa hasta Mediterráneo Lamaryaq päsarqan. Tsaypami Efraín trïbu runakuna castanpa castanpa chaskiyanqan herencianpa lindërun karqan.
9 Efraín trïbu runakunapa mas wakin markankuna y caseriunkunapis pullan Manasés trïbu runakunapa herencianchömi karqan. 10 Gezer markacho taq cananeo runakunata mana qarquyaptinmi kananyaqpis Efraín trïbu runakuna paykunawan juntu taykäyan. Itsanqa tsay cananeo runakunataqa wätaytanömi munaynincho tsararäyan.†