Levitakuna täyänanpä markakuna
35
Jericópa tsimpan Jordán mayu kaqlä Moab pampacho Israel runakuna kaykäyaptinmi Moisésta Tayta Dios nirqan: 2 “Israel runakunata niy: ‘Chaskiyänaykipä kaq markakunacho levitakunapis täyänanpä wakin markakunata rikatsiyanki. Tsay rikatsiyanqayki markakunapa ñöpancho chakrankunapis uywankunata mitsikuyänanpämi kanqa. 3 Tsaynöpami levitakuna täyänanpä markankuna kanqa y uywankunata mitsikuyänanpä chakrakunapis kanqa. 4 Uywankunata mitsikuyänan chakrakunami kanqa markapa murällanpita chusku pachak pitsqa chunka (450) metru. 5 Tsay chakrakunaqa chuskun lädunpa iwalmi kanqa. Rupay yarqamunan kaqläpapis, rupay jeqanan kaqläpapis, norti kaqläpapis, sur kaqläpapis isqun pachak (900) metrumi largun kanqa. Tsaymi tsay marka kanqa uywankuna mitsikuyänan chakrakuna chawpincho.6 “ ‘Levitakunata rakipuyanqayki markakunapitami soqta markakuna kayanqa runakuna tsay markakunaman amparakuyänanpä. Tsay soqta markakunamanmi mana yarpaypa runa mayinta wanutsiqkuna amparakuyanqa. Tsay markakunapita chusku chunka ishkay (42) markakuna masta levitakunata aypuyanki. 7 Tsaymi levitakunata rakipuyanqayki markakunaqa kanqa uywankunata mitsikuyänan chakrankunawan chusku chunka puwaq (48) markakuna. 8 Juk trïbucho atska markakuna kaptinqa atskatami levitakunata rakipuyanqa. Wallkalla markakuna kaptinqa wallkallatami rakipunqa’ ”.†
Amparakuyänan markakuna kananpä tantiyatsinqan
9 Moiséstami Tayta Dios nirqan: 10 “Israel runakunata niy: ‘Jordán mayuta tsimpar Canaánman chaykur 11 runakuna amparakuyänanpä markakunata akrayanki.† Tsay markakunamanmi mana yarpaypa runa mayinta wanutsiq runakuna qeshpir amparakuyanqa. 12 Tsaymanmi qeshpinqa wanuq runapa castankuna venganzata ashir mana wanutsiyänanpä. Tsaynöpami wanutsiq runa salvakunqa marka mayinkuna juzgayanqanyaq.
13 “ ‘Tsay amparakuyänan markakunaqa soqtami kanqa tsayman qeshpiyänanpä. 14 Kimsa kaq markakunami kanqa Jordán mayu tsimpan rupay yarqamunan kaqlächo y kimsa kaqnami kanqa Canaánlächo. 15 Tsaynöpami Israel runa o jäpa runa karpis mana yarpaypa runa mayinta wanutsiptin soqta markakuna kanqa mayqanmanpis qeshpiskir amparakunanpä.
16 “ ‘Pipis fiërru herramientawan runa mayinta wanutsiptinqa kikintapis wanutsiyanki.
17 “ ‘Pipis rumiwan saqmar runa mayinta wanutsiptinqa kikintapis wanutsiyanki.
18 “ ‘Pipis qeruwan wiruypa runa mayinta wanutsiptinqa kikintapis wanutsiyanki. 19 Wanutsikuq runataqa wanuq runapa legïtimu castanmi maychöpis tarinqancho wanutsinqa.
20 “ ‘Pipis chikirnin runa mayinta tanqaypa o imawanpis saqmaypa 21 o maqaykällar wanutsiptinqa kikintapis wanutsiyanki. Wanutsikuq runataqa wanuq runapa legïtimu castanmi maychöpis tinkunqancho wanutsinqa.
22 “ ‘Itsanqa pitapis mana yarpaypa tanqar wanutsiptin, imawanpis mana yarpashqata chaykatsir wanutsiptin 23 o mana rikaypa kuchpawan wanutsiptinqa 24 marka mayinkunami qorikaykur tantiyayanqa wanutsikuq runa yarpaypa o mana yarpaypa wanutsinqantapis. Tsaynö tantiyananpäqa kanan ninqäkunata ama qonqäyätsuntsu. Tsaynöpami wanuq runapa castankunapis tantiyayanqa yarpaypa wanutsinqanta o mana yarpaypa wanutsinqantapis.
25 “ ‘Mana yarpaypa wanutsinqanta tantiyarqa marka mayinkunami juzgayanqan markapita kutitsiyanqa amparakuyänan markaman. Tsay markachöna kaykaptinqa wanuqpa castan amana wanutsitsunnatsu. Wanupakuq runaqa tsay markallachömi tanqa mandaq sacerdöti wanunqanyaq. Tsay sacerdötiqa sagrädu aceitita umanman wiñapashqami kaykan. 26 Amparakuyänan markapita yarquptinmi itsanqa 27 wanuq runapa castan tinkuskir wanutsinqa. Wanutsirpis manami jutsayuqtsu kanqa. 28 Tsaymi runa mayinta wanutsiq runa amparakuyänan markallacho tanqa mandaq sacerdöti wanunqanyaq. Mandaq sacerdöti wanuskiptinrämi markanman kutinqa.
29 “ ‘Kay ninqäkunaqa leymi kaykan. Kay leytami tsurikikunata maycho tarpis yachatsiyanki.
30 “ ‘Wanutsikuq runataqa rikaqkuna shimpiptinrämi wanutsiyanki. Juk runalla shimpiptinqa ama wanutsiyankitsu.†
31 “ ‘Wanutsikuq runa wanuyta mantsar qellayta pägayta munaptinpis ama chaskiyankitsu. Runa mayinta wanutsinqanpita tsay runataqa wanutsiyanki.
32 “ ‘Mana yarpaypa wanutsiq runa amparakuyänan markacho tanqanpita markanman kutiyta munar pägayta munaptinpis ama chaskiyankitsu. Mandaq sacerdöti manarä wanuptinqa tsay amparakuyänan markallacho tätsun.
33 “ ‘Runa mayinta wanutsiq runaqa täyanqayki naciontami impüruyätsin. Tsaymi wanutsikuq runata wanutsiyaptikirä nacionniki purificashqa kanqa.
34 “ ‘Noqa Tayta Diosmi qamkunawan taykä. Tsaynö kaykaptinqa tänantsikpä kaq nacionta ama impüruyätsiyankitsu’ ”.