Israel nacionpa lindërunkuna may maypa kananpä tantiyatsinqan
34
Moiséstami Tayta Dios nirqan: 2 “Israel runakunata niy: ‘Canaánman chäyaptikiqa qamkunapänami tsay parti kanqa. Lindërunkuna kaynömi kanqa:3 “ ‘Sur kaqläpami Zin niyanqan tsunyaq jirkapita Edom nacionyaq kanqa. Rupay yarqamunan kaqläpitami lindërun qallaykunqa Kachi Lamarpa ura kuchunyaq. 4 Tsaypitami sur kaqläpa lindëru aywanqa Acrabim witsayyaq. Zin tsunyaq jirkapa päsarmi Cades-barnea ninqanyaq chanqa. Tsaypitanami Hasar-adarpa päsar Asmón partiyaq chanqa. 5 Asmónpa päsarmi Egipto raqrayaq chanqa. Tsaypitanami Mediterráneo Lamaryaq lindëru chanqa.
6 “ ‘Rupay jeqanan kaqläpami lindëru kanqa Mediterráneo Lamar kuchunpa.
7 “ ‘Norti kaqläpanami lindëru kanqa Mediterráneo Lamarpita Hor jirkayaq. 8 Hor jirkapitanami lindëru Hamat partiman yaykunayaq chanqa y tsaypitanami chanqa Zedad partiyaq. 9 Zedad partipitanami Zifrón partiyaq chanqa. Y norti kaq lindërunami ushanqa Hazar-enán particho.
10 “ ‘Rupay yarqamunan kaqläpanami lindëru kanqa Hazar-enánpita qallaykur Sefam partiyaq. 11 Sefampa päsarmi Ribla partiyaq chanqa. Riblaqa Aínpita rupay yarqamunan kaqlächömi kaykan. Tsaypitami lindëru päsanqa Cineret qocha rupay yarqamunan kaqläpa. 12 Tsaypitanami lindëru päsanqa Jordán mayupa Kachi Lamarman chanqanyaq.
“ ‘Tsaynömi Israel runakuna täyänanpä kaq nacionpa lindërunkuna kanqa’ ”.
Chakrata rakipänakuyanqan
13 Tsaypitanami Israel mayinkunata Moisés nirqan: “Tsay naciontami isqun trïbu runakunawan pullan Manasés trïbu runakuna chaskiyänanpä Tayta Dios nimashqantsik. Tsaymi tsay nacioncho chakrakunata suertita jitaypa rakipänakuyanki.†
14 “Rubén trïbu runakuna, Gad trïbu runakuna y pullan Manasés trïbu runakunaqa chakrankuna chaskiyashqanami kayarqan.† 15 Chakrakunaqa kaykan Jericó y Jordán mayu tsimpan rupay yarqamunan kaqläpami”.
16 Moiséstami Tayta Dios nirqan: 17 “Tsay chakrakunataqa sacerdöti Eleazar y Nunpa tsurin Josuémi rakipuyanqa. 18 Tsaynölla cada trïbupa mandaqninta aypur yanapayäshunaykipä churanki. 19 Tsay yanapayäshuqninkunami kanqa:
Judá trïbupita Jefonipa tsurin Caleb,
20 Simeón trïbupita Amiudpa tsurin Semuel,
21 Benjamín trïbupita Quislónpa tsurin Elidad,
22 Dan trïbupita Joglipa tsurin mandaq Buqui,
23 Josépa tsurin Manasés trïbupita Efodpa tsurin mandaq Haniel,
24 Efraín trïbupita Siftánpa tsurin mandaq Kemuel,
25 Zabulón trïbupita Parnacpa tsurin mandaq Elizafán,
26 Isacar trïbupita Azánpa tsurin mandaq Paltiel,
27 Aser trïbupita Selomipa tsurin mandaq Ahiud,
28 Neftalí trïbupita Amiudpa tsurin mandaq Pedael”.
29 Tsay mandaqkunatami Tayta Dios churarqan Canaáncho Israel runakunata chakrata rakipuyänanpä.