2 (1) “Pitapis paqaspa suwakuykaqta tariykur wanutsirqa wanutsinqanpita manami jutsayuqtsu kanqa. 3 (2) Junaqpa suwakuykaqta tariykur wanutsirmi itsanqa jutsayuq kanqa.

“Suwakuq runa suwakunqanpita pägakutsun. Pägakunanpä qellaynin mana kaptinqa kikin suwakuqta rantikutsun.

4 (3) “Suwakuqpa makincho wäkata, üshata o ashnuta karpis kawaykaqtarä taripuyaptinqa suwakunqanta kutitsir ishkay kuti masta pägakutsun.

5 (4) “Pipis mitsikur jukpa chakranta o üva huertanta däñukurqa däñukunqanpita mikuycho o üvacho karpis allinnin kaqta pägakutsun.

6 (5) “Pipis kayapakuykanqancho päsapakur chakracho kaykaq o ëracho kaykaq mikuyta kayapakurqa nina rupanqanpita pägakutsun.

7 (6) “Paytakuy qellayta o alhäjakunata suwapaskiptin suwakuqta taripuptinqa tsay suwakunqanpita ishkay kuti masta pägakutsun. 8 (7) Suwakuqta mana taripuptinqa paytakuy chaskiq runata Tayta Diospa ñöpanman apayanqa.^a Tsaychönami juzgayanqa suwakunqanta o mana suwakunqantapis.

9 (8) “Töruta, ashnuta, üshata, latsapata o imata karpis ishkaq runakuna ‘kayqa noqapami’ nir qechunakuyaptinqa tsay runakunata Tayta Diospa ñöpanman apayätsun. Tsaycho mayqantapis taripuptinqa jutsayuq kaq pägakutsun ishkay kuti masta.

10 (9) “Paytakuy ashnu, töru, üsha o ima uywapis wanuptin, o imapis päsaptin o tsay paytakunqanta suwa apakuptinqa 11 (10) paytakuyta chaskiq runa Diospa jutincho juratsun tsay paytakuyta mana pakanqanta. Tsaynö juraptinqa uywapa duëñun ama cobratsunnatsu. 12 (11) Mana rikanqanpita suwa apakuptin itsanqa oqrapakunqanpita duëñunta pägatsun. 13 (12) Jirka uywa mikushqa kaptinqa katupinta duëñun rikananpä apaputsun. Tsaynö aparqa mananami pägakunqanatsu.

14 (13) “Pipis runapa uywanta mañakuykur duëñun mana rikaykaptin wanupakurqa tsay uywapa chaninta pägakutsun. 15 (14) Uywapa duëñun rikaykaptin wanuptinmi itsanqa uywapa chaninta päganqanatsu. Alquilashqa karqa gänananpä kaqllata pägatsun.

16 (15) “Piwanpis manarä kakushqa jipashta pipis perditsirqa tsay jipashta warmin kananpä qoritsun. Tsaynölla jipashpa taytantapis pägatsun pägananpä costumbri kanqannö. 17 (16) Qorinanta jipashpa taytan mana munaptinqa amana qoritsuntsu. Itsanqa warmi ashiycho costumbri kanqannö tsay jipashpa taytanta chölu pägatsun.^†

18 (17) “Brüjukunataqa llapanta wanutsiyanki.^†

19 (18) “Uywawan kakuqkunataqa pitapis wanutsiyanki.^†

20 (19) “Tayta Diospä sacrificiuta rupatsinanpa trokin juk dioskunapä sacrificiuta rupatsiptinqa tsay runata wanutsiyanki.^†

21 (20) “Jäpa runakunata ama ñakatsiyankitsu ni chikiyankitsu. Yarpäyay qamkunapis Egiptucho tar jäpa kayanqaykita.

22 (21) “Viüdakunatapis ni waktsakunatapis ama ñakatsiyankitsu.^† 23 (22) Ñakatsiyaptikiqa mañakamaptin noqami janankuna shärishä. 24 (23) Tsaymi pasaypa ajar espädawan wanutsiyäshayki. Tsaynöpami qamkunapapis warmikikuna viüda tikrayanqa y tsurikikunapis waktsa rikakuyanqa.

25 (24) “Israel nacioncho muchuq runakunata qellayta mañarqa ama wakin runakunanöqa wachayninta mañayankitsu.^† 26 (25) Qellayta mañaptiki latsapanta prenda kachapuyäshuptiki patsa manarä tsakaptin kutitsiyanki. 27 (26) Tsay latsapallanmi kaykan paqaspa punur pitukunanpä. Mana kutitsiptikiqa ¿imanwanrä pununqa? Alatsikur mañakamaptin kuyapäkuq karmi janan shärishä.^†

28 (27) “Tayta Diospä imaypis llutanta ama parlayankitsu. Tsaynöpis markaykicho autoridäkunata ama maldicionayankitsu.^†

29 (28) “Ama qonqäyankitsu cosëchaykipita y vïnu rurayanqaykipita noqapä primicia apamuyta.

“Mayor tsurikikunata apayämunaykipa trokinqa noqapä ofrendata apayämunki.^†

30 (29) “Tsaynölla malta wäkaykipa, malta üshaykipa y malta cabraykipa punta wawanta orqu kaqta noqapä apayämunki. Yurinqanpita qanchis junaqllami tsay uywakuna mamanwan kanqa. Puwaq kaq junaqchöqa noqapä apayämunki.

31 (30) “Qamkunatami akrarqä jutsaynaq kar santu kayänaykipä. Tsaynö kaykarqa ama mikuyankitsu jirka uywakuna wanutsinqan uywapa aytsanta.^† Tsaytaqa allqukuna mikukuyänanpä jitapaykuyanki.