Rupay jeqanan kaqläpa herenciata rakipayanqan
14
Sacerdöti Eleazar, Nunpa tsurin Josué y Israel runakunapa mandaqninkunami Israel runakunapa wakin trïbunkunata Canaáncho herenciata rakipäyarqan.† 2 Tsay isqun trïbu y mas pullan trïbu runakunami Moisésta Tayta Dios ninqannölla suertita jitaypa herenciankunata chaskiyarqan.† 3 Rubén trïbu runakunata, Gad trïbu runakunata y pullan Manasés trïbu runakunatami herenciata Moisés rakiparqan Israel runakuna Jordán mayuta manarä tsimpayaptin.† Leví trïbu runakunataqa manami herenciata rakiparqantsu. 4 Mana rakipaptinpis wakin trïbukunapa herencianchömi markakunata y chakrakunata chaskiyarqan uywankunata mitsikur täyänanpä. Josépita aywaraq ishkay trïbukunaqa Manasés trïbu y Efraín trïbumi kayarqan. 5 Moisésta Tayta Dios ninqannöllami Israel runakuna herenciata rakipänakuyarqan.Herencianpä Hebrón partita Caleb chaskinqan
6 Gilgalcho Josué kaykaptinmi Judá trïbu runakunawan aywar cenezeo runa Jefonipa tsurin Caleb Josuéta nirqan: “Musyankimi Cades-barneacho kaykashqa† sirviqnin Moisésta Tayta Dios noqantsikpä imata ninqantapis. 7 Canaánta rikapakamunantsikpä Tayta Diospa sirviqnin Moisés Cades-barneapita kachamanqantsik junaq chusku chunka (40) watayuqmi kaykarqä. Kutiykurmi Israel runakunata imanö kay parti kanqantapis willarqä.† 8 Aywaq mayintsikkuna mantsakätsir runakunata willapäyaptinpis Tayta Diosman llapan shonqüwan yärakurmi kay nacionman yaykamunantsikpä runakunata shakyätsirqä. 9 Tsaymi Tayta Diospa jutincho awnimarnin Moisés nimarqan: ‘Tayta Diosman yärakur payta cäsukunqaykipitami Canaáncho purinqayki partikuna qampä y qampita aywaraqkunapä imayyaqpis kanqa’.†
10 “Moisés tsaynö nimarqan chusku chunka pitsqa (45) wata qepatanami. Tsunyaq jirkapa purishqapis Tayta Diosmi awnimanqannö shumaq yanapamashqa kananyaqpis sänu kanäpä. Kananqa puwaq chunka pitsqa (85) watayuqnami kaykä. 11 Moisés rikapakuq kachamanqantsik witsannöllami kananpis kallpä kaykan. Ñöpata pelyanqänö kananpis pelyämanrämi. 12 Tsaymi qamta rugakü Tayta Dios awnimanqan jallqakunata rikatsimänaykipä. Rikapakuq tsayman aywarmi tarirqantsik anaceo jatusaq runakuna tsaycho taykäyanqanta. Markankunapis jatusaq y jinchi murallashqami karqan. Tsaynö kaptinpis Tayta Dios awnimanqannö yanapamaptinqa qarqushämi”.
13 Tsaynö mañakuptinmi Jefonipa tsurin Calebta bendisarnin Hebrón partita herencian kananpä Josué rikatsirqan. 14 Tsaynöpami Hebrónqa cenezeo runa Jefonipa tsurin Calebpa y paypita aywaraqkunapa herencian hasta kananyaqpis kaykan. Tsaynö herencian karqan Israel runakuna yärakuyanqan Tayta Diosta cäsukunqanpitami.
15 Hebrónpa unay kaq jutinqa Quiriat-arbami karqan. Tsaynö jutin karqan Arba jutiyuq runa tsaycho tanqanpitami. Payqa jatusaq anaceo runakunacho reqishqami karqan.
Tsaypitaqa guërra mana kaptin Israel runakuna añawnami kawakuyarqan.