Judá trïbu runakunapa lindërunkuna maypa kanqanpis
15
Judá trïbu runakuna castanpa castanpa herenciata suertita jitaypa chaskiyanqanqa Edom nacionpa lindërunyaqmi charqan. Sur kaqläpami Zin niyanqan tsunyaq jirkayaq charqan. 2 Sur kaqlächo kaykaq lindërunqa Kachi Lamarpa ura kuchunpitami qallaykurqan. 3 Tsaypita Acrabim witsaypa päsarmi Zin niyanqan tsunyaq jirkaman charqan. Tsaypa päsarnami Cades-barnea sur kaqläpa aywarqan hasta Hezrónyaq. Nirkurmi witsaypana Adaryaq aywar Carcáyaq tumarqan. 4 Carcápitanami päsarqan Asmónman. Asmónpa päsarmi Egipto raqrayaq charqan. Nirkurnami lindërun Mediterráneo Lamaryaq charqan. Tsaynöpami lindërun sur kaqläpana karqan.5 Rupay yarqamunan kaqläpanami lindërun karqan Kachi Lamar kuchullanpa hasta Jordán mayuman chanqanyaq. Tsaypitaqa norti kaqläpanami lindërun qallaykurqan.
6 Norti kaq lindërun witsaypa aywarmi charqan Bet-hoglayaq. Nirkurmi Bet-arabápa norti kaqläpa päsar Bohán Ben-Rubén qaqaman charqan. 7 Tsaypita Acor Pampapa päsar Debirman charnin Gilgalmanmi tumararqan. Gilgalqa Adumínpa sur kaq tsimpanchömi karqan. Tsaypita lindërun En-semescho pukyu kaykaqpa päsarmi En-rogel pukyuyaq aywararqan. 8 Nirkurmi jebuseo runakuna täyanqan sur kaqläpa päsar Ben-hinom raqrapa päsararqan. Tsaychöqa Jerusalénmi kaykan. Ben-hinom raqrapita witsaypana aywararmi jirkan jananyaq charqan. Tsay jirkanqa Jerusalénpita rupay jeqanan kaqläpami kaykan. Nirkurnami lindërun Refaim pampa norti kaq kuchunyaq charqan. 9 Tsaypa päsarmi jirkan jananpita lindërun urararqan Neftoacho yaku pashtaq pukyuyaq. Tsaypita päsarmi Efrón jallqakunacho kaykaq markakunayaq charqan. Nirkurmi tumarqan Baala markapa. Baalapa jukaq jutinqa Quiriat-jearimmi karqan. 10 Baalapita päsarmi rupay jeqanan kaqläpa tumararqan Seir jallqakunapa. Nirkurmi Jearim jallqakuna norti kaqlächo kaykaq Quesalónpa päsar uraypana aywararqan Bet-semespa Timnaman chanqanyaq. 11 Nirkurmi Ecrón marka norti kaqlä jirkanpa chaykur Sicrónpa y Baala jallqakunapa tumararqan. Tsaypita Jabneelpa päsarmi Mediterráneo Lamarman tinkurarqan.
12 Rupay jeqanan kaqlächöqa Mediterráneo Lamar kuchullanpami lindërun aywararqan.
Tsaynömi Judá trïbu runakuna castanpa castanpa chaskiyanqan herenciankunapa lindërunkuna karqan.
Hebrónta y Debirta Caleb qechunqan
13 Tayta Dios ninqannömi Jefonipa tsurin Calebta herenciata Josué rakiparqan Judá trïbu runakunapa herenciancho. Tsaynöpami Caleb chaskirqan Quiriat-arbata. Tsay markata shäritsiq Arba jutiyuq runapitami anaceo runakuna mirayarqan. Quiriat-arbapa jukaq jutinqa Hebrónmi kaykan. 14 Anaceo runakunaqa Sesai casta, Ahimán casta y Talmai castami kayarqan. Tsay kimsa casta anaceo runakunatami markankunapita Caleb qarqurqan.†
15 Tsaypitanami Debircho taq runakunata atacayänanpä yaykuyarqan. Tsay markapa unay jutinmi karqan Quiriat-sefer. 16 Tsaymi Caleb nirqan: “Pipis tsay markaman pelyaq yaykur vinciq kaqtami warmi tsurï Acsawan tätsishä”.
17 Tsaynö niptinmi Cenazpa tsurin Otoniel tsay markaman yaykur tsaycho taqkunata vincirqan. Tsaynö vinciptinmi Calebqa tsurin Acsawan tätsirqan. Otonielqa Calebpa tapshi wawqinpa tsurinmi karqan.
18 Taytanpa wayinpita yarquykäyanqanchönami warmin Acsata Otoniel nirqan: “Taytaykita rugay chakrata rakipämänantsikpä”.
Tsaymi ashnunpita Acsa yarpuskiptin taytan Caleb tapurqan: “Hïja, ¿imatatä munaykanki?”
19 Acsanami nirqan: “Papä, rugakulläshayki. Neguevcho chakrata rikatsimanqaykinölla pukyuyuq chakrakunatapis rikaykatsillämay”.
Tsaynö niptinmi janaqnincho pukyuyuq chakrata y uraqnincho pukyuyuq chakratapis taytan rikatsirqan.
Judá trïbu runakuna chaskiyanqan markakuna
20 Judá trïbu runakuna castanpa castanpa herenciata chaskiyanqan markakunami karqan: 21 Sur kaqläpa aywar Edom nación cercancho kaq markankuna Cabseel, Edar, Jagur, 22 Cina, Dimona, Adada, 23 Cedes, Hazor, Itnán, 24 Zif, Telem, Bealot, 25 Hazor-hadata, Queriot, Hezrón (Hezrónpa jukaq jutinmi karqan Hazor), 26 Amam, Sema, Molada, 27 Hazar-gada, Hesmón, Bet-pelet, 28 Hazar-sual, Beerseba, Bizotia, 29 Baala, Iim, Esem, 30 Eltolad, Quesil, Horma, 31 Siclag, Madmana, Sansana, 32 Lebaot, Silhim, Aín y Rimón. Tsay particho ishkay chunka isqun (29) markakunami caseriunkunawan karqan.
33 Rupay jeqanan kaqlä Sefelachömi Judá trïbu runakunapa markankuna karqan Estaol, Zora, Asena, 34 Zanoa, En-ganim, Tapúa, Enam, 35 Jarmut, Adulam, Soco, Azeca, 36 Saaraim, Aditaim, Gedera y Gederotaim. Tsay particho chunka chusku markakunami caseriunkunawan karqan.
37 Tsay particho wakin kaq markakunapis karqan Zenán, Hadasa, Migdal-gad, 38 Dileán, Mizpa, Jocteel, 39 Laquis, Boscat, Eglón, 40 Cabón, Lahmam, Quitlis, 41 Gederot, Bet-dagón, Naama y Maceda. Tsay particho chunka soqta markakunami caseriunkunawan karqan.
42 Tsaynöpis wakin markakuna karqan Libna, Eter, Asán, 43 Jifta, Asena, Nezib. 44 Keila, Aczib y Maresa. Tsay particho isqun markakunami caseriunkunawan karqan.
45 Judá trïbu runakunaqa caseriunkunatawanmi Ecrón markatapis chaskiyarqan. 46 Ecrónpita Mediterráneo Lamaryaq aywar Asdod ñöpancho kaykaq markakunapis Judá trïbu runakunapami karqan.
47 Asdod markapis, Gaza markapis y llapan caseriunkunapis Judá trïbu runakunapami karqan. Mediterráneo Lamar kuchunpa aywarnin Egipto raqrayaq char llapan tsaycho kaq markakunawan caseriukuna Judá trïbu runakunapami karqan.
48 Jallqakuna kanqan partichömi Judá trïbu runakunapa markankuna karqan Samir, Jatir, Soco, 49 Dana, Quiriat-sana (Quiriat-sanapa jukaq jutinmi karqan Debir), 50 Anab, Estemoa, Anim, 51 Gosén, Holón y Gilo. Tsay particho chunka jukmi markakuna caseriunkunawan karqan.
52 Tsay particho kaykaq wakin markakunami karqan Arab, Duma, Esán, 53 Janum, Bet-tapúa, Afeca, 54 Humta, Quiriat-arba (Quiriat-arbapa jukaq jutinmi karqan Hebrón) y Sior. Tsay particho isqun markakunami caseriunkunawan karqan.
55 Tsaynöpis karqan Maón, Carmel, Zif, Juta, 56 Jezreel, Jocdeam, Zanoa, 57 Caín, Gabaa y Timna. Tsay particho chunka markakunami caseriunkunawan karqan.
58 Tsaynöllami karqan Halhul, Bet-sur, Gedor, 59 Maarat, Bet-anot y Eltecón. Tsay particho soqta markakunami caseriunkunawan karqan.
60 Tsaynöpis Judá trïbu runakunapami karqan Quiriat-baal (Quiriat-baalpa jukaq jutinqa karqan Quiriat-Jearimmi) y Rabá. Tsay particho ishkay markakunami caseriunkunawan karqan.
61 Tsunyaq jirkachöpis Judá trïbu runakunapa markankunami karqan Bet-arabá, Midín, Secaca, 62 Nibsán, Kachi Marka y En-gadi. Tsay particho soqta markakunami caseriunkunawan karqan.
63 Judá trïbu runakunaqa manami qarquyta kamäpakuyarqantsu Jerusaléncho taykaq jebuseo runakunata. Kananyaqpis jinallami jebuseo runakunaqa Judá trïbu runakuna kaqcho taykäyan.†