Tayta Diosta Israel runakuna awniyanqan
24
Moiséstami Tayta Dios nirqan: “Aarónta, Nadabta, Abiúta y qanchis chunka (70) Israel mayor runakunata pushakurkur noqa kaykanqä jirkaman witsäyämunki. Manarä chämur karullacho paykuna qonqurikuyätsun. 2 Tsaypita mastaqa noqa kaqman ama witiyämutsuntsu. Paykunata tsaycho jaqiykur japallayki witsämunki”.3 Tsaynö niptinmi jirkapita Moisés kutiykur Tayta Dios ninqankunata y leyninkunatapis runakunata willarqan. Tsaymi llapan niyarqan: “Tayta Dios ninqankunata llapantami cumpliyäshä”.†
4 Awniyaptinmi Tayta Dios ninqankunata Moisés llapanta qellqarqan. Tsaypita waraynin tutami tsaka tsakalla jirka chakincho altarta pirqarqan. Tsaychömi Israel runakunapa trïbunkuna chunka ishkay kaptin chunka ishkay wanka rumikunata jawitsirqan. 5 Nirkurnami chölukunata nirqan törukunata pishtaskir rupatsina sacrificiuta y alli päsakuy sacrificiuta rupatsiyänanpä.
6 Pishtayanqan törukunapa yawarninta matikunaman Moisés qoriskirmi altarman pullanta tsaqtsurqan. 7 Nirkurnami Pactu Libruta runakunata liyiparqan. Tsayta wiyarmi niyarqan: “Tayta Dios ninqankunataqa llapantami cumpliyäshä”.
8 Tsaynö niyaptinmi Moisésqa matikunaman qorinqan yawarta runakunapa jananman tsaqtsupar nirqan: “Kay yawarqa noqantsikwan Tayta Dios pactuta ruranqan yawarmi kaykan.† Mandamientunkunata y leyninkunata entregamarnintsikmi noqantsikwan pactuta ruraykan”.†
9 Tsaypitanami Sinaí jirkaman witsäyarqan Moisés, Aarón, Nadab, Abiú y qanchis chunka (70) Israel mayor runakuna. 10 Tsaychömi yärakuyanqan Tayta Diosta rikayarqan. Chakin jaruranqanchömi zafiro rumipita rurashqanörä chipipirqan. Colorninpis ciëlu niraqmi karqan. 11 Tayta Diosta rikarpis tsay mayor runakuna manami wanuyarqantsu. Tsaychömi mikuyarqan y upuyarqan.
Sinaí jirkacho chunka mandamientukunata Moisés chaskinqan
12 Moiséstami Tayta Dios nirqan: “Jirka puntanman witsarkamur shuyämay. Tsaychömi läja rumicho qellqanqä leykunata y mandamientukunata entregashayki. Tsaytami Israel runakunata yachatsinki”.
13 Tsaynö niptinmi Tayta Dios kaykanqan jirkaman yanapaqnin Josuéwan Moisés witsäyarqan. 14 Manarä aywarmi mayor runakunata nirqan: “Kutiyämunqäyaq kayllacho shuyaykäyämay. Qamkunawanmi Aarón y Hur quëdayanqa. Imapis kaptinqa paykunaman aywayanki”.
15 Tsaynö yätsiskir jirkaman Moisés witsaskiptinmi jirkata pukutay tsapaskirqan. 16 Soqta junaqmi Sinaí jirkata pukutay tsapararqan. Tsay pukutaypitami Tayta Diospa chipipiyninpis rikakämurqan. Qanchis kaq junaqchörämi pukutay rurinpita Moisésman Tayta Dios qayakamurqan. 17 Tsay jirkachömi Tayta Diospa chipipiyninta imayka nina lunyaykaqtanörä Israel runakuna rikayarqan. 18 Moisésta Tayta Dios qayamuptinmi puntaman witsarnin pukutay rurinman yaykurqan. Tsay puntachömi chusku chunka (40) junaq y chusku chunka paqas kamurqan.†