2 Tapukuyaptinmi Tayta Dios nirqan: “Judá trïbu runakunami puntata aywayanqa. Cananeo runakunata vinciyänanpämi yanapashä”.

3 Tsaymi Judá trïbu runakuna Simeón trïbu runakunata niyarqan: “Aypuyämanqan particho kaykaq cananeo runakunata qarquyänäpä yanapaykayällämay. Tsaynöllami noqakunapis töcayäshunqayki particho qarquyänaykipä yanapayäshayki”.

Tsaynö niyaptinmi Simeón trïbu runakuna paykunata yanapayänanpä aywayarqan.

4 Bezecman yaykur cananeo y ferezeo runakunawan pelyayaptinmi vinciyänanpä Tayta Dios yanaparqan. Tsaymi chunka waranqa (10,000) runakunata wanutsiyarqan. 5 Tsaycho taq cananeo y ferezeo runakunapa mandaqnin reymi karqan Adonisedec. Payta y paywan kaykaq runakunatapis llapantami vinciyarqan. 6 Qeshpiykaqta taripaykurmi Adonisedecta prësu tsariskir makinpa y chakinpa maman dëdunkunata roquriyarqan. 7 Tsaymi rey Adonisedec nirqan: “Noqapis qanchis chunka (70) reykunapa chakinkunapa y makinkunapa maman dëdunkunatami roqurqä. Paykunami mësäpita shushunqan mikuyta mikullar kawayaq. Tsaynö ruranqäpitami noqatapis Tayta Dios kanan castigaykäman”.

Tsaypitanami rey Adonisedecta Jerusalénman apaykuptin tsaycho wanurqan.

8 Jerusalénman pelyaq aywarnami tsaycho taq runakunata Judá trïbu runakuna llapanta espädawan wanuskatsir wayikunatapis rupatsir ushayarqan. 9 Nirkurnami Neguevcho, jallqakunacho y Sefelacho taq cananeo runakunawan pelyaq aywayarqan.^† 10 Tsaynöllami Hebrón markacho taq cananeo runakunawan pelyaq aywayarqan.^† Tsay markapa unay jutinmi karqan Quiriat-arba. Tsaychömi Sesai runakunata, Ahimán runakunata y Talmai runakunata wanutsiyarqan.

11 Tsaypitanami Debircho taq runakunata atacayänanpä yaykuyarqan. Tsay markapa unay jutinmi karqan Quiriat-sefer. 12 Tsaymi Caleb nirqan: “Pipis tsay markaman pelyaq yaykur vinciq kaqtami warmi tsurï Acsawan tätsishä”.

13 Tsaynö niptinmi Cenazpa tsurin Otoniel tsay markaman yaykur tsaycho taqkunata vincirqan. Tsaynö vinciptinmi Calebqa tsurin Acsawan tätsirqan. Otonielqa Calebpa tapshi wawqinpa tsurinmi karqan.

14 Taytanpa wayinpita yarquykäyanqanchönami warmin Acsata Otoniel nirqan: “Taytaykita rugay chakrata rakipämänantsikpä”.

Tsaymi ashnunpita Acsa yarpuskiptin taytan Caleb tapurqan: “Hïja, ¿imatatä munaykanki?”

15 Acsanami nirqan: “Papä, rugakulläshayki. Neguevcho chakrata rikatsimanqaykinölla pukyuyuq chakrakunatapis rikaykatsillämay”.

Tsaynö niptinmi janaqnincho pukyuyuq chakrata y uraqnincho pukyuyuq chakratapis taytan rikatsirqan.

16 Ceneo runakunami Moiséspa suegrun Hobabpita aywaraqkuna kayarqan. Paykunami Judá trïbuman takukaykur Palmëra Markapita Judá trïbu runakuna chaskiyanqan tsunyaq jirkaman aywayarqan. Tsayqa Neguevcho kaykaq Arad cercanchömi karqan. Tsaychömi Judá runakunawan juntuna täyarqan.

17 Tsaypitanami Judá trïbu runakuna Simeón trïbu runakunawan Sefatcho taykaq cananeo runakunata atacar chipyaq ushakätsiyarqan. Tsaymi tsay markata jutitsiyarqan Horma^a kananpä. 18 Tsaynöllami Gazacho, Ascalóncho y Ecróncho taq runakunata vinciskir chakrankunatapis qechuyarqan.

19 Tayta Dios yanapaptinmi Judá trïbu runakunaqa jallqakunacho taq runakunata wanutsir ushayarqan. Costacho taq runakunatami itsanqa ushakätsiyta kamäpakuyarqantsu, fiërrupita rurashqa guërra carrëtankuna kaptin. 20 Moisés ninqannöllami Hebrón partita Calebta rikatsiyarqan. Tsayman chaykurmi Anacpa kimsan tsurinkunapita aywaraqkunata qarqurqan.

21 Benjamín trïbu runakunaqa Jerusaléncho taq jebuseo runakunata qarquyta manami kamäpakuyarqantsu. Tsaymi jebuseo runakunaqa kananyaqpis Benjamín trïbu runakunawan juntu Jerusaléncho taykäyan.

22 Tayta Dios yanapaptinmi Josépita aywaraq runakuna^b Bet-el markacho taq runakunata atacar vinciyarqan. 23 Manarä atacarmi tsay markaman runakunata kachayarqan imanö kanqantapis rikapakayämunanpä. Ñöpataqa tsay markapa jutin karqan Luzmi. 24 Rikapakuqkuna chaykurmi markapita yarqaykämuq runawan tinkuskir niyarqan: “Markaman maypa yaykuyänäpäpis rikatsiyämaptikiqa manami wanutsiyäshaykitsu”.

25 Tsaynö niyaptinmi mayninpa yaykuyänanpäpis rikatsirqan. Tsaymi rikapakuqkuna kutiykur willayaptin Israel runakuna yaykuskir tsaycho taqkunata llapanta espädankunawan wanutsiyarqan. Markaman imanö yaykuyänanpä rikatsiq runatawan castankunatami itsanqa awniyanqannölla wanutsiyarqantsu. 26 Tsaymi tsay runaqa heteo runakuna täyanqan kaqman aywakurqan. Tsaychömi markata shärirkatsir jutitsirqan Luz jutin kananpä. Kananyaqpis tsay markapa jutin tsayllami kaykan.

27 Manasés trïbu runakuna manami qarquyta kamäpakuyarqantsu Bet-seán, Taanac, Dor, Ibleam y Meguido markakunacho taq runakunata y tsay markakunapa ñöpankunacho taq runakunatapis. Tsaymi cananeo runakunaqa tsay kinray markakunacho taykäyan. 28 Tsaypita Israel runakuna atskaman mirarmi cananeo runakunata wätaytanö munaynincho tsararäyarqan. Qarquytaqa manami kamäpakuyarqantsu.

29 Efraín trïbu runakunapis manami qarquyta kamäpakuyarqantsu Gezercho taq cananeo runakunata. Tsaymi tsay cananeo runakuna Efraín trïbu runakunawan juntu taykäyan.

30 Zabulón trïbu runakunapis Quitrón y Naalal markakunacho taq cananeo runakunata qarquyta mana kamäpakurmi wätaytanö munaynincho tsararäyarqan. Tsaymi cananeo runakuna y Zabulón trïbu runakunaqa juntu taykäyan.

31 Aser trïbu runakunapis Aco, Sidón, Ahlab, Aczib, Helba, Afec y Rehob markakunacho taq runakunata manami qarquyta kamäpakuyarqantsu. 32 Tsaymi cananeo runakunawan juntu täyarqan.

33 Neftalí trïbu runakunapis Bet-semes y Bet-anat markakunacho taq cananeo runakunata qarquyta mana kamäpakurmi wätaytanö munaynincho tsararäyarqan. Tsaymi cananeo runakuna y Neftalí trïbu runakuna juntu taykäyan.

34 Dan trïbu runakunataqa amorreo runakuna manami kachäyarqantsu costacho kaykaq herenciankunaman yaykuyänanta. Tsaymi jallqaman kutitsiyarqan tsaycho täkuyänanpä. 35 Tsaynöpami amorreo runakunaqa Heres, Ajalón y Saalbim markakunacho täyarqan. Qepatarämi Josépita aywaraq Efraín y Manasés trïbu runakuna munayyuq kar tsaycho taykaq amorreo runakunata wätaytanö tsararäyarqan. 36 Amorreo runakunapa lindërunqa witsarqan Acrabimpita qallaykur hasta Selapita mas janayaqmi.