2 “Wakin runakuna llutanta rurayaptinpis qamkunaqa llutanta ama rurayankitsu. Testïgu karqa rasuntanörä wakin parlayaptinpis qamkunaqa rasun kaqllata parlayanki. 3 Llutanta rurashqa kaptinqa ni muchuq kaptinpis ama janan shäriyankitsu.^†

4 “Chikishuqniki runapa oqrakashqa törunta o ashnunta tarirqa ämunman kutitsiyanki. 5 Chikishuqnikipa ashnun cargantin jeqashqa kaykaqta rikarqa sharkatsiyanki.^†

6 “Demandakuq muchuq kaptinpis shumaq arreglayanki.

7 “Manakaqkunata pipis tumpaptinqa ama cäsupäyankitsu. Jutsaynaq runataqa ama wanutsiyankitsu. Jutsayuq kaqtaqa manami perdonashätsu.

8 “Autoridä kar quejakuqpa janan shäriyänaykipä imatapis ama chaskipakuyankitsu. Chaskipakuq autoridäqa manami shumaq arreglantsu, tsaypa trokinqa chaskipanqan runapa janan shärirmi runakuna alli yätsiyanqantapis chaskintsu.^†

9 “Juk nacionpita shamuq runata ama ñakatsiyankitsu. Qamkunapis Egiptucho jäpa kashqa kar musyayankimi juklä nacioncho imanö kaway kanqanta.^†

10 “Soqta wata chakraykikunacho murur wayuyninta qoriyanki. 11 Qanchis watachöqa tsay chakraykikunata jamatsiyanki. Tsaycho shiwa wiñamuptinqa jaqiykuyanki muchuqkuna qorikuyänanpä y munti uywakuna mikuyänanpä. Tsaynö rurayanki üva chakra o olïvu chakra kaptinpis.^†

12 “Llapan aruyänaykipä kaqta soqta junaqllacho aruyanki. Qanchis junaqchöqa jamayanki. Töruykikunatapis, ashnuykikunatapis, wätaynikikunatapis y arupakuq jäpa runakunatapis jamatsiyanki.^†

13 “Ninqäkunataqa llapanta cumpliyanki. Juklä runakuna yärakuyanqan dioskunamanqa ama mañakuyankitsu. Tsay dioskunapataqa ni jutintapis ama joqariyankitsu.

14 “Cada watacho kimsa kuti fiestata rurar adorayämanki.

15 “Levadüraynaq Tanta Mikuna fiestata rurayanki. Ninqänölla tsay fiestacho levadüraynaq tantata qanchis junaq mikuyanki.^† Abib killacho Egiptupita yarqamushqa karmi tsay killacho fiestata rurayanki. Pipis noqata adoramänanpä shamurqa ama jinayllaqa shamutsuntsu.

16 “Tsaynölla tsaki mikuy cosëchata qallaykur Tsaki Mikuy Cosëcha fiestata^a rurayanki.

“Wata ushanancho cosëchata qoriyta ushaskir^† Cosëcha Ushay fiestata^b rurayanki.^†

17 “Llapan ollqu kaqkunaqa adorayämänanpä cada wata tsay kimsan fiestakunaman aywayanqa.

18 “Uywakunata noqapä sacrificiuta rupatsirqa yawartawan y levadürayuq tantata tallurkur ama rupatsiyankitsu. Warayninpäqa wirantapis ama churayankitsu.

19 “Murupakuyanqaykipita primiciata wayïman apayämunki.^†

“Mallwa cabrapa aytsantaqa mamanpa lichinwan ama kusinayankitsu.^†

20 “Angelnïtami kachamushä imapitapis tsapäyäshurniki kamarinqä nacionman chätsiyäshunaykipä. 21 Paymi trokï yanapayäshunki. Tsaynö kaptinqa contran ama shäriyankitsu. Pay niyäshunqaykita llapantapis cäsuyanki. Jutsata rurayaptikiqa manami perdonayäshunkitsu. 22 Pay niyäshunqaykita llapanta cäsukuyaptikiqa chikishuqnikikunapa contranmi kashä. Tsaynöllami ñakatsishuqnikikunatapis ñakatsishä.

23 “Angelnïmi pushayäshunki amorreo runakuna, heteo runakuna, ferezeo runakuna, cananeo runakuna, heveo runakuna y jebuseo runakuna täyanqan nacionman. Tsay runakunata llapantami illakätsishä. 24 Paykuna jutsata rurayaptinpis qamkunaqa ama jutsata rurayankitsu. Yärakuyanqan dioskunamanpis ama qonqurikuyankitsu ni sirviyankitsu. Adorayanqan wanka rumikunata y llapan ïdulunkunatapis ñuchutsir ushakätsiyanki.

25 “Noqa Tayta Diosnikikuna kaptïmi noqallata sirviyämanki. Tsaynö kawayaptikimi bendicionnïta churamushä mikuypis yakupis mana pishïyäshunaykipä. Ima qeshyapitapis noqami alliyätsiyäshayki. 26 Qamkuna täyanqaykichöqa manami pï warmipis shullunqatsu ni qolluqpis kanqatsu. Awkinyäyanqaykiyaqmi kawayanki.

27 “Mayqan nacionpa päsayaptikipis noqami yanapayäshayki tsaycho taq runakuna mantsarir qeshpir aywakuyänanpä. 28 Tsaynö yanapaptïmi heveo runakuna, cananeo runakuna y heteo runakunapis qamkunapita qeshpir aywakuyanqa. 29 Tsaynö kaptinpis manami juk watallachötsu tsay runakunata qarqushä. Juklla qarquptïqa chakrakuna purunyanqami y munti uywakunapis mirarmi ushayäshunki. 30 Tsaymi qamkuna mirayanqaykiyaq paykunata wallka wallkalla qarqushä. Tsaynöpami llapan chakrankuna qamkunapana kanqa.

31 “Nacionnikipa lindërunmi kanqa Puka Lamarpita filisteo runakunapa lamarninyaq.^c Tsaynöllami lindërunkuna kanqa tsunyaq jirkapita Éufrates mayuyaq. Qamkunatami yanapayäshayki tsaycho taq runakunata qarquyänaykipä. 32 Tsay runakunawan ni diosninkunawan ama ima pactutapis rurayankitsu. 33 Täyanqayki nacioncho tsay runakuna täyänanta ama munayankitsu. Qamkuna kaqcho tarqa mana cäsukayämänaykipämi imaykata niyäshunki. Tsaynöpami paykuna yärakuyanqan dioskunata adorayaptiki mana kuyapaypa castigayäshayki”.