Chakrakunata tsay trïbu runakunalla tsararäyänanpä tantiyatsinqan
36
Galaadpita aywaraq runakunapa mandaqninkunami Moiséswan y Israel mayinkunapa mandaqninkunawan parlayänanpä aywayarqan. (Galaadqa Maquirpa tsurinmi karqan. Maquirqa Manaséspa tsurinmi karqan. Manasésqa Josépa tsurinmi karqan.) 2 Paykunaman chaykurmi niyarqan: “Israel mayintsikkuna suertita jitaypa chakrata chaskiyänanpämi Tayta Dios niyäshushqayki. Tsaynömi castä Zelofehadpa chakranta warmi tsurinkuna chaskiyänanpäpis niyäshushqayki.† 3 Tsay jipashkuna juk trïbu Israel mayintsikkunawan majatsakäyaptin chakrankunaqa manami noqakunapa trïbükunapanatsu kanqa, sinöqa runanpa trïbunpanami. Tsaynöpaqa trïbü chaskinqan chakrakuna wallkallanami rikakunqa. 4 Jubileo wata chämuptinqa runanpa trïbunpänami tsay chakra imayyaqpis quëdanqa”.5 Tsaynö niyaptinmi Tayta Dios tantiyatsinqannölla Israel mayinkunata Moisés nirqan: “José trïbu runakunaqa rasun kaqtami niyan. 6 Tayta Diosmi nin: ‘Zelofehadpa jipash tsurinkuna majatsakayta munarqa kikinpa trïbun casta runallawan majatsakäyätsun. 7 Tsaynöpami juk trïbu runakuna yaykuyanqatsu juk trïbu runakunapa chakrankunamanqa. Tsaypa trokinqa cada trïbu runakunami chakrankunata respitatsiyanqa. 8 Mayqan trïbu jipashpis chakrata chaskirqa kikinpa trïbun casta runallawan majatsakätsun. Tsaynöpami taytanpita chaskinqan chakrata tsay trïbu runakunalla tsararäyanqa. 9 Juk trïbu runakunaqa ama yaykuyätsuntsu juk trïbu runakunapa chakranmanqa. Tsaypa trokinqa cada trïbu runakuna chakrankunallacho aruyätsun’ ”.
10 Moisésta Tayta Dios ninqanta Zelofehadpa jipash tsurinkuna cäsukurmi 11 Maala, Tirsa, Hogla, Milca y Noa tiyunkunapa tsurinkunallawan majatsakäyarqan. 12 Josépa tsurin Manasés trïbu runakunawan majatsakäyaptinmi chaskiyanqan chakrakuna taytanpa trïbullancho quëdarqan.
13 Jericó tsimpan y Jordán mayu kaqlä Moab pampacho Israel runakuna kaykäyaptinmi tsay leykunata tantiyatsinanpä Moisésta Tayta Dios nirqan.