Israel runakuna Egiptupita Jordán mayuyaq chäyanqan
33
Kaychömi qellqaraykan Israel runakuna Egiptupita trïbunpa trïbunpa yarqayämuptin Moiséswan Aarón pushayanqankuna. 2 Tayta Dios ninqannöllami Moisésqa qellqarqan yarquyanqan junaqpita mayman mayman chäyanqantapis.3 Wata qallanan killa chunka pitsqa junaqmi Rameséspita Israel runakuna yarquyarqan. Tsay junaqmi karqan Pascua mikuyta mikuyanqan waraynin. Tayta Dios yanapaptinmi llapan Egipto runakuna rikaykäyaptin aywayarqan. 4 Egipto runakunanami Tayta Dios wanutsinqan mayor tsurinkunata pampayarqan. Tsaynöpami Tayta Dios musyatsirqan Egipto runakuna adorayanqan diosninkuna munayniynaq kayanqanta.
5 Israel runakunami Rameséspita aywakur Sucotman chäyarqan.
6 Sucotpita aywakurnami Etamman chäyarqan. Tsayqa tsunyaq jirkachömi kaykan.
7 Etampita aywakurmi Baal-zefónpa tsimpan Pi-hahirotman chäyarqan. Tsaychönami Migdolpa tsimpancho patsakuyarqan.
8 Pi-hahirotpita aywakurmi lamarta tsimpar tsunyaq jirkaman chäyarqan. Tsaypita kimsa junaqtanami Etam tsunyaq jirkaman aywar Maraman chäyarqan. Tsayman chaykurmi patsakuyarqan.
9 Marapita aywakurmi Elimman chaykur chunka ishkay pukyukunata y qanchis chunka (70) palmërakunata tariyarqan. Tsaychömi patsakuyarqan.
10 Elimpita aywakurmi Puka Lamarpa ñöpanman chaykur patsakuyarqan.
11 Puka Lamarpita aywakurmi Sin niyanqan tsunyaq jirkaman chaykur patsakuyarqan.
12 Sin niyanqan tsunyaq jirkapita aywakurmi Dofcaman chaykur patsakuyarqan.
13 Dofcapita aywakurmi Alúsman chaykur patsakuyarqan.
14 Alúspita aywakurmi Refidimman chaykur patsakuyarqan. Tsaychöqa manami upuyänanpä yaku karqantsu.
15 Refidimpita aywakurmi Sinaí tsunyaq jirkaman chaykur patsakuyarqan.
16 Sinaí tsunyaq jirkapita aywakurmi Kibrot-hataavaman chaykur patsakuyarqan.
17 Kibrot-hataavapita aywakurmi Hazerotman chaykur patsakuyarqan.
18 Hazerotpita aywakurmi Ritmaman chaykur patsakuyarqan.
19 Ritmapita aywakurmi Rimón-peresman chaykur patsakuyarqan.
20 Rimón-perespita aywakurmi Libnaman chaykur patsakuyarqan.
21 Libnapita aywakurmi Rissaman chaykur patsakuyarqan.
22 Rissapita aywakurmi Ceelataman chaykur patsakuyarqan.
23 Ceelatapita aywakurmi Sefer jirkaman chaykur patsakuyarqan.
24 Sefer jirkapita aywakurmi Haradaman chaykur patsakuyarqan.
25 Haradapita aywakurmi Macelotman chaykur patsakuyarqan.
26 Macelotpita aywakurmi Tahatman chaykur patsakuyarqan.
27 Tahatpita aywakurmi Taraman chaykur patsakuyarqan.
28 Tarapita aywakurmi Mitcaman chaykur patsakuyarqan.
29 Mitcapita aywakurmi Hasmonaman chaykur patsakuyarqan.
30 Hasmonapita aywakurmi Moserotman chaykur patsakuyarqan.
31 Moserotpita aywakurmi Bene-jaacánman chaykur patsakuyarqan.
32 Bene-jaacánpita aywakurmi Gidgad jirkaman chaykur patsakuyarqan.
33 Gidgad jirkapita aywakurmi Jotbataman chaykur patsakuyarqan.
34 Jotbatapita aywakurmi Abronaman chaykur patsakuyarqan.
35 Abronapita aywakurmi Ezión-geberman chaykur patsakuyarqan.
36 Ezión-geberpita aywakurmi Zin niyanqan tsunyaq jirkaman chaykur patsakuyarqan. Tsayqa Cades partichömi karqan.
37 Cadespita aywakurmi Edom nacionwan tinkuq Hor jirkaman chaykur patsakuyarqan. 38 Nirkurmi Tayta Dios ninqannö Hor jirkaman† witsarkur sacerdöti Aarón wanukurqan. Pay wanurqan Israel runakuna Egiptupita yarqayämunqanpita chusku chunka (40) wata päsaskiptinmi. Aarón wanunqanqa pitsqa kaq killa punta kaq junaqchömi karqan. 39 Juk pachak ishkay chunka kimsa (123) watayuq kaykarmi Hor jirkacho Aarón wanurqan.
40 Hor jirkaman Israel runakuna chäyanqantami Arad markapa mandaqnin rey musyarqan. Aradqa Canaáncho kaykaq Neguevchömi karqan.†
41 Israel runakunaqa Hor jirkapita aywakurmi Zalmonaman chaykur patsakuyarqan.
42 Zalmonapita aywakurmi Punónman chaykur patsakuyarqan.
43 Punónpita aywakurmi Obotman chaykur patsakuyarqan.
44 Obotpita aywakurmi Moabpa lindërun Ije-abarimman chaykur patsakuyarqan.
45 Ije-abarimpita aywakurmi Dibón-gadman chaykur patsakuyarqan.
46 Dibón-gadpita aywakurmi Almón-diblataimman chaykur patsakuyarqan.
47 Almón-diblataimpita aywakurmi Abarim jirkakunaman chaykur patsakuyarqan. Tsayqa Nebupita rupay yarqamunan kaqlächömi kaykan.
48 Abarim jirkakunapita aywakurmi Jericó tsimpan y Jordán mayulä Moab pampaman chaykur patsakuyarqan. 49 Tsay pampachömi toldunkunata Israel runakuna shäritsiyarqan Bet-jesimot partipita Abel-sitim partiyaq.
Canaánta rakipänakuyänanpä tantiyatsinqan
50 Jericó tsimpan y Jordán mayu kaqlä Moab pampacho Israel runakuna taykäyaptinmi Moisésta Tayta Dios parlapar nirqan: 51 “Israel runakunata niy: ‘Jordán mayuta tsimpar Canaánman yaykur 52 tsaycho taykaq runakunata llapanta qarquyanki. Rumipita rurashqa o fiërrupita fundishqa kaptinpis ïdulunkunata pakir ushayanki. Ïdulunkunata adorayänan altarkunatapis llapanta juchutsiyanki.
53 “ ‘Tsaycho taq runakunata qarquskir qamkunana tsaycho täyanki. Tsaycho täyänaykipämi qamkunata entregashqä. 54 Cada trïbucho ayka runakuna kayanqanman tupu suertita jitaypa chakrata rakipuyanki. Atskaq runakuna kaptin jatun chakrata rakipuyanki. Wallka runakuna kaptinqa takshallata rakipuyanki. Suerti yarqamunqanpitami cada trïbu chakrata chaskiyanqa.† 55 Canaáncho taq runakunata mana qarquyaptikiqa paykunami ñawikicho qanra kaykaqnö y chakikicho kasha jatiraykaqnö kayanqa. 56 Mana qarquyaptikiqa paykunata castiganäpä yarpanqänöllami qamkunata castigayäshayki’ ”.