Wätaykuna imanö kayänanpä ninqan
21
“Kay leykunata Israel runakunata yachatsinki: 2 Hebreo mayinta wätaynin kananpä pipis rantirqa soqta watayaqllami arutsinqa. Qanchis watachöqa imatapis mana pägaypami libri yarqukunqa. 3 Wätaynin kananpä warmiynaqlla yaykushqa karqa warmiynaqllami yarqukunqa. Warmiyuq yaykushqa karqa warmintinmi yarqukunqa.4 “Japallan yaykuptin wätaynin jipashwan patronnin tätsiptinqa wätay kanqanpita tsay runa yarqukur japallanmi yarqukunqa. Tsay wätay warmi y wawankunapis patronninpa makinchömi quëdakuyanqa. 5 Patronninta, warminta y wamrankunata tsay runa jaqiyta mana munaptinqa 6 patronninmi Tayta Diospa ñöpanman apanqa.a Tsaychönami punkupa marcunman apaykur rinrinta alisnawan uchkunqa. Tsaynö ruranqanpitami imayyaqpis wätaynin kanqa.†
7 “Pipis wätay kananpä warmi tsurinta rantikurqa ama yarpätsuntsu qanchis wata arunqanpita ollqu wätaynö libri yarqukunanpä kanqanta. 8 Tsay jipashta warmin kananpä patrón mana munaptinqa castankunami pägakuykur qorikuyanqa. Warminpä mana munarpis mana Israel runamanqa manami rantikunmantsu. 9 Tsay wätaynin jipashta tsurinwan tätsirqa kikinpa warmi tsurintanömi rikanqa.
10 “Wätaynin jipash jananman juk warmita ashirqa tsay wätay kaq warminta mikuyta y latsapata mana kachaypa kamaripätsun. Tsaynölla paywanpis punutsun. 11 Mikuytapis o latsapatapis mana kamaripar o paywan manana punurqa wätaynin kananpä rantinqanpita imatapis mana cobrarmi libri yarqukunanpä jaqiykunqa.
Imanö castigananpä tantiyatsinqan
12 “Pipis runa mayinta maqar wanutsiptinqa kikintapis wanutsiyätsun.† 13 Noqa destinashqa kaptï mana yarpaypa wanutsishqa karqa rikatsinqä markaman tsay wanutsiq runa qeshpitsun.† 14 Yarpaypa runa mayinta wanutsiptinqa altarnïman pakakuptinpis wanutsiyätsun.
15 “Pipis mamanta taytanta maqaq kaqtaqa wanutsiyätsun.
16 “Pipis runa mayinta suwaskir rantikuptin o makincho tsararaptinpis tsay suwakuq runata wanutsiyätsun.†
17 “Pipis mamanta o taytanta mana respitaptinqa wanutsiyätsun.†
18 “Pelyanqancho saqmaypa o kutaypapis pasaypa antsa kanqanyaq maqaptinqa 19 tsay maqaq runa manami wanutsishqatsu kanqa. Itsanqa cämanpita tukrullanwanpis tsay antsa kaykaq runa yarqamur puriptinqa llapan jampikunqanpita y aträsunpita pägatsun.
20 “Pipis wätaynin warmita y ollquta wanuqpä garutiptinqa castigashqa katsun. 21 Maqanqanpita juk ishkay junaq kawaptinqa tsay patronnin mananami castigashqanatsu kanqa. Tsaynö kanqa kikinpa wätaynin kaptinmi.
22 “Ishkaq runa pelyaykäyanqancho qeshyaq warmita illaqpita chätsipakuptin tsay achäquilla shulluptinqa juezmanmi demandakunqa. Tsay warmi mana wanuptinqa warmipa lesionninpita runan mañaptin jueznami tantiyaykur pägatsinqa. 23 Tsay warmi wanuptinmi itsanqa maqakuq runatapis wanutsiyanqa.
24 “Ñawinta jipiptinqa kikinpa ñawintapis jipiyätsun. Kirunta jipiptinqa kikinpa kiruntapis jipiyätsun.† Makinta pakiptinqa kikinpa makintapis pakiyätsun. Chakinta pakiptinqa kikinpa chakintapis pakiyätsun. 25 Rupatsiptinqa kikintapis rupatsiyätsun. Yawarta jipiptinqa kikinpa yawarnintapis jipiyätsun. Maqaptinqa kikintapis maqayätsun.
26 “Mayqanpis wätayninta maqar ñawinta pashtapurqa ollqu o warmi kaptinpis libri kananpämi kachaykunqa. 27 Tsaynölla wätayninpa kirun jipikaqpä maqarqa libri kananpämi kachaykunqa.
Illaqpita imapis kaptin imata rurayänanpäpis ninqan
28 “Ollquta warmita karpis töru waqraypa wanutsiptinqa tsay töruta saqmaypa wanutsiyätsun. Aytsantapis ama pipis mikutsuntsu. Ämuntaqa amana demandatsuntsu. 29 Waqrakuyta mäñashqa kar pitapis waqraypa wanutsiptinqa tsay törupa ämuntapis wanutsiyätsun. Tsaynö katsun waqrakuq kanqanta musyaykar mana siguranqanpita. Tsaynölla töruntapis saqmaypa wanutsiyätsun. 30 Törupa ämun wanuyta mana munar pägayta munaptinqa mañanqanta pägatsun.
31 “Tsaynölla katsun ollqu wamrata o warmi wamrata töru waqraptinpis. 32 Wätaytapis waqraypa töru wanutsiptinqa tsay töruta saqmaypa wanutsiyätsun. Wätay ollqu o warmi kaptinpis tsaynö katsun. Tsaynölla törupa ämun kimsa chunka (30) siclob qellayta pägatsun wanuq wätayninpa patronninta.
33 “Mayqanpis pözu uchkuykanqanta kichayllata jaqiykuptin y yaku pözuta mana tsapayllapa jaqiykuptin tsayman töru o ashnu jeqaptinqa 34 pözupa duëñun tsay uywakunapa chaninta pägakutsun. Wanuq uywapa aytsanwanqa pözupa duëñun quëdakutsun.
35 “Pipa törunpis juk runapa törunta maqar wanutsiptinqa kawaykaq töruta rantikuskir tsay qellayta pullanpura rakipänakuyätsun. Tsaynölla wanushqa törupa aytsantapis pullanpura rakipänakuyätsun. 36 Törun waqrakuq kanqanta musyaykar ämun mana siguraptin jukpa törunta wanutsiptinqa wanushqa törupa ämunta trokinta qotsun. Tsay wanushqa törupa aytsanwanqa pägaq kaq quëdakutsun.