Yaykuyänanpä kaq partikuna maypa maypa kanqanpis
13
Josué pasaypa awkinna kaykaptinmi Tayta Dios nirqan: “Pasaypa awkinnami kaykanki. Qechuypä partikunaqa atskarämi kaykan. 2 Jinallarämi qechuypä kaykan filisteo runakuna y gesureo runakuna täyanqan partikuna. 3 Tsay qechuypä kaq partikunaqa kaykan Sihor mayupita hasta cananeo runakuna täyanqan Ecrónpa lindërunyaqmi. Sihor mayuqa Egiptupa lindërunpami päsan. Tsaynöpis tsay manarä qechunqayki partikunachömi kaykan filisteo runakunapa pitsqa mandaqnin täyanqan markakuna. Tsay markakunaqa kaykan Gaza, Asdod, Ascalón, Gat y Ecrón. Tsaynöpis manarämi qechushqaykirätsu aveo runakuna täyanqan partikunata. 4 Tsay partiqa sur kaqläpami kaykan. Tsaynöpis manarämi qechushqaykirätsu cananeo runakuna täyanqan partikunata. Tsay partikunaqa kaykan Sidón runakuna täyanqan Meharapita hasta Afecyaqmi. Afecqa amorreo runakuna täyanqan lindërunchömi kaykan. 5 Tsaynöpis manarämi qechushqaykirätsu giblita runakuna täyanqan partikunata y llapan Líbanuta Baal-gadpita hasta Hamatman yaykunayaq. Tsayqa kaykan rupay yarqamunan kaqläpami. Baal-gadqa Hermón jirka chakinchömi kaykan. 6 Tsay partikunata qechurmi Israel runakuna yaykuyllanta qarqushä Sidón runakunata y jallqakunacho taq runakunatapis Líbanupita patsa hasta Misrefot-maimyaq. Qechuskirnami noqa ninqänölla Israel runakunata tsay partikunata rakipanki herenciankuna kananpä. 7 Isqun trïbukunatawan pullan Manasés trïbuta herenciankunata rakiparqa llapan tsay partikunata rakipanki”.Jordán mayu tsimpancho lindërunkuna maypa kanqanpis
8 Jordán mayu tsimpan rupay yarqamunan kaqläpami Rubén trïbu runakuna, Gad trïbu runakuna y pullan Manasés trïbu runakuna herenciankunata puntata chaskiyarqan. Tsaykunataqa Tayta Diospa sirviqnin Moisésmi rakiparqan.† 9 Paykunapa herenciankunaqa karqan Arnón mayu ñöpancho kaykaq Aroerpita y Arnón raqracho kaykaq markapita hasta Dibónyaqmi. Tsaynöllami herenciankuna karqan llapan Medeba pampa 10 y Hesbóncho taq rey Sehón mandanqan llapan markakuna hasta amonita runakunapa lindërunyaq. Sehónqa amorreo runakunapa mandaqnin reymi karqan. 11 Tsaynöllami herenciankuna karqan Galaad parti, gesureo y maacateo runakuna täyanqan partikuna, Hermón jirka aywaq jallqakunawan Basán partipis hasta Salcayaq. 12 Tsaynöpis herenciankuna karqan Basán partipa rey Og mandanqankuna. Og tarqan Astarotcho y Edreichömi. Payllanami refaíta runa karqan. Og mandanqan runakunata wanuskatsirmi markankunata Moisés qechurqan. 13 Gesurcho y Maacacho taq runakunatami itsanqa qarqurqantsu. Tsaymi kananyaqpis Israel runakunawan jinalla taykäyan.
14 Moisésqa manami ima herenciatapis Leví trïbu runakunata rakiparqantsu. Tsaypa trokinqa Tayta Dios ninqannöllami paykunapä karqan Israel runakuna apayanqan sacrificiukuna.†
Rubén trïbu runakunapa lindërunkuna maypa kanqanpis
15 Rubén trïbu runakunata castanpa castanpa Moisés rakipaptinmi 16 herenciankuna karqan Arnón mayu ñöpancho kaykaq Aroer marka, Arnón raqracho kaykaq marka y llapan Medeba pampapis hasta 17 Hesbónyaq. Tsaynöllami herenciankuna karqan tsay pampacho kaykaq markakunapis. Tsay markakuna karqan Dibón, Bamot-baal, Bet-baal-meón, 18 Jahaza, Cademot, Mefaat, 19 Quiriataim, Sibma, Zaret-sahar (Zaret-saharqa pampacho kaykaq jirkanchömi kaykan), 20 Bet-peor y Bet-jesimotpis. Tsaynöllami herenciankuna karqan Pisga niyanqan jirka chakincho tunakuna. 21 Tsaynöpami Rubén trïbu runakunapa herencian karqan entëru pampacho kaykaq markakuna y Hesbóncho taq rey Sehón llapan mandanqan markakuna. Sehónqa amorreo runakunapa mandaqnin reymi karqan. Paytawan paypa munaynincho kaykaq madianita runakunapa mandaqninkunatami Moisés wanutsirqan. Tsay mandaqkunami kayarqan Evi, Requem, Zur, Hur y Reba. 22 Paykunawan pelyar atska runakunatami Israel runakuna wanutsiyarqan. Tsaychömi Beorpa tsurin adivinaq Balaamtapis wanutsiyarqan. 23 Rubén trïbu runakunapa herenciankunapa lindërunmi karqan Jordán mayu kuchunpa. Tsay markakunata y caseriukunata Rubén trïbu runakunami castanpa castanpa chaskiyarqan.
Gad trïbu runakunapa lindërunkuna maypa kanqanpis
24 Gad trïbu runakunatapis castanpa castanpa Moisés rakipaptinmi 25 herenciankuna karqan Jazer, Galaad particho kaykaq llapan markakuna y pullan amonita runakunapa markankunapis hasta Rabá tsimpancho kaykaq Aroeryaq. 26 Tsaynöllami herencian karqan Hesbónpita hasta Ramat-mizpayaq y Betonimyaq y Mahanaimpita hasta Debiryaq. 27 Jordán mayu ñöpan pampakunachöpis herencian karqan Bet-aram, Bet-nimra, Sucot, Zafón y Hesbóncho taq Sehón mandanqan wakin markakunapis. Lindërunmi Jordán mayu kuchullanpa aywararqan hasta Cineret qocha kuchunyaq. Llapanpis Jordán mayu rupay yarqamunan kaqläpami karqan. 28 Tsay markakunatami caseriukunatawan Gad trïbu runakuna castanpa castanpa chaskiyarqan.
Pullan Manasés trïbu runakunapa lindërunkuna maypa kanqanpis
29 Pullan Manasés trïbu runakunatapis castanpa castanpa Moisés rakipaptinmi 30 herenciankuna karqan Mahanaimpita norti kaqläpa. Tsaymi karqan Basán partipa mandaqnin rey Og mandanqankuna, Jairpita aywaraq runakuna qechuyanqan soqta chunka (60) markakuna† y Basáncho wakin markakunapis. 31 Tsaynöllami herenciankuna karqan pullan Galaad y Basán nacionpa mandaqnin rey Og tanqan Astarotwan Edrei markakuna. Tsaykuna karqan pullan Manasés trïbu runakuna castanpa castanpa chaskiyanqan herenciami. Tsay runakunaqa Manaséspa tsurin Maquirpita aywaraq runakunami kayarqan.