Rubén trïbu y Gad trïbu runakuna herenciata chaskiyanqan
32
Rubén trïbu y Gad trïbu runakunapa uywankuna atska kaptinmi Jazer parti y Galaad parti mitsikuyänanpä alli kanqanta rikar munapäyarqan. 2 Tsaymi Moisés, Eleazar y wakin mandaqkuna kaykäyanqanman aywaykur Gad trïbu y Rubén trïbu runakuna niyarqan: 3 “Atarot, Dibón, Jazer, Nimra, Hesbón, Eleale, Sebam, Nebo y Beón partikuna 4 uywäkunata mitsikuyänäpä allimi kaykan. Uywäkuna atska kaptinmi kay partikunata Tayta Dios noqakunapä qorishqa. 5 Tsaymi rugakuyä kay partikunata rakipaykayämänaykipä. Jordán mayutaqa amana tsimpatsiyämaynatsu”.6 Tsaymi Moisés nirqan: “Israel mayintsikkuna guërraman aywaykäyaptin ¿imanirtä quëdayta munaykäyanki? 7 ¿Imanirtä Israel mayintsikkunata qelanaykätsiyanki Tayta Dios awninqan nacionman aywayänanta? 8 Cades-barneapita Canaánta rikapakuq kachanqä runakunapis qamkunanömi Israel mayintsikkunata desvaluratsiyarqan. 9 Paykunami Escol pampayaq rikapakuq chäyarqan. Kutiykamurmi Israel mayintsikkunata willapar desvaluratsiyarqan Tayta Dios rikatsinqan partiman mana yaykuyänanpä.† 10 Tsay achäqui Tayta Dios pasaypa ajanaykurmi nirqan: 11 ‘Egiptupita yarqamuq runakuna ishkay chunka (20) watayuqpita janaman kaqqa mana wiyakuyanqanpitami yaykuyanqatsu Abrahamta, Isaacta y Jacobta awninqä nacionman. 12 Cenezeo runa Jefonipa tsurin Caleb y Nunpa tsurin Josuéllami criyiyämanqanpita tsay nacionman yaykuyanqa’.
13 “Tsaynö nirmi Tayta Dios pasaypa ajanar llapan tsay runakuna ushakäyanqanyaq tsunyaq jirkapa chusku chunka (40) wata puritsirqan.† 14 Kanan ¿qamkunapis Diosta ajanätsirku unay Israel mayikikunanölla desvaluratsiyta munaykäyanki? Tsaynö desvaluratsiyaptikiqa yapaymi Tayta Dios ajanar contrantsik rikakunqa. 15 Tayta Diosta mana wiyakur kaycho quëdayaptikiqa yapaymi tsunyaq jirkapa puritsimäshun. Tsaynöpami qamkuna jutsayuq kayanki Israel runakuna ushakäyänanpä”.
16 Moisés tsaynö niptinmi paykuna niyarqan: “Noqakunaqa kaychömi uywäkunapä corralta rurayta munayä. Tsaynöllami tsurïkunata imapis mana päsananpä markakunatapis rurayta munayä. 17 Kay particho taq runakuna mana wajupänanpämi markäkunata siguraykur tsurïkunatawan uywäkunata jaqiykuyäshä. Nirkurnami kamarikuskir Israel mayintsikkuna täyänanpä kaq partiman chätsiyanqäyaq puntankunata aywayäshä. 18 Llapan Israel mayintsikkuna chakrankunata chaskiskiyaptinrämi kutikayämushä. 19 Kay tsimpacho chakrata chaskiykarqa Jordán mayu tsimpachöqa mananami chaskiyäshänatsu”.
20 Tsaymi Moisés nirqan: “Niyanqaykita cumpliyaptikiqa allimi kanqa. Tsaymi guërraman aywayänaykipä kamarikuskir 21 Jordán mayu tsimpancho Tayta Diospa contrankunata ushakätsiyanqaykiyaq pelyayanki. 22 Llapan tsay markakunata ushakaskatsirrämi kutikayämunki. Tsaynö cumplirqa Tayta Diospa ñöpancho y Israel mayintsikkunapa ñöpancho manami jutsayuqtsu kayanki. Tsaynöpami kay chakrakuna qamkunapäna kanqa. 23 Mana cumplirmi itsanqa Tayta Diospa ñöpancho jutsayuq kar paypa castïgunpita imaypis qeshpiyankitsu. 24 Tsay höraqa tsurikikuna quëdayänanpä markakunata rurayay. Tsaynölla uywaykikunapä corralkunata rurayay. Tsaypitaqa kikikikuna awniyanqaykinölla aywayanki”.
25 Tsaymi Gad trïbu y Rubén trïbu runakuna niyarqan: “Taytay, niyämanqaykitaqa cumpliyäshämi. 26 Warmïkuna, pishi wamräkuna y uywäkunaqa kay Galaad parti markakunachömi quëdayanqa. 27 Noqakunami itsanqa niyämanqaykinölla shumaq kamarikuskir Tayta Dios munanqannö guërraman aywayäshä”.
28 Tsaymi sacerdöti Eleazarta, Nunpa tsurin Josuéta y cada trïbupa mandaqninkunata 29 Moisés nirqan: “Gad trïbu y Rubén trïbu runakunami Jordán mayuta tsimpar tsaycho taq runakunata vinciyänaykipä yanapayäshunki. Tsaypitarämi Galaad particho chakrakunata herencian kananpä rikatsiyanki. 30 Yanapayäshunaykipä Jordán mayuta mana päsaptinqa kay tsimpacho herencianta ama rikatsiyankitsu, tsaypa trokinqa Israel mayinkunawan Canaánchörä herencianta rikatsiyanki”.
31 Tsaynö niptinmi Gad trïbu y Rubén trïbu runakuna niyarqan: “Taytay, noqakunaqa Tayta Dios ninqannö llapantami cumpliyäshä. 32 Tsaymi guërracho yanapayänäpä Jordán mayuta tsimpar Canaánman yaykuyäshä. Imanö kaptinpis noqakunapa herenciäkunaqa Jordán mayupita kay tsimpachömi kanqa”.†
33 Tsaynö niyaptinmi herenciankunata Moisés rikatsirqan Gad trïbu, Rubén trïbu y pullan Manasés trïbu runakunata. Manasés trïbu runakunaqa Josépa tsurin Manaséspita aywaraqkunami kayarqan. Manarä vinciyaptinmi tsay herenciakuna amorreo runakunapa mandaqnin rey Sehónpa y Basán nacionpa mandaqnin rey Ogpa karqan. Tsaycho kaq llapan markakunatami chakrantinta Moisés rikatsirqan. 34 Tsaymi Gad trïbu runakuna kikinkunapä allitsayarqan Dibón markata, Atarot markata, Aroer markata, 35 Atarot-sofán markata, Jazer markata, Jogbeha markata, 36 Bet-nimra markata y Bet-arán markata. Tsay llapan markakunatami tumaypa murallayarqan. Tsaynöllami cabrankunapä y üshankunapäpis corralkunata rurayarqan.
37 Rubén trïbu runakunanami kikinkunapä allitsayarqan Hesbón markata, Eleale markata, Quiriataim markata, 38 Nebo markata, Baal-meón markata y Sibma markata. Tsay markakunapa jutinkunatapis trukatsiyarqanmi.
39 Manaséspa tsurin Maquirpita aywaraqkunanami Galaad partiman yaykuyarqan. Paykunaqa tsaycho taq amorreo runakunata qarquskirmi chakrankunawan quëdakuyarqan. 40 Tsaymi Galaad partita Moisés entregarqan Manaséspa tsurin Maquirpita aywaraq runakunata. Paykunami tsaycho täyarqan. 41 Tsaynöllami Manaséspa tsurin Jairpita aywaraq runakuna amorreo runakunapa wakin taksha markankunata tsariyarqan. Tsay partitami jutitsiyarqan Havot-jair jutin kananpä.a 42 Noba casta runakunanami Kenat partita llapan markankunatawan tsariskir tsay partita jutitsiyarqan Noba jutin kananpä.